“Ota-onalar universiteti” aʼzolari uchun oʻquv seminari

24-aprel kuni "Mahalla” xayriya jamoat fondi tuman boʻlinmasi tomonidan Fuqarolar yigʻini huzuridagi "Ota-onalar universiteti” rahbarlari, aʼzolari, mahalla faollari uchun  ushbu tuzilmaning faoliyati samaradorligini oshirish maqsadida oʻquv seminari oʻtkazildi.

Mamlakatimizda  oilalar farovonligini taʼminlash, oila muammolarini oʻrganish, uning maʼnaviy va iqtisodiy asoslarini mustahkamlash, sogʻlom va barkamol avlodni voyaga yetkazish, onalik va bolalikni himoya qilish boʻyicha keng koʻlamli ishlar amalga oshirilmoqda,mazkur muhim masalaga jamoatchilikning eʼtibori va imkoniyatini safarbar etish masalasiga alohida eʼtibor qaratilmoqda.

Ayniqsa, mustahkam va baxtli oila qurishga yigit-qizlarni yoshlikdan tayyorlash, oila muhitida hamda taʼlimning barcha bosqichlarida bu ishlarni izchil amalga oshirish mamlakatimizda bu borada olib borilayotgan siyosatning naqadar istiqbolga qaratilganligini koʻrsatadi.

Shuningdek, mustahkam oilani shakllantirish, oilalarda maʼnaviy muhit barqarorligini taʼminlashda ota-onalar orasida ham tushuntirish va targʻibot ishlarini amalga oshirish, ota-onalarning oilani aql bilan boshqarish hamda farzand tarbiyasi borasida muntazam bilimlarini oshirib borish dolzarb masala hisoblanadi.

Fuqarolar yigʻini huzuridagi "Ota-onalar universiteti” mahalla hududidagi oilalarning yosh avlodni tarbiyalash boʻyicha huquqiy, maʼnaviy-axloqiy, psixologik-pedagogik va fiziologik bilimlarini oshirishga koʻmaklashuvchi jamoatchilik tuzilmasi hisoblanadi.  Joriy yilning oʻtgan davrida mazkur tuzilma tomonidan muayyan ishlar amalga oshirildi. Jumladan,  ota-onalarning farzand tarbiyasi borasidagi huquqiy bilimlarini oshirish boʻyicha 38-marta,  maʼnaviy-axloqiy bilimlarini oshirish boʻyicha 31 marta,  psixologik-pedagogik va fiziologik bilimlarini oshirish boʻyicha 24-marta mashgʻulotlar olib borildi.

Oʻquv seminari oilalarni mustahkamlash, farzand tarbiyasi ilmini egallashda ota-onalarda farzand tarbiyasiga masʼullik va javobgarlik hissini kuchaytirish, yosh avlodni tarbiyalash boʻyicha huquqiy, maʼnaviy-axloqiy va fiziologik bilimlarini oshirish, tuzilma rahbari va aʼzolari masʼuliyatini kuchaytirish, bu borada ilgʻor tajribalarni ommalashtirish maqsadida tashkil qilindi.

Mazkur seminarda «Ota-onalar universiteti» rahbarlari va mahalla maslahatchilari, "Qaynonalar kengashi” rahbarlari ishtirok etdilar. Unda jamoatchilik tuzilmasining mahallada ijtimoiy-maʼnaviy muhit barqarorligini taʼminlashdagi ahamiyati, uning imkoniyatlaridan samarali foydalanishda ijtimoiy hamkorlik masalalari, ota-onalarning farzand tarbiyasi borasidagi bilimdonligi – oilada maʼnaviy muhit barqarorligi taʼminlash va oilalarni mustahkamlashning muhim omili ekanligi kabi mavzular boʻyicha keng tushuntirishlar berildi.

Bundan tashqari, dunyoning ayrim mintaqalarida turli qarama-qarshiliklar va mojarolarning kuchayib borayotganligi, barqarorlik va xavfsizlikka tahdid solayotgan turli yot va buzgʻunchi gʻoyalarning maqsadi, jamiyatimiz hayotiga turli yoʻllar bilan singdirishga qaratilgan urinishlarning mazmun-mohiyati hamda mahallalarda aholiga, birinchi navbatda, yoshlarning maʼnaviy olamini yuksaltirish, ularni ona Vatanga yuksak muhabbat, milliy va umuminsoniy qadriyatlar ruhida tarbiyalash, qalbi va ongida mafkuraviy immunitetni yanada kuchaytirish borasida universitet aʼzolari oldida turgan dolzarb vazifalarga atroflicha toʻxtalib oʻtildi.

(Foto - terdu.uz)