SUVDAN OQILONA FOYDALANISh – DAVR TALABI

Ota-bobolarimiz ummon oldida tursang ham bir tomchi suvni isrof  qilma, deb bejiz aytishmagan. Chunki suv hayot manbaidir. Tabiiyki, hayotimizni suvsiz tasavvur qilib boʻlmaydi. Suv – bebaho neʼmat hisoblanadi. Hammaga maʼlumki, yer yuzining 2/3 qismi  suv bilan qoplangan, lekin  bu suvlarning hammasi ham ichimlik suvi hisoblanmaydi. Yer yuzidagi mavjud suvlarning faqat 2 foizigina  ichishga yaroqli boʻlib, qolgan barcha suvlar  dengiz va okean  suvlari, yaʼni ichishga yaroqsiz shoʻr suvlar hisoblanadi.

Bugungi kunda nafaqat ichimlik suvi, balki dehqonchilik uchun foydalaniladigan suv ham dolzarb masalaga aylanib bormoqda.  Chunki yer yuzida kundan-kunga aholi soni ortib bormoqda, qishloq joylarda fermerlar va dehqonlarimiz tomonidan yangidan - yangi ekin maydonlari barpo qilinmoqda. Bu esa suvga boʻlgan talabning yanada ortishini  koʻrsatadi. Suv resurslarini muhofaza qilish, suvning tozaligini saqlash, uning isrof bulishiga yoʻl qoʻymaslik uchun bir qator mamlakatlarda juda katta ishlar olib borilmoqda. 

Oʻzbekiston Respublikasida ham suv resurslarini muhofaza qilishga alohida eʼtibor qaratilmokda. Irrigatsiya tarmoqlari modernizatsiya qilinmoqda, suvdan foydalanishni hisoblash tizimi takomillashtirilmoqda, suvni tejashni iqtisodiy ragʻbatlanirish usullaridan foydalanilgan holda ishlab chiqaruvchilar va aholi oʻrtasida faol tushuntirish ishlari olib borilmoqda. Shuningdek,  fermerlar va qishloq joylarda istiqomat qiluvchi dehqonlarimiz tomonidan,  suvdan oqilona foydalanish maqsadida ekinlarni tomchilab sugʻorish ishlari yoʻlga qoʻyilmoqda.

Tumanimizda ham suv resurslariga boʻlgan talab tobora ortib bormoqda. Tuman tabiatni muhofaza qilish boʻlimi suv resurslaridan oqilona foydanishni aholi va keng jamoatchilik orasida targʻib qilib bormoqda. Suv isrofgarchiligiga yoʻl qoʻygan muassasa, tashkilot rahbarlari va fuqarolar belgilangan tartibda maʼmuriy javobgarlikka tortilmoqda. Shuningdek, isteʼmolchilarga  atrof-muhitda yuz berayotgan  zamonaviy oʻzgarishlar sharoitida qishloq xoʻjalik,  sanoat va ichimlik ehtiyojlari uchun  suv resurslaridan barqaror foydalanish boʻyicha tavsiyalar berilmoqda.