“Biz yoshlar “ommaviy madaniyat” va mafkuraviy tahdidlarga qarshimiz!”

Kurrai zaminimizda umrguzaronlik qilayotgan jamiki millatlar, elatlarning oʻz yashash tarzi, amal qiluvchi qonunlari, oʻz urf-odatlari bor.

Turli dinga, irqqa mansub, oʻzlarining sigʻinar ilohlari mavjud jamiki xalqlar uchun bugungi kunda umumiy bir tashvish maydonga chiqdiki, u kun sayin aholining koʻproq qismini qamrab olayapti, xavfli jihatlari tobora yaqqolroq namoyon boʻlayapti. Bu – axborot sohasidagi globallashuvning salbiy taʼsiridir. Millionlab aholining, ayniqsa, yoshlarning internetga bogʻlanib qolayotgani, turli saytlarda maʼnaviy dunyomizni ilm ziyosi ila boyituvchi maʼlumotlardan tashqari zoʻravonlik, bosqinchilikni targʻib qiluvchi, millatchilik, pornografik mazmundagi maʼ-lumotlar ham bisyorki, bu nomaqbul axborotlar bugungi kunda nafaqat yoshlarni, hatto, katta yoshdagi kishilarni ham oʻz domiga tortmoqda.

Odatda biz dunyoning biron burchagidagi noxush voqea-hodisa haqida gazetalarda oʻqisak, yo televizorda koʻrsak, albatta, sergak tortamiz va sal oʻtmay, koʻnglimizga "falon yoqda-ku”, degan tasalli keladi, bizga daxli yoʻqday tuyuladi. Biroq bugungi kunda internet tarmoqlarida yoritilayotgan buzgʻunchi gʻoyalar, "Ommaviy madaniyat” targʻiboti, diniy-ekstremistik, terroristik gʻoyalar mamlakatimiz yoshlari uchun ham gʻoyat ulkan xatarlarni vujudga keltirayotgani bor gap.

Mutaxassislarning aniqlashicha, bugungi kunda dunyo aholisining 22 foizi ijtimoiy tarmoqlarni kuzatishar ekan.

Faqatgina odnoklassniki.ru ijtimoiy tarmogʻi kunlik auditoriyasining 20 foizini oʻzbekistonlik foydalanuvchilar tashkil etar ekan. "Oila davrasida” gazetasining oʻtgan haftadagi sonida yoritilgan, mana shu sayt zarafshonlik bir insonning oʻlimiga sabab boʻlganligi haqidagi xabarni oʻqigan odamning koʻnglidagi xavotiri battar oshishi, mazkur sayt kunlik auditoriyasining 20 foizini egallayotgan yurtdoshlarimizning hayotiga ham oʻz salbiy taʼsirini oʻtkazmasmikan? – degan oʻy qalbida oʻrnashib olishi shubhasiz.

Ha, bugungi globallashuv jarayoni, axborot-telekommunikatsiya texnologiyalarining tezkor taraqqiyoti hayotimizda oʻzining ham ijobiy, ham salbiy qirralari bilan namoyon boʻlmoqda.

Ana shunday murakkab vaziyatda yosh avlod qalbida bularni yetarlicha tahlil qila olish qobiliyatini shakllantirish, ularni asrlar sinovidan oʻtgan, boy maʼnaviy merosimiz, xalqimizning oʻzigagina xos boʻlgan milliy urf-odatlari, anʼanalari, qadriyatlari asosida tarbiyalash, intellektual salohiyati yuksak, qobiliyatli va ilm olishga, oʻrganishga ishtiyoqi baland, bu borada maʼlum yutuqlarga erishgan yoshlarni ularga namuna qilib koʻrsatish, ulardan oʻrnak olishga undash orqali yoshlarimizni faol va intiluvchan qilib tarbiyalash muhim ahamiyat kasb etadi.

"Mening oilam” gazetasi ijodkorlari va "Milliy tiklanish” demokratik partiyasi tuman Kengashi hamkorlikda globallashuv jarayonida yoshlarni yot gʻoyalardan asrash, ularni jismoniy, maʼnaviy jihatdan sogʻlom, chuqur bilimli va zamonaviy bilimlar egasi qilib tarbiyalashga hissa qoʻshish maqsadida qator tadbirlar oʻtkazmoqda.

Shu yilning 4 iyunida tuman hokimligida tumanimizda faoliyat koʻrsatayotgan oʻrta maxsus, kasb-hunar taʼlimi muassasalari va Amudaryo akademik litseyi faol oʻquvchilari ishtirokida oʻtkazilgan "Biz yoshlar "ommaviy madaniyat” va mafkuraviy tahdidlarga qarshimiz” nomli davra suhbati ham ana shu maqsadga qaratildi.

Davra suhbatiga oʻquvchi-yoshlardan tashqari Oʻzbekiston "Milliy tiklanish” demokratik partiyasidan tuman Kengashi deputatlari Adilboy Yusupov, Ravshan Xolmurodov va partiya faoli Rustam Rajabov, "Yusuf Eshon bobo” jomeʼ masjidi imom xatibi A.Matsapoyevlar ishtirok etdilar.

Davra suhbatida yoshlar bildirgan fikr-mulohazalar ular qalbida har qanday mafkuraviy tahdidlarga, "ommaviy madaniyat” aqidalariga qarshi mustahkam va sobit maʼnaviy immunitet shakllanayotganini koʻrsatdi. Ayniqsa, Amudaryo akademik litseyi oʻquvchisi Sevara Ibrohimova, Amudaryo xizmat koʻrsatish va servis kasb-hunar kolleji oʻquvchisi Husan Yoʻldoshev, Iqtisodiyot kolleji oʻquvchilari Aziza Madrahimova, Oltinoy Oʻrinboyevalarning bu boradagi tushunchalari teran ekanligi namoyon boʻldi.

Davra suhbatida "Yusuf Eshon bobo” jomeʼ masjidi imom xatibi A.Matsapoyev, tuman kengashi deputatlari A.Yusupov, R.Xolmurodovlar mavzu doirasidagi mulohazalarini bildirib, oʻquvchi-yoshlarning bu boradagi bilimlarini yanada boyitdilar.

"Biz har qanday mafkuraviy tahdidlarga qarshimiz. Bizning oʻz tanlagan yoʻlimiz bor: bu - avvalo ilm, kasb-hunar sirlarini mukammal egallab, bizni koʻzi qorachigʻida asrab-avaylab ulgʻaytirgan, oʻqitib kamolga yetkazgan ota-onamizga, Vatanimizga xizmat qilish!”

Davra suhbati ishtirokchilari boʻlgan yoshlarning bu iqrori bizni juda sevintirdi, Vatanimiz koriga yaraydigan barkamol avlod kamolga yetayotganidan qalblarimiz iftixorga toʻldi.

Oygul RAJABOVA, Mahmudjon ShOMURODOV, "Mening oilam” gazetasi maxsus muxbirlari.