Umringizni bekorga oʻtkazmang, tengdoshlar!

Oilani Vatan ichra kichik Vatan deb ataymiz. Shu moʻʼjaz maskan farzandlar tarbiya olib ulgʻayadigan, komil inson boʻlib voyaga yetadigan dargohdir.

Koʻchadami, maktabdami yo jamoat joylarida yoshlarning oʻzini tutishi, muomalasi, yon atrofidagilarga munosabati oilasida qanday tarbiya olayotganini koʻrsatib turuvchi koʻzgudir. Ularning baʼzilari oʻqishda, oʻz qobiliyatini namoyon etishda, jamoat ishlarida faolligi bilan havasingizni keltirsa, baʼzilarning qoʻpol muomalasidan, yo nooʻrin qiligʻidan ranjiysan, odam. Har oilaning tarbiyasi har xil ekanligi shundan ayon boʻlib turibdi.

Mening nazarimda keyingi yillarda negadir ota-onalar, koʻproq yosh ota-onalar farzandlarining taqdiriga befarq boʻlib borishayotganday. Chunki koʻcha-koʻyda gala-gala boʻlib uzundan uzoq suhbatlashib oʻtiradigan yigitlarga, hatto, qizlarga ham duch kelamiz. Ularning suhbati mavzusi telefon, internet, moda, kimning qanday yangi kiyim olgani-yu, kim bilan nimalar gaplashgani xususida boʻladi. Ularga qarab, shunchalar keraksiz gaplarga umrining aziz lahzalarini boy berayotganini oʻylab achinib ketasan, odam. Ajablanarli tomoni oʻsha yigit-qizlarning ota-onasi qayerda eding, kim bilan eding, shuncha vaqtingni nimalarga sarflading, deya qiziqmaydi. Bekor yurgandan koʻra, maʼnaviy oziq beradigan gazeta, jurnallar, kitoblar oʻqishga jalb qilishsa, oʻzlariga xos kasb-hunar oʻrganishga undasa, yaxshi boʻlmasmidi? Axir bugun vaqtini bemaʼniliklar bilan oʻtkazayotgan farzandlar ota-onaning ertasi kuni egalariku.

Ota-onalar bolalarim uchun yugurib-yelayapman, deb hisoblashadi oʻzlarini. Biroq, bolam bugungi kunini qanday oʻtkazdi, degan savol ularni qiziqtirmaydi.

Baʼzan falonchining oʻgʻlining yo qizining tarbiyasi buzilib ketibdi, degan soʻzlar qulogʻimizga chalinadi. Menimcha, tarbiyasi buzilibdi, deyishdan oldin bormidi oʻsha tarbiyaning oʻzi, deya oʻylab koʻrish kerak. Chunki bolaligidan qalbiga sof milliy tarbiya singdirilgan bolani yoʻldan urish oson boʻlmaydi.

Ehtimol, mening bu mulohazalarim ayrimlarga erish tuyular, ayrimlar ota-onalarni muhokama qilishga hali yoshlik qilasan, deyishar ham. Biroq mening fikrlarim oʻrinsiz emas. Oddiygina bir misol: kollej oʻquvchilari boʻlgan mening tengdoshlarim orasida iqtidorli, intiluvchan, har bir darsni qunt bilan tinglab, mashgʻulotni toʻla oʻzlashtirishga intiladiganlari boʻlgani holda, shunchaki majburiyat yuzasidan darsga kelib, oxirgi partada qoʻl telefonini oʻynab oʻtirib vaqt oʻtkazadigan, uyidan darsga ketdim, deb chiqib, koʻchada bemaqsad sangʻib yuradiganlari ham bor. Ular birgina daftarni bir necha darslarga olib kirishadi va afsuski kuniga necha xil fan mashgʻulotlariga kirsa-da, bir betiniyam toʻlgʻazmaydi. Endi bir oʻylab koʻring: agar ota-ona farzandini keragicha nazorat qilib, bugun qanday mashgʻulot oʻtgani, nimalar oʻrganganini surishtirsa, har fanga doir daftarlarini tekshirib bor-sa, albatta oʻgʻli yoki qizi yuqoridagiday holga tushmagan boʻlar edi. Shunday emasmi?

Oltinoy OʻRINBOYeVA,

Mangʻit iqtisodiyot kolleji oʻquvchisi.

(Foto - http://uza.uz)