Imkoniyati cheklanganlarga yangi uy-joylar topshirildi

Yurtimiz boʻylab mustaqillik bayrami nafasi kezib yurgan shu kunlarda tumanimizda yana bir quvnochli voqea – Prezidentimiz qarori asosida yangilangan namunaviy loyihalar boʻyicha qurilgan dastlabki arzon uy-joylar foydalanishga topshirildi. Yana ham quvonarlisi, ushbu uy-joylarning dastlabki egalari davlatimiz va hukumatimizning alohida gʻamxoʻrligidagi imkoniyati cheklangan yurtdoshlarimiz boʻldi.

Inson omiliga yuksak eʼtibor qaratilayotgan davlatimizda jamiyatning barcha toifasi vakillari qatori imkoniyati cheklangan kishilarga ham alohida gʻamxoʻrlik koʻrsatilmoqda. Oʻzbekiston Respublikasi Prezidentining 2017-yil 1-avgustdagi "Nogironlarni davlat tomonidan qoʻllab-quvvatlash tizimini yanada takomillashtirish chora-tadbirlari toʻgʻrisida”gi farmoyishi bu boradagi ishlarni yangi bosqichga koʻtardi.

Endilikda Prezidentimiz tashabbusi bilan uy-joyga ega boʻlmagan ehtiyojmand fuqarolar ayniqsa, xotin-qizlarni qoʻllab-quvvatlash boʻyicha qator amaliy ishlar qilinmoqda. Jumladan, uy-joyga ehtiyojmand nogironlarning yangilangan loyihalar asosidagi arzon uy-joy olishlari uchun boshlangʻich badal pulining toʻlab berilayotgan ulari uchun katta sovgʻa boʻlmoqda.

Prezidentimizning 2016-yil 21-oktyabrdagi "2017-2021-yillarda qishloq joylarda yangilangan namunaviy loyihalar boʻyicha arzon uy-joylar qurish dasturi toʻgʻrisida”gi qaroriga asosan tumanimizning Tosh-yop ovuli hududida 2 qavatli, har biri 16 xonadonli 2 ta turar joy qurilishi boshlanib, mustaqilligimizning 26 yillik bayrami arafasida qurib bitkazilgan edi.

Mana shu koʻp qavatli uydagi xonadonlarning 4 tasi tumanimizda istiqomat qilayotgan imkoniyati cheklangan yurtdoshlarimizga tantanali ravishda topshirildi.

Oʻzbekiston Respublikasi prezidentining davlat maslahatchisi Tursunxon Xudoybergenov, Qoraqalpogʻiston Respublikasi Joʻqorgʻi Kengesi raisi Musa yerniyazov va boshqalar nogironlarga tantanali ravishda uy-joy topshirish boʻyicha oʻtkazilgan marosimda ishtirok etib, yurtimizda Prezidentimiz Shavkat Mirziyoyev rahbarligida xalq bilan muloqot qilib, odamlarning dardu tashvishlariga sherik boʻlish, ularning muammolarini hal qilish boʻyicha tizimli ishlar amalga oshirilayotganini taʼkidlab oʻtdilar. Ayniqsa, aholining ijtimoiy himoyaga muhtoj qatlami, kam taʼminlangan va koʻp bolali oilalar, nogironlar va imkoniyati cheklanganlarning hayotda oʻz oʻrnini topishlari uchun keng imkoniyatlar yaratib berilmoqda.

Birgina misol – nogiron ayol-qizlarni qoʻllab-quvvatlash maqsadida Prezidentimiz topshirigʻiga asosan mehnat qilish imkoniyati boʻlgan xotin-qizlarga "Paxtasanoat" uyushmasi hududiy boʻlimlari tomonidan zamonaviy tikuv mashinalari berildi. Endilikda tikuv mashinalari egalari "Paxtasanoat" uyushmasi hududiy filiallari bilan tuzilgan shartnoma asosida paxta terish uchun etaklar, qoʻlqoplar, urugʻlik solinadigan qopcha, maxsus ish kiyimlari va sohada zarur boʻlgan boshqa mahsulotlar yetkazib beradi. Ularning ish haqi oldindan toʻlab beriladi. Oʻn mingdan ortiq etak tikkan tikuvchilarga arzon uylardan sotib olishlari uchun yetadigan badal puli – 10 million soʻm mablagʻ plastik kartochkalariga oʻtkazib beriladi. Shuningdek, mahsulot tayyorlash uchun zarur boʻlgan mato va ip paxta tozalash korxonalari tomonidan yetkazib beriladi. Bu imkoniyat nogironlar uchun daromad manbalarini shakllantirish va foydali ish bilan mashgʻul boʻlib, ijtimoiy hayotda oʻz oʻrnini topishlarida muhim ahamiyat kasb etadi.

Tadbirda 4 nafar yurtdoshlarimizga yangi uylarning kalitlari tantanali ravishda topshirildi. Aytish kerakki, ushbu xonadonlarda uy egalari uchun barcha sharoitlar yaratilgan. Koʻp kvartirali uylarni qurishda kvartiralar egalarining extiyojlarini qondirish maqsadida hovlida joylashtiriladigan imoratlar — bolalar maydonchalari, dam olish uchun ayvonlar, dush va boshqalar barpo etish hamnazarda tutilgan.

Yangi xonadonlar egalari bunday gʻamxoʻrlik va eʼtibor uchun Prezidentimizga katta minnatdorchilik izhor qildilar. Oʻzlarining fidoyi mehnatlari bilan davlatimiz va jamiyatimiz rivojiga munosib hissa qoʻshajaklarini taʼkidladilar.

Ushbu mavzuga oid fotolavhalar bilan quyidagi manzilda tanishishingiz mumkin.

Gʻ.Yeshniyozov.