KOʻChAT EKIShDA HIKMAT KOʻP

Dunyoda turfa millatlar, elatlar koʻp. Lekin hamma el-u elatlar, millatlar uchun Alloh tomonidan bekam-u koʻst tabiiy sharoit yaratilmagan.

Men juda koʻp ellarni koʻrdim. Zaminida bir tup daraxt oʻsmaydigan xalqlarning ham oʻzlari tugʻilib-oʻsgan zaminga cheksiz mehr-muhabbat qoʻyib yashayotganlariga guvoh boʻlganman. Shular haqida oʻylaganimda jannatmakon yurtimizning har bir qarich yerini koʻzlarga toʻtiyo qilish, har bir giyohi, har tup daraxtini jon qadar asrash ham iymondan, degim keladi. Farzandlarim, nevaralarim bilan har yili ikki  marta – kuzda va bahorda ariq va yoʻl boʻylariga, bogʻ-rogʻlarimizga turfa daraxt va gul koʻchatlarini ekamiz. Aslida koʻchat ekish – bobomeros qadriyatlardan. Ota-bobolarimiz oilada yangi farzand dunyoga kelganida, farzandlar, oila aʼzolari muchal yoshlariga yetganlarida mevali daraxt koʻchatlari ekishgan. Bu udumda olamjahon hikmat, ramziy maʼno bor: yangi tugʻilgan goʻdak oila shajarasiga mustahkam ildiz otsin, mevalari koʻp daraxtday oʻzidan koʻpaysin, degan maʼnoda chaqaloqqa atab koʻchat ekiladi. Bir muchal yoshiga yetgan bola uchun 12 ta, ikki muchal yoshini toʻldirganda 24 ta koʻchat ekilgan. Bu holat insonning  tabiat bilan uygʻunligini, bunday  uygʻunlik oilaga toʻkin-sochinlik baxsh etishini bildiradi. Qolaversa, atrofimizda dov-daraxtlar qanchalik koʻp boʻlsa, yashil  olam tarovatidan koʻngillar yayraydi, hayotimiz fayzli, turmushimiz farovon boʻladi.

Men koʻpni koʻrgan keksa avlod vakili sifatida judayam shukr qilamanki, bizning yurtimizday jannatmakon zamin yer yuzida juda kam. Borlari ham Oʻzbekiston tabiati kabi fusunkor emasday, nazarimda. Shuning uchun ham aziz yoshlarimizga:

– Bolalarim, har bahorda hech boʻlmaganda, toʻrttagina koʻchat eking, kelasi yil shu koʻchatlar yoniga yana toʻrtta koʻchat, keyingi yillarda yana va yana ekavering, – deyman – Har bir tup daraxt, avvalo yurtimiz tabiatini boyitadi. Vatanga koʻrk, dillarga goʻzallik, turmushimizga farovonlik bagʻishlaydi.

Abdukarim hoji Toʻrayev,

"Arna boʻyi” mahallasi.