SAYYoR QABUL OʻTKAZILDI

Yurtimizda muhtaram Prezidentimiz Shavkat Mirziyoyev rahbarligida inson manfaatlarini taʼminlash, odamlar bilan muloqot qilish, ularning dardu tashvishlari, orzu-niyatlari, hayotiy ehtiyojlarini oʻrganish va mavjud muammolarini hal qilish borasida tizimli ishlar amalga oshirilmoqda. Prezidentimiz tashabbusi bilan tashkil etilgan Xalq qabulxonalari hamda virtual qabulxona bu yoʻlda muhim vosita boʻlmoqda. Ularga kelib tushgan murojaatlarni tahlil qilish va joyida hal qilish maqsadida 5-iyun kuni tuman hokimligida sayyor qabul oʻtkazildi.

Sayyor qabulda Oʻzbekiston Respublikasi Prezidentining Davlat maslahatchisi T.Xudoybergenov, Oʻzbekiston Respublikasi Oliy sudi, Bosh prokuratura, qator vazirliklar, davlat va jamoat tashkilotlari mutasaddilari ishtirok etib, Oʻzbekiston Respublikasi Prezidentining Xalq qabulxonasi va virtual qabulxonaga yoʻllangan murojaatlar mualliflari bilan shaxsan muloqot qildi.

Murojaatlarning aksariyat qismi mazmuni Oʻzbekiston Respublikasi fuqaroligini olish, ish bilan bandlik, pensiya, moddiy yordam va ijtimoiy nafaqalarning toʻlanishi, elektr energiyasi, tabiiy gaz, ichimlik suvi taʼminotidagi uzilishlar, tibbiy xizmat, savdo va maishiy xizmat koʻrsatish sifatini yaxshilash, qurilish uchun yer ajratish, yoʻl va koʻpriklarni taʼmirlash borasidagi muammolardan iborat.

Sayyor qabul davomida aholi tomonidan koʻtarilgan muammolarning ayrimlari shu yerning oʻzida yechimini topdi.

Xususan, "Besh-ovul” mahallasida yashovchi fuqaro S.Altiyev Toshkent shahri Mirzo Ulugʻbek tumaniga ishga borganida, tegishli tartibda vaqtinchalik roʻyxatda turgan boʻlishiga qaramasdan, IIB xodimlari tomonidan unga huquqbuzar sifatida bayonnoma rasmiylashtirilgan. Ichki ishlar vazirligi xodimlari bilan muloqot davomida hodisa atroflicha oʻrganilib, haqiqat qaror topdi – ish S.Altiyevning foydasiga hal qilindi.

"Oʻrta-qala” ovulida yashovchi fuqaro B.Anorova oʻgʻli J.Safarbayevning chap yonbosh suyagida oʻsimta paydo boʻlgani sababli ushbu oʻsimtani xorijda jarrohlik yoʻli bilan oldirib tashlash uchun moddiy yordam soʻrab, virtual qabulxonaga murojaat qilgan edi. Sayyor qabul davomida Toshkent shahri onkologiya ilmiy tekshirish institutiga Rossiya federatsiyasidan malakali shifokorlar amaliy yordamga kelishi munosabati bilan J.Safarbayev bepul jarrohlik amaliyotidan oʻtkaziladigan boʻldi.

"Qilichboy” ovulida yashovchi fuqaro A.Rajapov "Shimolgaztaʼminot” unitar korxonasining Amudaryo tumangaz filialiga qarashli Xolimbeg ovulidagi aholiga suyultirilgan gaz ballonlarni tarqatish servis markazida bir qator kamchiliklar mavjudligini bayon qilib, murojaat yoʻllagan edi. Natijada "Xalq banki” tuman filiali tomonidan mazkur servis markazida sayyor kassa tashkil qilindi.

Fuqaro B.Bozorbayevning qish mavsumida tabiiy gaz bosimi past boʻlishi haqida, J.Xaytimbetovning A.Yassaviy koʻchasida joylashgan xonadonlarni ichimlik suvi bilan taʼminlash boʻyicha yozgan murojaatlari, shuningdek, 1-guruh nogironi J.Sultonovning moddiy yordam soʻrab yozgan arizasi, kasb-hunar kollejini tamomlagan fuqaro N.Haytakovaning ishga joylashish toʻgʻrisidagi, fuqarolar J.Oʻrazimbetov va R.Sariboyevlarning nogironlik aravachasi olishda amaliy yordam soʻrab qilgan murojaatlari ijobiy yechimini topib, qanoatlantirildi.

Sayyor qabul davomida jismoniy shaxslar va yuridik shaxslarning vakillari tomonidan yoʻllangan hech bir murojaat javobsiz qolmasligi, ariza, taklif va shikoyatlar tegishli tartibda oʻrganib chiqilib, qonuniy muddatda javob qaytarilishi, bu masala shaxsan muhtaram Prezidentimizning nazoratida ekanligi qayd qilindi.

Tuman hokimligining axborot xizmati.