Istiqbolga intilgan yoshlar
HAM RASSOM, HAM ShOIRA
Inson tabiatan goʻzallikka shaydo. Kim uchundir qimmatbaho, jimjimador taqinchoqlar goʻzal, yana kim uchundir eng yangi fasondagi liboslar, yaqinlarining chehrasi, yaratgan bogʻ-u boʻstoni goʻzal. Yon-atrofimizni qurshab turgan moddiyatlarda koʻzni quvontiradigan goʻzalliklar bisyor. Biz uni har lahzada xohlagancha kashf etishimiz mumkin. Lekin inson tabiatida shunday bir goʻzallik borki, biz uni garchi koʻzimiz bilan koʻrmasak-da, uning qudratidan taft olamiz, dilimiz, vujudimiz yayrab ketadi bu goʻzallikdan. Beixtiyor havas va hayratga chulgʻanamiz. Bu – qalb goʻzalligi. Maʼnaviy barkamollik sari intilib, atrofidagilarni yaxshilik, ezgulik sari chorlab yashaguvchi koʻngil boyligi bu goʻzallik!
Mangʻit shahrining Olmazor mahallasida istiqomat qiluvchi Mangʻitbek aka Erniyozov ana shunday – butun boyligini koʻngliga jamlagan inson. Nihoyatda kamtar, kamgap, tabiatan kamsuqum bu inson umr boʻyi oʻz qalb goʻzalligini Amu eliga, mangʻitliklarga ulashib kelayotgan boʻlsa ne ajab. U xalqning xohish-irodasini, orzu-umidlarini ifoda etuvchi suratlar chizadi. Bu suratlarga goʻyo rassomning qalb harorati koʻchganday issiq, taftli.
Manzuraxon Mangʻitbek qizi ana shu insonning farzandi. U ziyoli oilada shakllangan goʻzal ijodiy muhit ogʻushida oʻsdi. Mangʻit shahrining, Amu elining jamiki goʻzal manzaralarini, betakror tabiati, mehribon, bagʻrikeng insonlariga xos odamiylik fazilatlarini eng avvalo otasi, taniqli rassom Mangʻitbek Erniyozov yaratgan tasviriy sanʼat asarlari orqali his etdi. Otasi, onasi oʻqigan kitoblarni oʻqidi, ular amal qilguvchi hayot qoidalari asosida toblandi. Manzuraxon Ashirboyeva tumanimizdagi 40-sonli umumtaʼlim maktabida tahsilni boshlagan 7-8 yoshlaridanoq qoʻliga moʻyqalam tutib, otasi kabi suratlar chiza boshladi. Chizgan suratlari bilan avval oʻzi tahsil olgan maktabda ustozlarining, keyinchalik "Barkamol avlod” bolalar markazi mutaxassislarining nazariga tushdi. Amudaryo qishloq xoʻjalik kasb-hunar kollejida tahsil olgan Manzura turli xil koʻrik-tanlovlar, adabiy-badiiy ijodkorlik boʻyicha bellashuvlarning doimiy ishtirokchisiga aylandi. Biron kun ham ijod qilishdan toʻxtamagan Manzura kollejni muvaffaqiyatli tugatib, "Barkamol avlod” bolalar markazida ishlay boshladi. Bu yerda rassomlikka qiziquvchi bolalar bilan ishlashish Manzura uchun ham zavqli, ham anchayin masʼuliyatli edi.
- Ayniqsa, ranglar tanlash masalasida baʼzan qiynalib qolardim, - deydi u, – bunday paytlarda dadam menga doim ustozlik qiladilar.
Tasviriy sanʼatning eng nozik sirlarini dadasi Mangʻitbek akadan oʻrganishdan, oʻqib-izlanishdan aslo charchamaydigan Manzuraxon "Yurt kelajagi” koʻrik-tanlovining Respublika bosqichida sovrindor boʻldi va koʻrik-tanlovning maxsus sovgʻasi hamda Diplomi bilan taqdirlandi. U doimiy ravishda Navroʻz – umumxalq bayramiga bagʻishlangan yosh rassomlarning Qoraqalpogʻiston Respublikasi koʻrgazmasida oʻz ijod namunalari hamda "Barkamol avlod” bolalar markazining tasviriy sanʼat toʻgaragi aʼzolari tomonidan tayyorlangan suratlar jamlanmasi bilan muvaffaqiyatli ishtirok etib, sovrinli oʻrinlarni egallab kelmoqda.
- Men uchun 2015-yil juda omadli keldi, - deydi Manzura quvonch bilan. - Nukus Davlat pedagogika institutining tasviriy sanʼat va muhandislik grafikasi fakulteti talabasi boʻldim.
Orzulari tomon dadil qadam tashlagan Manzura Ashirboyeva uchun oliygohda tahsil olish, yetuk mutaxassis olimlar, fidoyi ustozlar nazari ostida ijod etish uning hayotida yangi-yangi sahifalarni ochdi. Bolaligidan rassomlik bilan shugʻullanib, maktabdagi va kollejdagi ustozlarining, turli xil koʻrik-tanlovlar tashkilotchilarining eʼtirofiga sazovor boʻlgan Manzura oʻzining yana bir nozik qobiliyatini namoyon etdi. Sheʼriy mashqlari bilan oliygoh oʻquv auditoriyalaridagi bahs-munozaralarda, katta-kichik tadbirlarda ishtirok etib, ijod ahlining nazariga tushdi.
Yaqinda, soʻlim kuz faslining farahli kunlaridan birida Oʻzbekiston Yozuvchilar uyushmasi tashabbusi bilan "Doʻrman” ijod uyida boʻlib oʻtgan VII respublika yosh ijodkorlar seminarida ishtirok etish baxtiga muyassar boʻldi. Oʻzbekiston Yozuvchilar uyushmasi raisi, Xalq yozuvchisi Muhammad Ali, Yozuvchilar uyushmasi raisining oʻrinbosari Iqbol Mirzo, xalq shoiri Mahmud Toir, Tursunboy Adashboyev, Suvon Meli, Bahodir Karim, Abduqayum Yoʻldoshev, Adhambek Alimbekov, Sirojiddin Rauf, Oʻktam Mirzayor, Klavdiya Panchenko, Nodir Jonuzoq kabi el ardogʻidagi ustoz shoir-u yozuvchilarning mahorat maktabi tahsillarida, suhbatlarida qatnashib, Oʻzbekistoning turli viloyatlaridan kelgan yosh ijodkorlar bilan tanishish baxtiga musharraf boʻldi. Ijod ahli uchun muqaddas goʻsha hisoblangan tabarruk dargoh – "Doʻrman” ijod uyida oʻtkazilgan sheʼriyat anjumani davrasida oʻz sheʼrlarini oʻqidi, ustoz shoirlar maslahatlarini tinglab, olqish va duosini oldi.
- Men sheʼrlarimni doimo boshqalarga koʻrsatmay, yashirib yurardim, - deydi Manzuraxon Ashirboyeva. – Endi bilsam, xato qilgan ekanman. Sheʼr - nafaqat oʻz koʻnglim, balki oʻzgalar koʻnglining ham mulkiga aylanishi mumkin ekan. Respublika yosh qalamkashlarining toʻplamiga mening ham sheʼrlarim kiritilishini aytishganida zimmamda juda katta masʼuliyatni his etdim. Bu – maʼnaviyatga daxldorlik, tilga, adabiyotga daxldorlik tuygʻusi bilan yashash masʼuliyati.
Manzura Ashirboyeva endi 21 yoshga qadam qoʻydi. Uning barcha orzulari oldinda. Tasviriy sanʼat hamda sheʼriyatda birdek ijod qilayotgan Manzuraxonning kelajagiga ishongimiz keladi. Unga bir samimiy doʻst, ijod maydonida hamfikr va hamnafas sifatida:
- Istiqbolga intilgan qadamlaring qutlugʻ, yoʻllaring oydin boʻlsin, - deymiz.
Robiya YOʻLDOShEVA,
Qoraqalpogʻiston Respublikasida xizmat koʻrsatgan jurnalist.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
