Umidaning rejalari koʻp

2015 yil oxirida Qilichboy ovulining "Xizr eli” mahallasi hududida tender asosida 60 gektar ekin maydonida fermer xoʻjaligini tashkil etish huquqini qoʻlga kiritgan Umida Qurbonboyeva avval ishni nimadan boshlashni bilmay, oʻylanib qoldi, zimmasiga qanchalik ulkan masʼuliyat olganini endi aniq his qildi. Axir 35 gektar paxta, 10 gektar gʻalla, 1,5 gektar bogʻ, sabzavot va poliz ekinlaridan koʻzlanganiday hosil olish,pudratchilarning mehnatiga yarasha oʻz vaqtida oylik maoshlarini berib borish lozim. Buning ustiga zimmasida 20 nafardan ortiq ishchi mehnat qilib, hududdagi 42 ta fermer xoʻjaligi ekin maydonlarini zararkunandalardan himoya qilish uchun biomahsulot ishlab chiqaruvchi biolaboratoriya rahbarligi ham yelkasida.

Koʻz qoʻrqoq, qoʻl botir ekan. Bir umr qishloq xoʻjaligida brigada boshligʻi, agronom va boshqa lavozimlarda ishlab, ulkan tajriba toʻplagan otasi Zarifboy Qurbonboyevning,biolaboratoriyada ishlagan onasi Toʻlgʻonoy opaning yoʻl-yoʻriqlari, maslahatlari asosida ish yuritgan yosh fermer qizning mehnatlari zoye ketmadi. 2016 yilda 10 gektar maydondan 25 tonna gʻalla, 35 gektar maydondan 130 tonna paxta yetishtirilib, hosildorlik koʻzlanganidan ancha yuqori boʻldi. "Zarifboy - Toʻlgʻonoy” fermer xoʻjaligining ham, pudratchilarning ham daromadi yaxshi boʻldi.

Intiluvchan, yangilikka oʻch fermer qizning bu yilgi koʻzlayotgan rejalari esa yana ham yuksak: fermer xoʻjaligini koʻptarmoqli xoʻjalikka aylantirish, asalarichilikni, baliqchilikni va hudud aholisiga maishiy xizmat koʻrsatish shoxobchalarini tashkil etish.

– Fermerlik – fidoyilik, degani ekan. Buni oʻz hayotimda koʻrmoqdaman, ham hisobchi, traktorchi, hatto baʼzan hasharchilarga tushlik tayyorlaydigan oshpaz ham boʻlaveraman, – deydi Umida kulib.

Kichkinagina jussasiga olamcha gʻayrat-shijoat jo boʻlgan, intiluvchan qiz Umidaning suhbatlariga quloq tutgan kishi bir olam taassurotlar oladi. Yurtimizda yosh tadbirkorlarga, fermerlarga koʻrsatilayotgan eʼtibor, gʻamxoʻrlik oʻz mevalarini berayotganidan quvonadi.

Oygul RAJABOVA.

Suratda: yosh fermer Umida Qurbonboyeva.