JONKUYaR MUALLIMA

Men hayotning barcha sinovlaridan oʻtib, oltmish yoshni qarshilayotgan, qirq yil davomida pedagog boʻlib yoshlarga taʼlim-tarbiya bergan bir inson sifatida oʻzim mehnat qilayotgan jamoadagi hamkasblarimiz tomonidan amalga oshirilgan ishlarni va ularning natijalarini koʻz oldimga keltiraman. Shunday paytlarda xalqimiz tomonidan sevib tomosha qilinadigan "Suyunchi” filmi bosh qahramonlaridan biri Anzirat buvi toʻgʻrisida aytilgan "Qishloqning vijdoni” degan ibora "lop” etib miyamga keladi. Shunda yana ilgari jamoamizda mehnat qilgan va ayni kunda ham mehnat qilayotgan soʻzi bilan ishi bir, talabchan, kamchiliklarga murosasiz kishilarni koʻz oldimga keltiraman. Demak, bunday insonlarni biz ham jamoamizning vijdoni deb atasak yarashar ekan-da!

Biz yaqinda bor kuch-gʻayratini, shijoatini yosh avlod taʼlim-tarbiyasiga baxshida etgan, uzoq yillar maktabimiz shaʼnini himoya qilib, shogirdlari mehrini qozongan fidoyi muallima Ayimjon Jumaniyozovani nafaqaga kuzatgan edik. Taʼbir joiz boʻlsa, u haqiqatan ham jamoamizning vijdoni edi.

Ayni kunda maktabimizda barcha hamkasblarimiz oʻzlarining ishchanligi, yaxshi fazilatlari bilan hammaga oʻrnak boʻlgan ustozlar kabi faoliyat koʻrsatishga harakat qilishmoqda. Shunday hamkasblarimizdan biri – ona tili va adabiyoti fani oʻqituvchisi Inobat Rajabova fidoyiligi bilan jamoamizning hurmatiga sazovor boʻlayotir.

Inobat Rajabova Xolimbeg ovulidagi oʻrta maktabni tugatib, 2000-yilda Toshkent davlat pedagogika institutiga oʻqishga kirdi. Inobat ushbu oliygohni muvaffaqiyatli tugatib, 2004-yildan buyon ovuldagi 17-sonli maktabda muallimalik qilayapti.

Inobat Rajabova ish faoliyatining dastlabki kunlaridanoq oʻz kasbiga mehr qoʻydi, bugun kechagidan, ertaga esa bugungidan yaxshiroq ishlashga harakat qildi.

Maktab jamoasi Inobatni oʻz fanining bilimdoni, qatʼiyatli, boshlagan ishini oxiriga yetkazadigan, oʻz kasbiga, jamoasiga sodiq muallima sifatida hurmat qiladi.

- Davlatimiz biz pedagoglarga bir qancha sharoit va imkoniyatlar yaratib berayapti. Biz esa bunday imkoniyatlardan oqilona foydalanishimiz lozim, – deydi ishchan muallima I.Rajabova.

Har bir darsini yangi pedagogik texnologiyalardan samarali foydalangan holda tashkil etadigan bu muallimani barcha oʻquvchilar hurmat qilishadi.

Maktabimizda Inobatning saʼy-harakatlari tufayli, biron bir ahamiyatga molik boʻlgan sana nishonlanmay qolmaydi. Uning oʻquvchilarini hali Sohibqiron Amir Temur, hali Ulugʻbek, Bobur siymosida yoki Nodirayu Uvaysiy siymosida koʻrishingiz mumkin.

Oʻz kasbini sevib, fidoyilik namunalarini koʻrsatib mehnat qilayotgan muallima Inobat Rajabova oʻz shogirdlari bilan turli koʻrik-tanlovlarda, fan olimpiadasi, bilimlar bellashuvlarida muvaffaqiyatli qatnashib kelayotir. Bunday tanlov va bellashuvlarda uning Barno Otaxonova va Munisxon Rahimova singari shogirdlari faol ishtirok etmoqdalar.

Inobat Rajabova kechagina Z.Asqarov, M.Tursunova, O.Ahmedov, P.Eshmanov, Oʻ.Eshmanov, O.Tursunova, M.Mahmudov va B.Eshmanovlarning sevimli shogirdi edi.

Inobat ayniqsa, oʻz onasiday yaqin boʻlib qolgan ustozi, marhuma Ziyoda Rajabovani sogʻinib eslaydi.

Bugun esa Inobatning ham shogirdlari bor. Uning  Farogʻat Kenjayeva va Marvarid Tojimurodova singari shogirdlari oʻzi bilan bir jamoada yoshlarga taʼlim va tarbiya berishda fidokorona mehnat qilmoqdalar.

Shogirdlar kamolini koʻrish ustoz uchun baxt, deganlaridek, Inobat ham oʻz shogirdlarining muvaffaqiyatlaridan hamisha quvonib yuradi.

Men hamkasbim Inobat Rajabovaning kelgusi ishlarida muvaffaqiyatlar tilab, unga quyidagi sheʼrimni bagʻishlashni maʼqul koʻrdim:

Hamisha fidoyi bizning Inobat,

Joʻshib ishlar, qalbi toʻla shijoat.

Shogirdlari uning bilimdon erur,

Zakovat bobida dilni qilar shod.

Oʻqib-izlanishga sarf qilar kuchin,

Tinib-tinchimaydi, doʻndirar ishin.

Shogirdlari esa Qoraqalpoqda,

Gʻolibdir fanlar olimpiadasin!

Yangiboy EShIMMATOV,

17-sonli maktab oʻqituvchisi, "Shuhrat” medali sohibi.

Suratda: Inobat Rajabova shogirdlari Muxlisa Masharipova va Gulzebo Toʻliboyevalar bilan.