MILLIYLIGIMIZ DARZ KETMASIN!
Yaqinda, shahrimizning koʻzga koʻringan toʻyxonalarining biriga toʻyga borib, shunday gʻalati bir holatni kuzatdim: toʻy tarqashidan sal oldin davra oʻrtasidagi stol atrofida kelin-kuyovning doʻstlari ikkala yoshning sogʻligi, baxti uchun qadah koʻtardilar. Mayli, yoshlarning baxtini bersin! Ammo tilak aytib, izidan aroq ichish nimasi? Nahot spirtli ichimlik baxtga garov boʻlsa? Bundan ham oʻtib tushadigan, keyingi vaqtlarda urfga kirayotgan yana bir odat borki, nomi "piramida” deb yuritiladi. Yaʼni, davra oʻrtasiga stol qoʻyilib, ustiga stakanlar uchburchak shaklda taxlanib, yuqorisidagi stakan ichiga shampan vinosi quyilar ekan.
Toʻgʻri, bir qarashda unchalik eʼtiborni tortmaydigan odat. Ammo hayratlanarlisi shundaki, faqat shuning uchun toʻy egalari uch yuz ming, undan ham ortiq pul toʻlashar ekan.
Hayron boʻlib, yonimdagi dugonamga yuzlandim. Dugonam sekingina "romantika-da”, deb qoʻydi. Qiziq, ushbu odat soʻnggi ikki-uch yil davomida anchagina urf boʻldi... Bu ham mayliku-ya, bugungi toʻylarimizda unchalik eʼtiborni tortmaydigan, biroq kuzatganimizda insonning gʻashini keltiradigan yana bir holat borki, buni qanday atashni bilmadim. Bu kelin-kuyovlarning kattakon yurak shaklida tizilib, yonib turgan shamlar orasida valsga tushishidir.
Xoʻsh, bu ham oʻsha "romantika”ning bir koʻrinishimi? Yoki oʻta zamonaviy yoshlarning oʻylab topgan urfimi?
Men bu xunuk raqsning nomini yoshlarning maʼnaviyatsizligi, deb baholagan boʻlardim. Qolaversa, ushbu davrada koʻpni koʻrgan, nuroniy momolarimiz, onalarimiz oʻtirishadi. Endi oʻylab koʻraylik, aziz tengdoshlar, vals ularga nisbatan hurmatsizlikning oʻzginasi emasmi? Agar biz oʻsha "romantika”ga ergashaveradigan boʻlsak, u bizni ne koʻylarga solmaydi?
Agar biz asrlar davomida shakllanib kelayotgan milliyligimizga, oʻzbekchiligimizga murojaat qiladigan boʻlsak, bu odatlarni oqlamasligimiz tayin. Qadimda yigit-qizlar toʻylarda turli xil laparlar aytishib, toʻylarini oʻzbekona urf-u anʼanalarimiz asosida oʻtkazishgan. Yuraklarni sel qiluvchi yor-yorlar sadosi ostida kelinlar yangi ostonaga qadam qoʻyishgan. Kelin-kuyovlar andisha qilib, hatto bir-birlariga qarashdan ham iymanishgan.
Darhaqiqat, biz shunday or-nomusli, imon-eʼtiqodli xalq farzandimiz. Bu kabi qadriyatlarimizga dunyo ahli hali-hanuzgacha tan berishadi, havas qiladilar. Demak, toʻylarimiz goʻzal, ortiqcha sarf-xarajatlardan xoli, bekam-u koʻst boʻlib oʻtishini istasak, yuqoridagi kabi nomaqbul odatlardan saqlanishimiz kerak. Toki milliyligimiz darz ketmasin!
Aziza MADRAHIMOVA.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
