MEHNATLARI ROHATIGA YeTIShGAN NURONIYLAR

Hayot haqida turli davrlarning faylasuflari juda koʻp hikmati fikrlar aytishgan. Abdulla Qodiriyning donishmand qahramonlaridan biri esa "Umr - otilgan oʻq emish”, - deydi va bu koʻp keksalarning umrimiz koʻz ochib-yumgunchalik fursatda oʻtdi-ketdi, degan gaplariga hamohangdir. Shunga asosan qaralsa, kechagina palaxmonga kesak joylab, chumchuq qoʻrib, "ishga yarab qolgani” bilan otasini quvontirib, chopqillab yurgan Abdullajon bilan bugungi kunda pir-u badavlat boʻlib umrguzaronlik qilayotgan Abdulla buvaning hayot yoʻliga nazar solib, yuqoridagi fikrlarning tasdigʻini topgandek boʻlamiz. Biroq xalq shoiri Sirojiddin Sayyidning:

Falak gohi tong, goh shom tutib oʻtgay,

Gohi fol, gohida rom tutib oʻtgay.

Gohi quyosh toʻla limmo-lim kosa,

Goh siniq hiloldan jom tutib oʻtgay, -

deb yozganiday, ana shu oraliqda qancha shodlik onlari-yu, qancha gʻamgin lahzalar kechganini, salkam 90 yillik umrning sakkizdan yetti qismini mehnat qilib oʻtkazgan Abdulla buva bilan hamsuhbat boʻlgan inson bilishi mumkin.

Hozirgi kunda farzandlari, nevara-yu chevaralari davrasida qarilik gashtini surayotgan Abdulla Jumaniyozov 1928-yilda Xitoy ovulida dehqon oilasida tugʻilgan. Otasi Jumaniyoz Oʻrozimbetov jamoa xoʻjaliklari tashkil qilinayotgan paytda uyidagi butun chorvasi - qoramol va qoʻylarini topshirib, aʼzo boʻlgan, butun umri davomida dehqonchilik bilan shugʻullangan. Bizning qahramonimiz ham 16 yoshidan boshlab jamoa xoʻjaligida mehnat qilib, Ikkinchi jahon urushi yillarida front ortida mehnat qilib, gʻalabaga oʻz hissasini qoʻshdi.

1947-yilda esa Toshkent-Shovot temir yoʻlining Dargʻonota qismida ikki oy davomida ishlab keldi. U yerdagi koʻrgan qiyinchiliklari, ogʻir mehnatlari haqida Abdulla buva: "u yerda oʻtkazgan ikki oy menga ikki yilga tatigulik boʻldi”, deb eslaydi.

Mehnatsevar odam hamma yerda ham kerak. 1947-yilda  shu yerdagi MTS direktori V.V. Stopnik Abdullani mexanizatorlikka oʻtishga taklif qiladi.

Shu davrdagi jamoa xoʻjaligiga raislik qilgan Tojimurod Eshmurodov esa yaxshi ishchini yuborgisi kelmaydi. Oxiri ikki rahbar oʻrtasidagi munozaralardan keyin Abdulla Shoʻroxondagi (hozirgi Toʻrtkoʻl) mexanizatorlar tayyorlash kursida oʻqib qaytadi. Ustozlari Xudoyor Oʻrozimbetov, Amat Tojimurodovlarning koʻmagida texnika ilmini puxta egallaydi. U paytlari Amudaryo quyi oqimida joylashgan Qiziljar hududida tumandagi hamma xoʻjaliklarning chorva mollari boqilib, texnika vositalari va ishchi kuchlari vaxta tarzida yuborib turilardi. Traktorchi Abdulla u yoqda ham mehnatsevarligi bilan ogʻizga tushdi. 

Abdulla Jumaniyozov to nafaqaga chiqqunicha jamoa xoʻjaligida sidqidildan mehnat qildi. Oʻxshatmasdan uchratmas deganlaridek, uning turmush oʻrtogʻi Obodon Nurimbetova ham ishchan va mehnatsevar chiqdi - ham paxta dalasida, ham pilla qurti boqishda hamisha belgilangan rejalarini oshirib bajarib keldi. Ahil turmush kechirib, besh oʻgʻil, besh qizni oq yuvib, oq tarab, voyaga yetkazishdi. "Qush uyasida koʻrganini qiladi”, deganlaridek, oʻgʻil-qizlarining hammasi havas qilarli oilalar boshliqlari-yu uy bekalari boʻlib ketishgan, isteʼdodli shoir Farhod Avezovning:

Ishim bitsin desang borgan joyingda,

Rizqim hozir boʻlsin desang poyingda,

Nasibang oqadi oqar soyingda

Otang duosini olib yur, bolam, - degan satrlaridagi hikmatomuz fikrlariga mos ravishda, el-yurt xizmatiga yaraganlari uchun otalarining koʻnglini shod qilib yurishibdi.

Hamisha jamiyatga ham, oilaga ham manfaatli mehnat bilan shugʻullanib kelgan Abdulla buva hozir ham tinch oʻtirgani yoʻq. Bu haqda hamqishlogʻi, 1961-yildan uchastka agronomi, bosh agronom, 1986-yildan 1998-yilgacha jamoa xoʻjaligi kasaba uyushmasi raisi boʻlib ishlagan Tilovboy Tojimov shunday deydi:

- Abdulla buva faqat texnikaning tilini tushunadigan mexanizator emas, balki mohir bogʻbon hamdir. Avval shirin anorlari bilan mashhur bogʻi bor edi, mana hozir ham yangidan olma nihollari oʻtqazib, bogʻ yaratmoqda.

Abdulla buvamiz hali bardam, yuz-u koʻzidan gʻayrat yogʻilib turibdi. Bunda albatta, birga roʻzgʻor quvonch-u tashvishlarini baham koʻrib kelayotgan umr yoʻldoshi Obodon momomizning xizmatlari beqiyos.

Ozod va obod yurtimizning tinchlik, omonlikda otayotgan har bir tongiga, yaratuvchilik ishlari bilan oʻtayotgan har bir kuniga, Ollohimizning marhamatiga behisob shukurlar aytib yashayotgan Abdulla buva, Obodon momolarga farzandlari, el-yurtimiz oldida yana uzoq hamda sermazmun umr kechirishlarini tilab qolamiz.

Ahmad NAFASOV.