KASB BAYRAMINGIZ MUBORAK BOʻLSIN!

XIX asr oxiri – XX asr boshlarida siyosatchilar orasida "Dunyoni kim boshqaradi?” degan savolga "Kim temir yoʻlga egalik qilsa, oʻsha boshqaradi” degan javob berilar edi. Bugun esa bu savolga "Kim axborotga egalik qilsa, oʻsha dunyoni boshqaradi”, deb javob berilmoqda. Darhaqiqat, halqning nuqtai nazari har qanday demokratik davlatdagi ijtimoiy-siyosiy barqarorlikka bevosita taʼsir oʻtkazadigan hozirgi davrda ommaviy axborot vositalarining jamoatchilik fikrini shakllantirishdagi oʻrni va ahamiyatini hech narsa bilan qiyoslab boʻlmaydi.

Tuman hokimligi bugungi kunning mana shunday talablaridan kelib chiqqan holda tumanimizdagi ommaviy axborot vositalari tahririyatlarini har tomonlama qoʻllab-quvvatlab, ularning yanada rivojlanishi uchun barcha sharoitlarni yaratmoqda. Natijada ilgari faqat vaqtli matbuot nashrini chop qilish va tarqatish bilan shugʻullangan tuman gazetasi tahririyati endilikda miqdor va mazmun jihatdan keng koʻlamli ishlarni amalga oshirmoqda. Keyingi yillarda tuman hokimligining amaliy yordamlari bilan "Taraqqiyot koʻzgusi” gazetasi tahririyatining moliyaviy ahvoli yaxshilandi, moddiy-texnika bazasi kuchaydi. Gazetaning adadi sezilarli darajada oshib, davriyligi ilova nashri – "Mening oilam” gazetasi bilan birga oyiga 4-martaga yetkazildi va qamrov hududi kengayib, tumanimizning barcha ovul va mahallalariga kirib bormoqda.

2010-yilda faoliyatini boshlagan Amudaryo televideniyesi tahririyati bugun haqli ravishda tumanimiz ahlining olqishi va hurmatiga sazovor boʻlib kelmoqda. Har haftada 5 kun, kuniga 10 soat efirga uzatilayotgan telekanal dasturlari orasidan joy olgan informatsion, ijtimoiy-iqtisodiy, madaniy-maʼrifiy, musiqiy-koʻngilochar yoʻnalishdagi koʻrsatuvlar teletomoshabinlarga manzur boʻlmoqda. Raqamli televideniyega bosqichma-bosqich oʻtish rejasiga asosan yaqin yillarda sevimli kanalimiz teledasturlarini raqamli formatda efirga uzatish yoʻlga qoʻyiladi. Bu esa teledasturlarning tarqatilish hududini, shu bilan birga tahririyat imkoniyatlarini yanada kengaytiradi.

"Taraqqiyot koʻzgusi” gazetasining ijtimoiy-ommabop yoʻnalishdagi "Mening oilam” ilovasi chop qilinayotganiga endigina 3-yildan ortiqroq vaqt boʻlgan boʻlishiga qaramasdan, gazeta mushtariylar koʻnglidan chuqur joy olishga ulgurdi. Tahririyat xodimlari hayotiy va qiziqarli maqolalari orqali jamiyatning muhim boʻgʻini boʻlmish oilani koʻz qorachigʻidek asrash, farzandlarimizni komil insonlar qilib tarbiyalash, yoshlarni vatanparvarlik, milliy urf-odat va anʼanalarga hurmat ruhida voyaga yetkazish, jamiyatda tinchlik va barqarorlikni taʼminlashdek masʼuliyatli ishlarga hissa qoʻshib kelmoqda.

"Taraqqiyot koʻzgusi” gazetasi tahririyati” davlat korxonasining tarkibiy boʻlinmasi sifatida bundan 5-yil oldin tashkil qilingan amunews.uz veb-sayti, aytish mumkinki, internet tarmogʻida tumanimizning koʻzgusiga aylandi. Veb-saytdagi 2500 ga yaqin sahifalarda joylashtirilgan maqolalar, foto va video lavhalar tumanimizda roʻy berayotgan yangiliklarni, qoʻlga kiritilayotgan yutuqlarni, amudaryoliklarning bugungi hayotini Oʻzbekiston va jahon miqyosida internet foydalanuvchilari eʼtiboriga yetkazmoqda.

Joriy yilda "Taraqqiyot koʻzgusi” gazetasi tahririyati yana bir katta loyihani amalga oshirdi – tumanimizda yana bir ommaviy axborot vositasi – "Jayxun sadosi” internet-radiosi ish boshladi. www.jayxun-sadosi.uz veb-sayti orqali uzatilayotgan tezkor yangiliklar, dolzarb mavzulardagi eshittirishlar, maʼnaviy-maʼrifiy, madaniy-koʻngilochar yoʻnalishdagi dasturlar tinglovchilarga manzur boʻlmoqda.

Tahririyat yaqin kelajakda oʻz dasturlarini FM toʻlqinlari orqali tarqatishni rejalashtirmoqda. Bu esa internetga ulanish imkoniyatiga ega boʻlmagan tinglovchilarga ham oddiy radio qabul qilgich uskunalari orqali radio-eshittirishlarni tinglash imkoniyatini taqdim etadi.

2015-yilda "Taraqqiyot koʻzgusi” gazetasi tahririyati xodimlari va tumandagi bir guruh faol ijodkorlar tashabbusi bilan "Jayxun ilhomlari” nodavlat notijorat tashkiloti tashkil qilingan edi. Ushbu tashkilot tumanimizdagi shoir va yozuvchilar, jurnalistlar, havaskor shoirlar va havaskor yozuvchilarni, ijodkorlarni qoʻllab-quvvatlash, ularning ijodiy salohiyatlarini roʻyobga chiqarish orqali jamiyatda ijtimoiy-maʼnaviy muhit barqarorligini taʼminlashga hissa qoʻshmoqda. Tashkilot "Taraqqiyot koʻzgusi” gazetasi tahririyati bilan hamkorlikda tashkil qilingan, 4 mingdan ortiq kitob fondiga ega kutubxona orqali esa yoshlarning maʼnaviyatini, dunyoqarashini yuksaltirishga hissa qoʻshmoqda. Shu kungacha 600 nafardan ortiq yoshlarimiz mazkur kutubxonaga aʼzo boʻlgani, kitob fondi va kitobxonlar safining kun sa-yin ortib borayotgani yanada quvonarli holdir.

Shunisi quvonarliki, ommaviy axborot vositalari tahririyatlari hamda nodavlat notijorat tashkiloti aʼzolari bir necha marta Oʻzbekiston Respublikasi Oliy Majlisi huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondining grant tanlovlarida gʻolib boʻlib, aholining huquqiy savodxonligini oshirish, tibbiy va sanitariya madaniyatini yuksaltirish, jamiyatda totuvlik va hamjihatlik muhitini qaror toptirishdek xayrli ishlarga hissa qoʻshib kelmoqda.

Bu kabi yutuq va muvaffaqiyatlar haqli ravishda eʼtirof qilinib, ragʻbatlantirib kelinmoqda. "Taraqqiyot koʻzgusi” gazetasi tahririyati 2010 va 2015-yillarda Oʻzbekiston Jurnalistlari ijodiy uyushmasining Faxriy yorligʻi bilan taqdirlandi. 2014-yilda "Taraqqiyot koʻzgusi” gazetasi mamlakatimizdagi bosma ommaviy axborot vositalari va axborot agentliklari oʻrtasida oʻtkazilgan "Eʼtirof” Respublika tanlovida "Oʻzbekistonning eng yaxshi hududiy gazetasi” deb eʼlon qilindi. Tahririyat xodimlari orasida faxriy unvonlar, davlat mukofotlari sohib va sohibalari bor.

Fursatdan foydalanib, tumanimiz matbuotining ana shunday fidoyilarini, butun mamlakatimizdagi ommaviy axborot vositalarining faol ijodiy va texnik xodimlarini 27-iyun – kasb bayramlari – matbuot va ommaviy axborot vositalari xodimlari kuni bilan chin qalbimdan samimiy tabriklab, kelgusidagi ijodiy ishlarida omad va zafarlar yor boʻlishini tilayman!

Sultonboy YOʻLDAShEV, tuman hokimi.