HAR KUNI BIR IJOBIY OʻZGARISh
Ertangi kunini xotirjam, koʻngli toʻq, osoyishta qarshi olgan odamga yashash juda qadrli va aziz tuyuladi. Bu hisni, ayniqsa, keksayganingizda chuqur sezar ekansiz.
Bizning "Kangli” ovulimizda istiqlol yillarida juda koʻp xayrli ishlar amalga oshirildi. Mustaqilligimizning 26 yilligi arafasida buningdek bunyodkorlik, yaratuvchanlik ishlari avj olayotganidan biz keksalar juda quvonamiz. Mustahkam ishonch, ertaga bugungidan ham yaxshi va farovon yashashga boʻlgan intilish ovulimizda har kuni bir xayrli oʻzgarishlarga omil boʻlayotir.
Shu yilning 16 iyulidan "Xalq banki” tuman filiali xodimlari oʻzlariga ajratilgan maxsus xonada belgilangan jadvalga muvofiq pensiya pullarini tarqata boshladi. Hamma tinch, xotirjam pensiyalarini olayotganidan xursand.
"Qangli” ovul fuqarolar yigʻini maʼmuriy binosi yaqinida profilaktika inspektori uchun besh xonali uy binosi qurilishi boshlandi. Bino Yurtboshimiz taʼkidlaganlariday, shu el odamlariga el boʻlib yashab, tinch-osoyishtaligini koʻz qorachigʻiday asrashga xizmat qiladigan ichki ishlar xodimiga beriladi, albatta.
Ovul hududidagi 79-sonli maktab binosiga qoʻshimcha uch xona qurilayapti. Maktab sinfxonalarining kengayishi oʻquvchilarga taʼlim berishda yangi imkoniyatlar ochishi bilan bizni quvontiradi.
Ovulning tadbirkor va intiluvchan oʻgʻloni Yarashboy Otajonov oʻz mablagʻi hisobidan 5 xonali xususiy doʻkon binosini qurib bitkazib, elga xizmat koʻrsata boshladi.
Mamlakatimiz boʻylab qishloq vrachlik punktlari optimallashtirilganida, bizning ovulimizda joylashgan "Qangli” QVP shahar markazidan ancha olisda boʻlganligidan faoliyati saqlab qolindi.
Biz keksalar buning uchun soha va tuman rahbarlariga oʻz minnatdorchiligimizni bildiramiz. Chunki biz istiqlolga erishilmasidan ilgari dala mehnatkashlariga faqat ishchi kuchi sifatidagina qaralgan, insoniy qadr-qimmati, uning sogʻligi haqida hech kim oʻylab ham koʻrmagan davrlarni ham boshimizdan oʻtkazganmiz. Shuning uchun ham Yurtboshimizning xalq bilan muloqot qilib, turmushidagi muammolarini oʻrganib, ijobiy hal qilib, hayotdan rozi boʻlib yashashlariga intilayotganini oʻylaganimizda boshimiz koʻkka yetadi. Keksaygan chogʻimizda boʻlsa-da, shunday kunlarga yetkazganiga shukurlar aytib, yurtimiz ertasi bugunimizdan-da porloq boʻlishini tilab, duolar qilamiz.
Barcha yurtdoshlarimizni yaqinlashib kelayotgan mustaqilligimizning 26 yilligi bilan butun ovulimiz keksalari nomidan tabriklayman.
Oʻrozboy TOJIYeV,
77 yoshli pensioner, Qangli ovuli.
(Foto - http://qalampir.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
