KOʻRGAZMALI SEMINAR BOʻLIB OʻTDI

3-mart kuni tumanimizda Respublika Hukumati tomonidan belgilab berilgan qishloq xoʻjaligiga oid 11 ta ustuvor yoʻnalishdagi ishlarni tashkil qilish masalalariga bagʻishlangan Qoraqalpogʻiston Respublikasi boʻyicha koʻrgazmali seminar boʻlib oʻtdi.

Yangi tashkil qilingan fermerlar Kengashi faoliyatini rivojlantirish, qishloq xoʻjaligi korxonalarida debitor va kreditorlik hisob-kitoblarni yuritish, aholi tomorqasidan unumli foydalanish, texnikalarni yangi mavsumga tayyorlash va yangilarini sotib olish, irrigatsiya, agrotexnika tadbirlarini sifatli oʻtkazish, meva-sabzavot, uzumchilik va bogʻdorchilik, chorvachilik, parrandachilik, baliqchilik va asalarichilik, pillachilik sohalarini rivojlantirish, dehqon bozorlarini tartibga solish, narx-navoning asossiz oʻsib ketishining olldini olish, qishloq xoʻjaligi mahsulotlarini uzoq muddatga saqlovchi sigʻimlar tashkil qilish hamda hududlarda yengil sanoatni rivojlantirish masalalari seminar kun tartibida boʻldi.

Seminarda Qoraqalpogʻiston Respublikasi Joʻqorgʻi Kengesi raisi Musa Yerniyazov, Respublikaga Vazirlar Mahkamasidan biriktirilgan vakil Shuhrat Teshayev, Vazirlar Kengashi raisi Bahodir Yangiboyev, vazirlik va idoralar xodimlari hamda boshqalar ishtirok etdilar. Ishtirokchilar tumanimiz hokimi Rajabboy Yoʻldoshev boshchiligida dastlab tumanimizdagi «Amudaryo Agrotexservis» masʼuliyati cheklangan jamiyatida boʻlishib, qishloq xoʻjaligi texnikalarining yangi mavsumga tayyorgarligini koʻzdan kechirdilar va mazkur parkka yangidan olingan texnikalar boʻyicha maʼlumotga ega boʻldilar. Soʻngra «Tursunboyeva Umida» fermer xoʻjaligida bugʻdoyni oziqlantirish ishlari bilan tanishib, erta bahorda bugʻdoy tarbiyasida amalga oshiriladigan agrotexnik tadbirlar toʻgʻrisida maʼlumotga ega boʻldilar.

"Choykoʻl” ovulida aholi tomorqa yerlaridan unumli foydalanish boʻyicha qilinayotgan ishlar hamda «Yoʻldoshev Oʻrozboy» fermer xoʻjaligida meliorativ tadbirlarlarni amalga oshirish jarayoni bilan tanishdilar.

Seminar ishtirokchilari tumanimizdagi «Amu sohili» fermer xoʻjaligida ham boʻlishib, bu yerda yangi tashkil etilgan chorva kompleksi faoliyati bilan tanishdilar. Ishtirokchilar "Choykoʻl” ovulidagi «Amudaryo biomahsulot» biolaboratoriyasi faoliyati bilan yaqindan tanishdilar. Shuningdek, mazkur ovul hududida tashkil qilingan yangi bogʻda intensiv usulda ekilgan nihollar parvarishi, bogʻlarda bahorgi agrotexnika tadbirlarining bajarilishi va bogʻdorchilikni rivojlantirishga oid boshqa masalalar boʻyicha fikr almashildi.

Qishloq xoʻjaligida faqat mahsulot yetishtirish emas, yetishtirilgan mahsulotni qayta ishlash va eksportga chiqarish shu kunning dolzarb masalalaridan biridir. Seminar qatnashchilari «Aziya Silk» shoʻʼba korxonasida boʻlishib, bu yerda tumanimizda yetishtirilgan pillani toʻliq qayta ishlash imkoniyatlari bilan tanishdilar.

Seminar Qilichboy ovulidagi «Amirxon» fermer xoʻjaligida davom etdi. Bu yerda fermer xoʻjaliklarini koʻp tarmoqli xoʻjalikka aylantirish masalalari muhokama qilindi. Soʻngra koʻrgazmali seminar tuman hokimligi binosiga koʻchdi. Unda tuman Qishloq va suv xoʻjaligi boʻlimi hamda tuman fermerlar Kengashining xonalari koʻzdan kechirilib, bu yerga tashrif buyuruvchilar va ishlovchilar uchun yaratilgan shart-sharoitlar yuqori baholandi.

Seminar hokimlik binosida ishtirokchilarning yakuniy uchrashuvi bilan nihoyasiga yetdi.