Ogohlik, hushyorlik – doimiy vazifamiz

Bugungi kunda oʻquvchi-yoshlarga bilim asoslarini puxta oʻrgatibgina qolmay, ularni atrofida va butun dunyoda sodir boʻlayotgan voqea-hodisalarni oqilona baholab, oʻzining munosabatini bildira oladigan, mustaqil fikrlovchi, maʼnaviyatli qilib kamolga yetkazishga ulkan eʼtibor qaratilmoqda. Tinch aholi orasida nizolar chiqarib, xalqni parokanda qilishga, mudhish qoʻporuvchilik harakatlari bilan qoʻrqitib, tahdid qilib, izmiga solishga urinayotgan ekstremistik guruhlar koʻproq yosh-yosh yigit-qizlarni toʻgʻri  yoʻldan toydirib, oʻz saflariga tortishga urinayotganliklari bejiz emas. Shunchaki oqibatini oʻylamay, qiziqish ustunlik qilib, ularning tuzogʻiga ilinib qolayotgan yoshlar ham afsuski, yoʻq emas.

Shularni inobatga olgan holda yaqinda "Qipchoq” ovulida joylashgan 18-sonli maktabda xavfsizlikni taʼminlash, yoshlarning turli zararli oqimlar taʼsiriga tushib qolishining oldini olish, Vatanimizdagi tinchlik, osoyishtalikning qadriga yetish va barqaror boʻlmogʻi uchun kurashish, ogohlikni, sergaklikni oshirishga qaratilgan yigʻilish boʻlib oʻtdi.

Yigʻilishda maktab oʻqituvchilari, oʻquvchilarning ota-onalari, tuman IIB xodimlari, Qipchoq ovul fuqarolar yigʻini masʼul xodimlari ishtirok etdilar.

Kun tartibidagi mavzu yuzasidan tuman IIB xodimi, mayor J.Xolmurodov, Qipchoq OFY raisi T.Jumaniyozov. XTMFMTTEB metodisti A.Bekberganovlar maʼruza qildilar, loqaydlikka yoʻl qoʻymaslik lozimligi ota-onalarning oʻz farzandlarini yetarlicha nazorat qilmasliklari natijasida kelib chiqqan ayrim koʻngilsiz voqealar misolida tushuntirildi.

Yigʻilishda ota-onalar ham farzand tarbiyasida hushyorlikni oshirishga oid oʻz fikr-mulohazalarini bayon etdilar, ogohlik – har bir fuqaroning kundalik ishiga aylanishi lozimligini taʼkidladilar.

E.ALLAMBERGANOV,18-sonli maktab direktori.

(Foto - http://uzbekistonovozi.uz)