BITIRUVChI-YoShLAR PARVOZGA ShAY!

Bu yil tumanimizdagi 76 ta umumtaʼlim maktablarining 9-sinfini 3188 nafar oʻquvchi-yoshlar bitirib, taʼlimning keyingi bosqichi – akademik litsey va kasb-hunar kollejlariga yoʻl oladilar.

Ayni kunlarda umumtaʼlim maktablarida "soʻnggi qoʻngʻiroq” jaranglashini dillarida hayajon va ezgu orzular bilan kutayotgan 9-sinf oʻquvchilarini taʼlimning keyingi bosqichiga toʻliq qamrab olish maqsadida 2015-2016 oʻquv yili davomida aniq va puxta reja asosida ish olib borildi. Yaʼni, oʻquv yili davomida uch marta soʻrovnomalar oʻtkazildi. Bu soʻrovnomalarda 9-sinf bitiruvchilari, ularning ota-onalari, ota-ona oʻrnini bosuvchi shaxslar, sinf rahbarlari, maktab psixologi hamda maktab direktorlari ishtirok etishdi.

Bitiruvchi-yoshlar soʻrovnomalarda oʻz fikrlarini mustaqil bayon etishlari uchun zarur imkoniyatlar yaratildi. Avvalo boʻlimning "2015-2016 oʻquv yilida umumtaʼlim maktablarining 9-sinf bitiruvchilarini akademik litsey va kasb-hunar kollejlariga toʻliq qamrab olinishini taʼminlash boʻyicha qoʻshimcha chora-tadbirlar rejasi” ishlab chiqilib, ushbu rejaga asosan 7-9-sinflarning oʻquvchi-qizlari oʻrtasida "Qiz bolaning kasbi – uning baxti”, "Ilm ol, hunar tanla, Vataning kutar seni”, "Kasb-hunar – qizlar kelajagi”, "Hunarli qiz – yurt kelajagi”, "Bilimli qiz – farishta, hunarli qiz - sarishta” kabi mavzularda davra suhbatlari oʻtkazilib, bu davra suhbatlarida 7-9-sinflarning 4100 nafardan ortiq oʻquvchi-qizlari ishtirok  etdilar. Oʻtkazilgan davra suhbatlarining oʻziyoq bitiruvchi qizlarning va ularning izdoshlari boʻlmish 7-8-sinf qizlarining oʻzlari qiziqqan sohalar boʻyicha zarur maʼlumotlarga ega boʻlishlarida muhim ahamiyat kasb etdi.

Bundan tashqari, oʻquv yili davomida umumtaʼlim maktablari, akademik litsey va kasb-hunar kollejlari bilan hamkorlikda tashkil etilgan "Kasblar festivali”ning  oʻtkazilishi bitiruvchi-yoshlarning oʻzlari tanlagan kasblar va shu kasblar orqali hayotda oʻz oʻrnini topib, mehnat qilayotgan yoshlar hayoti bilan yaqindan tanishish imkonini berdi. Bitiruvchi-yoshlar bilan "Kasblar festivali” doirasida akademik litsey va kasb-hunar kollejlariga sayohatlar uyushtirildi. Bu esa kasb tanlashda ikkilanayotgan yoshlar uchun qoʻshimcha imkoniyat yaratdi, albatta.

Qoraqalpogʻiston Respublikasi Xalq taʼlimi Vazirligining  2015-yil 29 yanvar kungi 24-sonli buyrugʻiga asosan umumtaʼlim maktablarining 9-sinf oʻquvchilari oʻrtasida "Men tanlagan kasbning hayotimdagi oʻrni”, mavzusida insholar tanlovi oʻtkazilgani bitiruvchi-yoshlarning nafaqat oʻzlari orzu qilgan kasb-hunarni tanlashlarida, balki qobiliyat va iqtidorlarini namoyon etishlarida ham muhim omil boʻldi. Insholar tanlovining birinchi bosqichida ishtirok etgan 3100 nafar bitiruvchi-yoshlardan 76 nafari  tanlovning  tuman bosqichida oʻzaro kuch sinashdilar.  Tuman bosqichida gʻolib boʻlgan 3 nafar ishtirokchi koʻrik-tanlovning Qoraqalpogʻiston Respublikasi bosqichida qatnashish huquqiga ega boʻlishdi.

"Taʼlim toʻgʻrisida”gi  Oʻzbekiston Respublikasi Qonuni, Kadrlar tayyorlash Milliy dasturi talablari asosida  umumtaʼlim maktablarining boshlangʻich sinflaridan boshlab taʼlim-tarbiya jarayoniga kompleks yondashish, oʻquvchi-yoshlarni kasb-hunarga toʻgʻri yoʻnaltirish, ularning ongli ravishda kasb tanlashiga imkoniyatlar yaratish va taʼlimning keyingi bosqichiga toʻliq qamrab olish – bugungi kunda har bir ota-ona, ustoz va tarbiyachining, qolaversa, butun xalqimizning eng masʼuliyatli burchidir. Oʻsib kelayotgan yosh avlodni Vatanga sodiq, ona xalqiga, mahallasi va oilasiga, yaqinlariga mehr-oqibatli, bilimga intiluvchan, yaratuvchan, barkamol insonlar qilib tarbiyalash har birimizdan katta masʼuliyat, shu barobarida ijodiy yondashuvni talab etadi. Shu bois, boʻlimimiz tomonidan tuman xotin-qizlar qoʻmitasi, tuman IIB, "Kamolot” YoIH tuman Kengashi, tumanimizda faoliyat olib borayotgan siyosiy partiyalar, "Mahalla” xayriya jamoat  fondi tuman boʻlinmasi, "Nuroniy” jamgʻarmasi tuman boʻlinmalari, tuman tibbiyot birlashmasi, akademik litsey va kasb-hunar kollejlari bilan hamkorlikda oʻtkazilayotgan barcha  maʼnaviy-maʼrifiy hamda madaniy tadbirlarimizning mazmun-mohiyati, maqsadi bitta – farzandlarimizni yuksak maʼnaviyatli, barkamol, muhtaram Prezidentimiz taʼbiri bilan aytganda, bizdan koʻra kuchli, bilimli va dono qilib tarbiyalash. Zero, ona Vatan kelajagi bugungi hayot ostonasiga ilk mustaqil qadam qoʻyayotgan yoshlar kuch-qudratiga, bilim va salohiyatiga bogʻliq.

Umumtaʼlim maktablarida "soʻnggi qoʻngʻiroq” chalinishiga juda oz fursat qoldi. Mustaqil hayot sari intilib, ilm-fan choʻqqilarini zabt etishga chogʻlanayotgan har bir bitiruvchi oʻgʻil-qizga:

- Parvozingiz baland, orzu osmoningiz yorugʻ, kelajagingiz yanada porloq boʻlsin!, - deymiz.

                          Ashirboy QOʻShAYeV, tuman XTMFMTTEB mudiri.