IFTIXOR

Ayni kunlarda yurtdoshlarimiz   eng ulugʻ, eng aziz bayramni    munosib    kutib  olishga    bel  bogʻlaganlar. Yigirma besh  yil mobaynida erishilgan yutuqlar  oʻz-oʻzidan boʻlgani  yoʻq.

Dunyoning  qaysidir goʻshalarida noxush voqealar - inson  zotiga qirgʻin keltiruvchi urushlar, moliyaviy-iqtisodiy inqirozlar yuz berayotgan pallalarda yurtimiz tinchligi, osudaligi  bizning baxtimizdir. Mana shu  tinchlik, osoyishtalikning  tub zamini xalq taqdirining ishonchli qoʻlda ekanida, deb bilaman. 1990-yillardagi  iqtisodiy tanglik, nochorlik onlarida tushkunlikka tushmasdan, xalqni eng toʻgʻri yoʻlga boshlab, bu mashaqqatlarni  bartaraf etishda Yurtboshimiz xalqimizga madadkor boʻldilar.

Yurtimizda yuz berayotgan muvaffaqiyatlarning bosh kaliti tinchlik va  osudalikdir. Urushlarsiz, tahlika va qoʻrquvsiz yashagan odam ulugʻ bunyodkorlik  ishlarini  qila  oladi.

Kunduzgi mehnatdan keyin orom beruvchi hordiq–uyqumiz tinch. Sutkaning yigirma toʻrt soatida qaerga borsak ham  hech  narsadan  hadiksiramaymiz. Mahallamiz xonadonlarining koʻpchiligida qulf-kalit yoʻq. Yurt tinchligining yana bir asosiy sababi – bizning ming-ming yillik  qadriyatlarimizdir.

"Hayot  bor  ekan, davlat, el-yurt  bor ekan,  shu  erkin, osuda hayotni  koʻrolmaydigan, hasad va fitna bilan yashaydigan, zoʻravonlik bilan oʻz hukmronligini oʻrnatishga, xalq tinchini buzishga urinadigan yovuz kuchlar hamisha boʻladi”, - deydi Yurtboshimiz. Shuning uchun butun Oʻzbekiston xalqiga ushbu daʼvat bilan murojaat etadiki, bu daʼvat har birimizning ong-shuurimizga jo boʻlmogʻi kerak. Yaʼni "Oʻz uyingni oʻzing asra, oʻz yurtingni oʻzing  himoya qil”.

Shonli-sharafli oʻtmishimizdan oziq olayotgan zamondoshlarimiz tinchlik yoʻlida Prezidentimiz bilan, yurt posbonlari bilan sobitqadamdirlar. Maʼrifatli insonlar Vatan erki uchun kurashgan Toʻmarisni, Shiroqni, Jaloliddin Manguberdini, oʻz muhriga "Kuch – adolatdadir”, deb yozdirib qoʻygan Amir Temurni, "Kishan kiyma, boʻyin egma, Ki sen ham  hur tugʻilgʻonsen”, deya xitob qilgan Choʻlponni yaxshi biladilar. Va bu qadim ildizlardan kuch-quvvat oladilar.

"Oʻgʻlon degan soʻz bilan oʻgʻil degan soʻzning  farqi bor. Oʻgʻlon  degan soʻzning maʼnosi katta. Yaʼni oʻgʻillarning eng sarasini, mard yigitlarni xalqimiz oʻgʻlon deydi”. Yurtboshimizning ushbu fikrlari qoʻrgʻonimizning tayanchi, xalqimizning suyanchigʻi boʻlgan mard va jasur yigitlari haqida. Alpomish qavmidan boʻlgan dovyurak yigitlarimiz omon boʻlsa, bizning tinchligimizga hech kim daxl qila olmaydi.

Oʻzim orzu qilgan kasb – ustozlik qilish, bolalar bilan, yoshlar bilan ishlash mening taqdirimga aylandi. Faoliyatim jarayonida meni qoniqtiradigan, quvontiradigan bir jihat borki, bu oʻquvchilarim koʻzidagi yalt etgan uchqun. Til aldashi mumkin,ammo insonga koʻrish baxti uchun berilgan koʻzgu kabi aʼzo – koʻz hech qachon alday olmaydi. Bu yalt etgan uchqun bolajonlar qalbidagi hayratdan, ezgulikdan, intilish va qiziquvchanlikdan, baxtdan darakchidir.

Gulshod AHMEDOVA, oʻqituvchi.

(Foto - http://uz24.uz)