EL-YuRT TOTUVLIGI VA OBODLIGI YOʻLIDA
Bizning Nazarxon ovulimiz ahli azal-azaldan mehnatkash, el-yurtga qayishgan fidoyi, turli millat vakillari ahil-inoq, totuvlikda yashayotgan xalq. Ovulimiz ahlini yagona bir maqsad birlashtirib turadi. Bu – Oʻzbekiston mustaqilligini mustahkamlash, Nazarxon elining farzandlarini har tomonlama yetuk va barkamol, istiqlol gʻoyalariga sodiq insonlar qilib tarbiyalash.
Shuni alohida qayd etish kerakki, 654 ta xonadonda 822 oilaga birlashib, tinch-totuv yashayotgan 3592 nafar aholini ovulimizni yanada obod va farovon goʻshaga aylantirishdek ezgu maqsad hamisha jipslashtirib kelgan va bundan keyin ham shunday boʻlib qoladi. Tomorqa xoʻjaligini, tadbirkorlikni rivojlantirish nafaqat oʻz oilalari, balki Nazarxon ovulining farovonligi hamda iqtisodiy barqarorligini taʼminlashini ovul fuqarolari juda yaxshi biladilar. Shu tufayli ovulimizda tomorqa xoʻjaligini moʻl-koʻl daromad manbaiga aylantirib, boy-badavlat boʻlgan insonlar anchagina. Oilaviy va xususiy tadbirkorlikka eʼtibor ham, ragʻbat ham oshganligi bois, 2015-yilning oʻtgan davri mobaynida 17 nafar fuqaro va 2 nafar kollej bitiruvchisi parrandachilik va asalarichilikni rivojlantirish yuza-sidan ishlab chiqqan biznes gʻoyalarini amalga oshirish maqsadida imtiyozli kredit sohiblari boʻlishdi.
Ovul yoshlarining bandligini taʼminlashga ham alohida eʼtibor qaratmoqdamiz. "Qulamet oʻy” mavzesida faoliyat olib boruvchi, Xitoy texnologiyasiga asoslangan gʻisht zavodida ovulning 46 nafar yoshlari doimiy ish bilan taʼminlanishdi. 15 nafar yosh qiz va kelinchaklar ustoz-shogird anʼanasi asosida tikuvchilik sirlarini puxta oʻrganib, chevarlik bilan shugʻul-lanishayotir.
Oʻsmir va balogʻat yoshidagi qizlar hamda yosh kelinlar oʻrtasida oʻtkazilayotgan "Siz turmush qurishga tayyormisiz?”, "Qaynona va kelin munosabatlari” mavzularidagi tadbirlar oʻz samarasini berganligi bizning qalbimizga quvonch bagʻishlaydi. Chunki, bizning Nazarxon ovulimizda erta turmush qurish va oilaviy ajrimlar soʻnggi ikki yildan beri umuman sodir boʻlmadi.
Yoshlarning boʻsh vaqtlarini mazmunli oʻtkazish maqsadida ovul yoshlari oʻrtasida tez-tez turli xil koʻngilochar tadbirlar, sport musobaqalari oʻtkazilib turiladi. Hududimizdagi sport-sogʻlomlashtirish inshootlarida 120 nafar bola sportning eng ommaviy turi – futbol bilan shugʻullanishadi.
"Keksalarni eʼzozlash yili” munosabati bilan keksa otaxon va onaxonlarimizning istak-xohishlari asosida 62 nafar nuroniylar tarixiy Xiva shahriga ziyoratga borib qaytishdi, muqaddas qadamjolarga tashrif buyurishdi.
Meni nazarxonliklar ishonch bildirib, 30-Nazarxon saylov okrugidan xalq deputatlari tuman Kengashi deputatligiga saylashdi. Bu ishonch mening faoliyatim koʻlamini yanada kengaytirdi. Nafaqat diniy maʼrifiy va maʼnaviy-axloqiy tarbiya masalalari boʻyicha maslahatchi, balki xalqning ishongan vakili sifatida ovul ahlining hayotiga oid muammolarni hal etishda ishtirok etishimga, bu muammolarni ijobiy hal etishda qonuniy asoslarga tayangan holda ish yuritishimga toʻgʻri keladi.
Hamisha jonajon xalqim bilan birga harakat qilish, hamjihatlikda ishlash menga zavq bagʻishlaydi. Chunki ana shu ozgina fidoyiligim tufayli xalq ishonchiga sazovor boʻldim. Mehnatim qadr topdi. Mustaqillikning 24 yillik bayrami arafasida Prezident Farmoniga muvofiq "Shuhrat” medali bilan taqdirlanganim meni yanada samaraliroq ishlashga daʼvat etmoqda. Zero, el-yurt totuvligi yoʻlida qilingan har qanday ish munosib bahosini olaveradi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
