EL-YuRT XIZMATI YOʻLIDA KAMARBASTAMIZ

Oʻzbekiston Respublikasi Mustaqilligining 24-yilligi nishonlangan joriy yilda barcha fuqarolarning oʻzini oʻzi boshqarish organlari qatori men rahbarlik qilayotgan "Yangiobod” mahalla fuqarolar yigʻinida ham ijtimoiy-maʼnaviy muhit barqarorligini taʼminlash, hududni obodonlashtirish, sanitariya holatini yaxshilash va shunga oʻxshash aholi farovonligini yaxshilashga xizmat qiladigan bir qancha ishlarni amalga oshirishga alohida eʼtibor berildi. Bunda albatta, biz mahalla faollarining yordamlariga, jamoat tashkilotlarining koʻmaklariga tayanamiz.

Natijada esa mahalla xonadonlaridagi mavjud holatlar oʻrganib chiqildi va oilalarda sogʻlom muhitni shakllantirish, reproduktiv salomatlikni mustahkamlash va barkamol avlodni voyaga yetkazish ishlariga keng jamoatchilikni jalb qilish yuzasidan aholi oʻrtasida keng miqyosda tushuntirish ishlarini olib borishga erishildi.

Men keyingi saylovda 4-"Doʻstlik” saylov okrugidan xalq deputatlari tuman Kengashi deputatligiga saylanganman. Asosiy ishim – "Yangiobod” MFY raisi vazifasi bilan birgalikda albatta, deputatlik faoliyatimni ham bekam-u koʻst bajarishga harakat qilayapman. Shu maqsadda "Doʻstlik” mahalla fuqarolar yigʻini binosida tashkil etilgan deputatlik xonasida Kengash tomonidan tasdiqlangan fuqarolarni qabul qilish kuni va saylovchilar bilan uchrashuvlar oʻtkazish jadvaliga muvofiq har oyning oxirgi shanba kuni fuqarolarni qabul qilish bilan birgalikda har chorak yakuni boʻyicha saylovchilarim bilan uchrashib, ularga mamlakatimiz siyosiy hayotidagi oʻzgarishlar, tuman Kengashi va hokimligi tomonidan amalga oshirilayotgan ishlar haqidagi maʼlumotlarni yetkazib turaman.

Men tadbirkorlar va ishbilarmonlar harakati – Oʻzbekiston Liberal Demokratik partiyasining deputatlik guruhi rahbari hamda xalq deputatlari tuman Kengashining Mahalliy byudjetni shakllantirish va uni ijro etish, iqtisodiy islohotlarni amalga oshirish hamda tadbirkorlikni rivojlantirish masalalari boʻyicha doimiy komissiyasi raisi sifatida ham bir qancha ishlarni amalga oshirib kelmoqdaman. Joriy yilning oʻtgan davri mobaynida doimiy komissiya tomonidan 9 ta yigʻilish oʻtkazildi.

Jumladan, 2015-yilning 27-mart kuni doimiy komissiya aʼzolari "Xitoy” ovul fuqarolar yigʻinidagi "maslahat markazi” tomonidan olib borilayotgan ishlarni, 12-iyunda esa "Kuyuk koʻpir” ovul fuqarolar yigʻinida yangi ish oʻrinlarini yaratish, aholining, ayniqsa xotin-qizlarning bandligini taʼminlash boʻyicha olib borilayotgan ishlarni oʻrganib chiqdik.

"Yangiobod” mahalla fuqarolar yigʻini hududidagi Amudaryo qishloq xoʻjalik kasb-hunar kolleji binosida 13-mart va 5-iyun kunlari "Reproduktiv salomatlik, onalik va bolalikni muhofaza etish hamda hududlarda sanitariya holatini yaxshilashning dolzarb masalalari” mavzusida yigʻilishlar oʻtkazildi.

Shuningdek, avgust oyidagi  yigʻilishda "Oʻzbekiston Respublikasi Vazirlar Mahkamasining 2013-yil 15-fevraldagi "Kam taʼminlangan oilalarga ijtimoiy nafaqalar va  moddiy yordam tayinlash va toʻlash tartibi toʻgʻrisidagi Nizomni tasdiqlash haqida”gi qarori talablari asosida "Qilichboy” OFYda olib borilayotgan ishlar toʻgʻrisida”gi masala koʻrib chiqildi.

Men oʻz deputatlik faoliyatimni yanada yaxshilash maqsadida saylovchilarim bilan tez-tez uchrashishga, ular bilan oʻtkazilgan suhbatlar chogʻida bizga ishongan yurtdoshlarimizning xohish-istaklarini oʻrganishga, ularga imkoni boricha koʻproq yordam koʻrsatishga harakat qilaman.

Chunki, biz deputatlar oʻz saylovchilarimiz qalbiga yoʻl topib, ularning ishonchini qozonsakkina deputat degan sharafli nomni oqlagan boʻlamiz.

Madamin KAZAKOV, xalq deputatlari tuman Kengashi deputati, tuman Kengashining Mahalliy byudjetni shakllantirish va uni ijro etish, iqtisodiy islohotlarni amalga oshirish hamda tadbirkorlikni rivojlantirish masalalari boʻyicha doimiy

komissiyasi raisi.