INSON SOGʻLOM BOʻLSAGINA MUSTAHKAM BILIM EGALLAYDI

Mamlakatimizda insonning shaxs sifatida shakllanishi, kamolotga yetishuvi uchun barcha qonuniy asoslar yaratilgan. Xususan, Bosh Qomusimizning 40-moddasida har bir inson malakali tibbiy xizmatdan foydalanish huquqiga ega ekanligi belgilab qoʻyilgan. Bu huquqiy poydevor mamlakatimiz sogʻlikni saqlash tizimida olib borilayotgan islohotlar samaradorligini oshirish imkonini yaratdi. Yangidan-yangi shifo maskanlarini zamon talabiga mos holda jihozlash, insonlar salomatligini yaxshilash, kasalliklarni oʻrganish va kelib chiqish sabablarini tadqiq etish hamda davolash bilan bogʻliq jarayonlarga ilm-fan yutuqlarini joriy etish masalalari Konstitutsiyamiz oltin qoidalarining hayotdagi ijrosidir.

Mamlakatimizda inson salomatligini mustahkamlash, ayniqsa, onalik va bolalikni tibbiy-ijtimoiy muhofazalash, har bir fuqaroning zamonaviy tibbiy yordamdan bahramand boʻlishini taʼminlashga qaratilgan Prezident Farmon va Qarorlari bu boradagi islohotlarni amalga oshirishda muhim omil boʻlayotir.

Birinchi Prezidentimizning 2014-yil 1-avgustdagi "2014-2018-yillarda Oʻzbekistonda aholining reproduktiv salomatligini yanada mustahkamlash, onalar, bolalar va oʻsmirlar sogʻligini muhofaza qilish borasidagi davlat dasturi toʻgʻrisida”gi Qarori esa bu yoʻnalishdagi ishlarni yangi bosqichga olib chiqdi. Prezidentimiz Sh.M.Mirziyoyev rahnamoligida tibbiyot tizimini isloh qilish borasida olib borilayotgan ishlar, ayniqsa, aholiga shoshilinch tibbiy yordam koʻrsatish sohasini tubdan takomillashtirish sari muhim qadam boʻldi. Prezidentimizning 2017-yil 16-mart kungi "Shoshilinch tibbiy yordamni yanada takomillashtirish chora-tadbirlari toʻgʻrisida”gi Farmoni, 2017-yil 1-aprel kungi "Sogʻlikni saqlash sohasida xususiy sektorni yanada rivojlantirish chora-tadbirlari toʻgʻrisida”gi Qarori xalqimizga malakali tibbiy xizmat koʻrsatishni yanada rivojlantirishga xizmat qiladi.

Konstitutsiyamizning 41-moddasida "Har kim bilim olish huquqiga ega. Bepul umumiy taʼlim olish davlat tomonidan kafolatlanadi. Maktab ishlari davlat nazoratidadir”, deyilgan. Asosiy Qonunimizda oʻz ifodasini topgan bu normalarning "Taʼlim toʻgʻrisida”gi Qonun, "Kadrlar tayyorlash Milliy Dasturi”da tashkiliy-huquqiy mexanizmi belgilab berilganki, xuddi ana  shu huquqiy asoslar tufayli mamlakatimizda uzluksiz taʼlim tizimi yaratilib, iqtisodiyotimizning barcha sohalari uchun oliy va oʻrta maxsus maʼlumotga, kasb-hunarga, yuqori saviyadagi bilimga ega boʻlgan mutaxassis kadrlarni tayyorlash va ularni ish bilan taʼminlash yoʻlga qoʻyilgan.

Shuni alohida taʼkidlash joizki, bilim olish huquqini biron bir shaklda cheklash tegishli javobgarlikni keltirib chiqaradi. Taʼlim toʻgʻrisidagi qonun hujjatlarida boshqa davlat fuqarolari, fuqaroligi boʻlmagan shaxslar ham respublikamizdagi taʼlim maskanlarida oʻzlari tanlagan yoʻnalishlar boʻyicha bilim olishlari mumkinligi nazarda tutilgan. Bosh Qomusimizda belgilab qoʻyilgan normalarga koʻra, tili, yoshi, irqi ijtimoiy mavqei, mamlakatimiz hududida qancha vaqt yashashidan qatʼiy nazar, har bir insonga bilim olishda teng huquqlar kafolatlanadi.

Xulosa qilib aytganda, insonning eng avvalo, sogʻlom, barkamol shaxs sifatida kamolotga yetishini taʼminlashda sifatli tibbiy xizmat va bepul umumiy taʼlim  borasidagi Konstitutsiyaviy normalarning hayotga izchil tatbiq etilishi jamiyatda nafaqat siyosiy, balki iqtisodiy oʻzgarishlar yasash imkonini beradi.

Otabek EShChANOV,

Amudaryo qishloq xoʻjalik kasb-hunar kolleji direktorining maʼnaviy-maʼrifiy ishlar boʻyicha oʻrinbosari.

(Foto - OʻzA)