PAXTANI YoNGʻINDAN ASRASh – BURChIMIZ
Ayni kunlarda respublikamizning barcha hududlarida boʻlgani kabi tumanimizda ham paxta yigʻim-terimi tobora avj olmoqda. Chunki bunday iliq kunlar gʻanimatdir. Bu davrda yigʻib olingan paxtani yongʻin xavfidan asrashga alohida eʼtibor qaratish lozim. Zero, paxta bizning milliy boyligimiz, iftixorimiz hisoblanadi. Shuning uchun uni asrashimiz, shu jumladan, yongʻin chiqishining oldini olishimiz zarur. Buning uchun fermer xoʻjaliklarida paxta xirmonlari, paxta quritish oʻrinlari suv havzalari bor boʻlgan yoki suv hovuzlari mavjud boʻlgan joylarga yaqin boʻlishi kerak. Paxta hosilini paxta qabul qilish maskanlariga eltishda alohida eʼtibor va masʼuliyat zarur. Traktor tirkamalariga ortilgan paxta ustiga albatta sholcha yoki brezent yopilishi kerak, aks holda yongʻin kelib chiqishi mumkin. Paxta qabul qilish punktlarida va paxta dalalarida chekish, ochiq olovdan foydalanish hamda paxta hosilini yoʻl chetlarida quritish qatʼiyan maʼn qilinadi. Xirmonlar, paxta quritish oʻrinlari paxta qabul qilish shoxobchalari "Paxtani olovdan asraylik!”, "Chekilmasin!” "Olovdan foydalanish maʼn qilinadi!” kabi koʻrsatmalar bilan taʼminlanishi zarur.
Tumanimizdagi "Amudaryo paxta tozalash” aktsiyadorlik jamiyati hamda unga qarashli paxta qabul qilish shoxobchalarida paxta hosilini qabul qilishga tayyorgarlik ishlari puxta olib borilganligi bois hosil uzluksiz qabul qilinmoqda. Jamiyat va unga qarashli shoxobchalar yongʻinga qarshi birlamchi yongʻin oʻchirish vositalari bilan taʼminlangan. "Paxta - 2015” yigʻim-terim mavsumida yordamga kelgan hasharchilarning yashash joylarida yongʻin xavfsizligi choralarini koʻrish uchun bir qancha ishlar olib borildi. Hozirgi kunda ham yuqoridagi tartib-qoidalar toʻgʻrisida suhbatlar oʻtkazilib, yoʻriqnomalar va koʻrsatmalar berilmoqda. Paxta qabul qilish shoxobchalarida koʻngilli yongʻin oʻchirish guruhlari tuzilib, guruh aʼzolariga tegishli vazifalar yuklatilib, shu bilan birga Mangʻit shahar 3-son Kasbiylashtirilgan yongʻin xavfsizligi qismi shaxsiy tarkibi va 2 ta jangovar ekipajlari, "Amudaryo paxta tozalash” hissadorlik jamiyatining koʻngilli yongʻin oʻchirish guruhi va 1 ta jangovar ekipaji bilan paxta tozalash zavodida va paxta qabul qilish shoxobchalarida yongʻin sodir boʻlganda uni oʻchirish boʻyicha amaliy mashqlar oʻtkazilmoqda.
Maqsadimiz - milliy boyligimiz boʻlgan paxtani yongʻindan asrashdir.
Hamro MATYoQUBOV, tuman IIB YoXB boshligʻi, mayor.
(Foto - http://zakovat.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
