BIZ DUNYoDA ENG BAXTLI, BADAVLAT YoShLARMIZ

Yoshlar – millat kelajagi. Feʼlidagi joʻshqinligi, intiluvchanlik fazilatlari bilan bunyodkorlik qobiliyatiga ega yoshlarning mamlakat taqdiri va kelajagini yaratuvchi ulkan intellektual salohiyatli kuch sifatida shakllanishi uchun davlat ularni har tomonlama qoʻllab-quvvatlab, oʻz huquq va majburiyatlarini amalda namoyon etishlari uchun qulay shart-sharoitlar yaratib bergandagina yoshlar oʻz ona Vatani uchun bebaho resursga aylanadi. Shu bois, mamlakatimiz  mustaqillikka erishish arafasidayoq, 1991-yilning  boshida "Oʻzbekiston Respublikasida yoshlarga oid davlat siyosatining asoslari toʻgʻrisida”gi Qonun loyihasi tayyorlana boshladi va bu Qonun 1991-yil 20-noyabrda qabul qilindi. Unda iqtidorli oʻgʻil-qizlarni ragʻbatlantirish, yoshlar tadbirkorligini qoʻllab-quvvatlash, yoshlarning oʻqishi, yaxshi sharoitlarda yashab, mehnat qilishi, oilalarini  mustahkamlash, voyaga yetmaganlarni ijtimoiy muhofaza qilish borasidagi oʻta printsipial masalalar oʻz aksini topdi.

Biz yoshlarning har tomonlama barkamol insonlar sifatida kamol topishimiz uchun mustahkam qonunchilik bazasi yaratildi. 22 ta Qonun, 26 ta farmon va qaror, Vazirlar Mahkamasining 41 ta qarori, 30 dan ortiq meʼyoriy-huquqiy hujjatlari, Kadrlar tayyorlash Milliy Dasturi, "Taʼlim toʻgʻrisida”gi, "Jismoniy tarbiya va sport toʻgʻrisida”gi qator Qonunlar qabul qilindi. 2016-yil "Sogʻlom ona va bola yili”davlat dasturining birinchi bandiga muvofiq "Yoshlarga oid davlat siyosati toʻgʻrisida”gi yangi Qonun loyihasi ishlab chiqilib, mazkur Qonunning yangi tahrirda qabul qilinishi mamlakatimiz yoshlari uchun yanada beqiyos imkoniyat va gʻamxoʻrliklar eshigini ochdi. Eng muhimi, Oʻzbekiston Respublikasi Konstitutsiyasi bilan mustahkamlab qoʻyilgan yoshlarning huquq va erkinliklari dunyo mamlakatlari yoshlari havas va hayratiga munosib tarzda yuqori pogʻonaga koʻtarildi.

Bugungi kunda biz yoshlar Bosh Qomusimizning 41-moddasida mustahkamlab qoʻyilgan "Har kim bilim olish huquqiga ega. Bepul  umumiy taʼlim olish davlat tomonidan kafolatlanadi” degan tamoyil asosida umumtaʼlim maktabi hamda akademik  litsey va kasb-hunar kollejlarida tahsil olib, ilm maskanlarida yaratilgan dunyo andozalariga munosib sharoitlardan, imkoniyatlardan bahramand boʻldik. Nafaqat bepul ilm oldik, balki har birimiz oʻz qiziqishlarimiz doirasida kasb-hunar oʻrgandik. Fikrda ilgʻor, dunyoqarashi keng tengqurlarimiz esa tadbirkorlik faoliyati bilan shugʻullanish  uchun oʻz biznes gʻoyalarini himoya qilib, imtiyozli bank krediti asosida tadbirkorlik ishlarini  boshlab yuborishdi. Ilmga chanqoq yuzlab amudaryolik yoshlar taʼlimning  keyingi bosqichi – oliy taʼlim dargohlarida tahsilni davom ettirishmoqda.

Tengdoshlarim qatori men ham Konstitutsiyaviy huquqimdan foydalanib, oliy taʼlim dargohida tahsil olmoqdaman. Oʻzim  qatori mustaqillik tengdoshlari boʻlgan barcha yoshlarni Bosh Qomusimiz – Oʻzbekiston Konstitutsiyasi qabul qilingan kunga 24-yil toʻlishi munosabati bilan samimiy tabriklayman. Baralla aytamanki, biz – Oʻzbekiston yoshlari dunyoda eng baxtiyor, badavlat yoshlarmiz, bizni qoʻllab-quvvatlaguvchi, ezguliklar sari yoʻllab turguvchi aziz  va muqaddas ona Vatanimiz tinch, xalqimiz baxtiyor va farovon boʻlsin!

Feruza QODIROVA,

Toshkent Davlat Agrar Universitetining Nukus filiali talabasi.

(Foto - http://uzbekistonovozi.uz)