BOLAGA EʼTIBOR – KELAJAKKA EʼTIBOR

...Bu yorugʻ dunyoda hayot bor ekan, oila bor. Oila bor ekan, farzand deb atalmish bebaho naʼmat bor. Farzand bor ekan, odamzot hamisha ezgu orzu va intilishlar bilan yashaydi, deb yozgan edilar muhtaram Birinchi Prezidentimiz I.Karimov.

Ha, ota-ona borki, bolam, deb yashaydi, borini bolasiga atab, uning barkamol inson boʻlib voyaga yetishiga intilib, yaxshi kunlarini koʻrish umidida yashaydi, mehnat qiladi. Xalqimizning buningdek bolajonligi davlatimiz siyosatida ham oʻz aksini topgan. Xususan sogʻlom ona – sogʻlom bola tamoyilini amalga oshirishdan koʻzlangan maqsad ham mamlakatimizda oʻsib kelayotgan yosh avlodga beqiyos gʻamxoʻrliklar koʻrsatilishini nazarda tutadi.

Mamlakatimizda oʻsib kelayotgan yosh avlod haqidagi gʻamxoʻrliklar qonunlarimizda, qonun osti hujjatlarida ham oʻz ifodasini topmoqda. Oʻzbekiston Respublikasi Konstitutsiyasining 41-moddasida "Har kim bilim olish huquqiga ega. Bepul umumiy taʼlim olish davlat tomonidan kafolatlanadi.

Maktab ishlari davlat nazoratidadir”, deb belgilangan. 45-moddada esa "Voyaga yetmaganlar, mehnatga layoqatsizlar va yolgʻiz keksalarning  huquqlari davlat himoyasidadir”, deb koʻrsatilgan.

Shuningdek, "Nikohlanuvchi shaxslarni tibbiy koʻrikdan oʻtkazish toʻgʻrisidagi nizomni tasdiqlash haqida”gi Oʻzbekiston Respublikasi Vazirlar Mahkamasining 2003-yil 25-avgustdagi 365-sonli Qarori, "Yod tanqisligi holatlarining oldini olish haqida”gi 2007-yilda qabul qilingan Qonun, "Bola huquqlarining kafolatlari toʻgʻrisida”gi 2008-yil 7-yanvarda qabul qilingan Qonun, "Bolalikdan nogironlar tugʻilishining oldini olish uchun tugʻma va irsiy kasalliklarni barvaqt aniqlash Davlat Dasturi toʻgʻrisida”gi Oʻzbekiston Respublikasi  Prezidentining 2008-yil 18-iyundagi 892-sonli Qarori, "Respublikaning qishloq tumanlarida onalar va bolalarning reproduktiv salomatligini mustahkamlashga doir qoʻshimcha chora-tadbirlar toʻgʻrisida”gi Oʻzbekiston Respublikasi Vazirlar Mahkamasining 2010-yil 22-iyuldagi 156-sonli Qarori ham oʻsib kelayotgan yosh  avlodni ijtimoiy himoya qilishga, barkamol insonlar boʻlib voyaga yetishiga qaratilgan.

Mamlakatimizda inson huquqlari boʻyicha umumeʼtirof etilgan tamoyillar ustuvorligini taʼminlash, bola huquqlariga oid  milliy qonunchilikni takomillashtirishni huquqiy tartibga solish boʻyicha qator qonun, farmon, qaror va boshqa meʼyoriy-huquqiy hujjatlar qabul qilindi. Eng quvonarlisi, mamlakatimizda bola huquqlari va manfaatlarini himoya qilish boʻyicha kompleks huquqiy asoslar yaratildi.

Bir soʻz bilan aytganda, yurtimizda dunyoga kelgan har bir goʻdakning (u hatto ota-onasidan ayrilib qolgan taqdirda ham) begʻam, emin-erkin ulgʻayib  komil inson boʻlib voyaga yetishi, ilm olishi, kasb-hunar egallashi, oʻz iqtidorini namoyon etishi uchun barcha shart-sharoitlar muhayyo.

M.PRIMBETOVA,

tuman FHDYo boʻlimi inspektori.