USTOZLARGA EHTIROM (Foto+Video)

Ilk bor qoʻlga qalam tutqazib, harflar dunyosiga olib kirgan, sirli boʻlib koʻringan ilm olamining qulfini ochgan aziz va muhtaram ustozlarimizni doim ardoqlab yashaymiz. Bu moʻʼtabar insonlarni yosh avlodni kamolga yetkazish yoʻlidagi mashaqqatli mehnati uchun juda qadrlaymiz va eʼzozlaymiz. Zero, ularning bu beminnat xizmatlari har birimizning hayotimizda beqiyos oʻrin tutadi.

Mamlakatimizda "Oʻqituvchi va murabbiylar kuni”ning bayram sifatida keng nishonlanib kelinayotganligi sharafli kasb egalarining hurmat va eʼtiborda ekanligidan dalolatdir. Jumladan, Prezidentimiz Sh.Mirziyoyevning 2017-yil 27-sentyabrdagi farmoniga muvofiq, mamlakatimiz taʼlim sohasidagi katta tajribaga ega, fidoyi hamda faol oʻqituvchi va murabbiylardan bir guruhi bayram arafasida davlatimizning yuksak mukofotlari va unvonlari bilan taqdirlandilar.

Prezidentimiz Sh.Mirziyoyev oʻqituvchi va murabbiylarga yoʻllagan bayram tabrigida "Biz bugun zamonaviy bilim va kasb egalari, xorijiy tillarni puxta egallab, katta umid va ishonch bilan qadam qoʻyayotgan, ertangi kunimizning hal qiluvchi kuchi boʻlgan ming-minglab farzandlarimiz kamolida oʻqituvchi va murabbiylarning beqiyos hissasi borligini yaxshi bilamiz va sizlarning bu ulugʻ xizmatingizni yuksak qadrlaymiz” deya alohida taʼkidlab oʻtdilar.

Darhaqiqat, maʼrifat fidoyilari boʻlgan ustoz va murabbiylarimiz cheksiz ehtiromga loyiqdir. Barcha joylarda boʻlgani kabi tumanimizda ham bu moʻʼtabar insonlar uchun bayram tadbirlari, uchrashuvlar oʻtkazildi. Boʻlib oʻtgan tadbirlarga fidoyili va jonkuyar oʻqituvchi hamda murabbiylar, nafaqadagi faxriy ustozlar taklif qilinib, ularga ehtirom koʻrsatildi.

Tumanimizdagi "Istiqlol” toʻyxonasida oʻtkazilgan bayram tadbiriga xalq taʼlimi faxriylari, umumtaʼlim maktablari direktorlari, maktabgacha taʼlim muassasalari mudiralari hamda taʼlim sohasida faollik koʻrsatib kelayotgan fidoyi xodimlar taklif qilindi.

Tadbirda ishtirok etgan tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Alisher Yoʻldoshev hamda Xotin-qizlar qoʻmitasi raisi, tuman hokimi oʻrinbosari Maryam Ahmedovalar sharafli kasb egalarini bayram bilan tabriklab, kelajak vorislarini komil insonlar qilib voyaga yetkazishdagi jonkuyarlik va fidoyiliklari uchun minnatdorchilik izhor qildilar.

Tadbida tuman XTMFMTTEB mudiri Otabek Yoʻldoshov ustoz, oʻqituvchi va murabbiylarni kasb bayrami bilan qutladi. Sohadagi amalga oshirilayotgan ulkan oʻzgarishlarga monand ravishda taʼlim sifatini yanada yaxshilashga eʼtiborni kuchaytirish lozimligini, endilikda soha xodimlarining zimmasidagi masʼuliyatlari yanada ortishini eʼtirof etib oʻtdi.

Tadbirda xalq taʼlimi sohasida munosib mehnat qilib kelayotgan 15 nafar faol xodimlarga "Oʻzbekiston Respublikasi xalq taʼlimi aʼlochisi”, "Qoraqalpogʻiston Respublikasi xalq taʼlim aʼlochisi” koʻkrak nishonlari va faxriy yorliq hamda tashakkurnomalar taqdim etildi.

Xalq taʼlimi faxriylari va ilgʻor oʻqituvchi hamda murabbiylar ham soʻzga chiqib, barchani bayram bilan muborakbod etdilar.

- Kasbimiz mashaqqatli, masʼuliyatli shu bilan birga sharafli hamdir, – deydi faxr bilan "Oʻzbekiston Respublikasi xalq taʼlim aʼlochisi” koʻkrak nishoni bilan taqdirlangan 55-sonli maktab direktori Davron Arikov. – Kamtarona mehnatim shu qadar yuksak baholangani meni yanada ruhlantirdi, shu qatorda masʼuliyatimni ham oshirdi. Bundan keyin ham davlatimizning ishonchini oqlash uchun yanada koʻproq mehnat qilamiz.

Mamlakatimizda istiqlol yillarida boshqa sohalar kabi taʼlim tizimi ham tubdan isloh qilindi. Yosh avlodni barkamol, keng tafakkurga ega, bilimli va har tomonlama yetuk insonlar qilib voyaga yetkazish davlat va jamiyatning ustuvor vazifalaridan biri boʻlib kelmoqda hamda bu ishlar izchillik bilan davom ettirilmoqda. "2017-2021-yillarda Oʻzbekiston Respublikasini rivojlantirishning 5 ta ustuvor yoʻnalishi boʻyicha Harakatlar strategiyasi”da ham taʼlim tizimiga alohida ahamiyat bergan.

Umumiy oʻrta taʼlim maktablarida shu oʻquv yilidan boshlab 10-sinflarning tashkil etilgani hamda bayram arafasida mamlakatimizda Maktabgacha taʼlim vazirligi tashkil etilgani Harakatlar strategiyasida belgilab berilgan islohotlarning amaliy natijasidir.

Tadbir davomida tuman Madaniyat boʻlimi xonandalarining kontsert dasturi namoyish etildi.

Ozoda Xudoyberganova,