YoVUZ KUChLARDAN OGOH BOʻLAYLIK!

Biz uchun eng buyuk neʼmatlardan biri – tinchlikdir. U oddiy soʻz boʻlib eshitilishi mumkin, biroq, uning qay darjada muqaddas tushuncha ekanligini ikkinchi jahon urushida ishtirok etib, qanchadan-qancha qonli toʻqnashuvlarning guvohi boʻlgan nuroniylarimizning TINChLIK soʻzini koʻzlarida yosh bilan tilga olishidan anglab etish qiyin emas. Shu boisdan ham otaxon-u momolarimiz duoga qoʻl ochganda, avvalo "tinchlik, xotirjamlikni bersin” deya tilak bildiradilar. Albatta, kim ham xohlamaydi oʻz ishiga bemalol borib kelishni yoki bolalarini maktabga, bogʻchaga bexavotir joʻnatishni, tunda xudoga shukronalik keltirib, tinchgina uyquga ketishni va nihoyat osuda, charaqlagan quyosh nurida yangi kunni qarshi olib, issiq nonning xushboʻy hididan bahramand boʻlib, oila aʼzolari bagʻrida nonushta qilishni. Bir qarashda bu jumlalar balandparvoz tuyulishi mumkin. Biroq, siz bugungi kunda dunyoning turli nuqtalarida boʻlayotgan tinimsiz xunrezliklardan jabrdiyda odamlarning bunday baxtdan benasib qolayotganligi haqida bir oʻylab koʻring!

Oʻzlarini "IShID”, yaʼni Iroq va Shom islom davlati deb atayotgan terrorchilik tashkiloti boshqa mamlakatlar tan olmasligiga qaramasdan, muqaddas islom dini niqobi ostida hokimiyatni egallashni koʻzlagan yovuz niyat bilan er yuzining turli nuqtalarida portlashlar, toʻqnashuvlar, urushlarni tashkil etib, begunoh kishilarning qoni toʻkilishiga sababchi boʻlayotir.

Ular  2013-yilda Iroq hududida 10 mingdan ziyod terrorchilik harakatlarini sodir etgan, minglab kishilarning hayotiga zomin boʻlgan edi. Birlashgan millatlar tashkiloti maʼlumotlariga koʻra, 2015-yilda ham ular bunday qirgʻinbarotlarni tinimsiz olib bordi. Bularda halok boʻlgan insonlar kimningdir otasi, birovning onasi, suyukli yori, jondan aziz farzandi yoki bir qorindan talashib tushgan tugʻishgani ekanligini, millionlab goʻdaklarning etim, gulday juvonlarning beva qolganini koʻz oldimizga keltirar ekanmiz, oʻsha inson qiyofasida yurgan qonxoʻr maxluqlarga - tinchlik kushandalariga nisbatan qalbimizda cheksiz nafrat tuygʻusi uygʻonadi.

Albatta, bu kabi keng koʻlamdagi terrorchilik harakatlarini amalga oshirishda ularga juda koʻp odam kerak boʻladi. Eng achinarlisi, bu yoʻlda ularning  minglab gʻoʻr yoshlardan foydalanayotganligidir. Ular dunyoning turli nuqtalarida yoshlarni oʻzlariga jalb qilib, aldov yoʻli bilan saflariga qoʻshmoqdalar.

Hech bir yovuz kimsa kimningdir uyiga kelib, "kel, bizga qoʻshil” demaydi. Ular oʻrtasidagi koʻprik -  oʻrgimchak toʻriga qiyoslanayotgan internet tarmogʻi hisoblanadi. Shu boisdan har bir ota-ona, taʼlim muassasalarida esa oʻqituvchilar yoshlarga internetdan foydalanish madaniyatini oʻrgatib, ularni nazorat qilib borishi, eng asosiysi, shunday yovuz kimsalar, ularning qilayotgan qabih ishlari haqida etarlicha tushunchalar berib, maʼnan yetuk inson boʻlib ulgʻayishlari uchun oʻzlarining amaliy yordamlarini ayamasliklari lozim. Bugun davr ogohlikni talab qiladi. Kimki beparvolikka yoʻl qoʻysa, oʻz kelajagiga rahna soladi.

MuhayyoRahimboeva,

QDU talabasi.

(Foto - http://muslim.uz)