“Yashil makon” umummilliy loyihasi doirasida keng koʻlamli obodonlashtirish va koʻkalamzorlashtirish ishlari tashkil etilmoqda
Bugun atrof-muhit musaffoligini taʼminlash va ekologik vaziyatni yaxshilash dunyoning barcha davlatlarida eng dolzarb masalaga aylangani hech birimizga sir emas. Sababi, havo va suvning ifloslanishi, choʻllanish, global isish tabiiy muvozanatga va odamlar sogʻligʻiga zarar yetkazmoqda.
Yurtimizda bu kabi salbiy holatlarning oldini olish hamda oqibatlarini yumshatish borasida tizimli ishlar qilinmoqda. Davlatimiz rahbari tashabbusi bilan bundan 3-yil oldin boshlangan “Yashil makon” umummilliy loyihasi bugun chinakam xalq harakatiga aylandi. Har yili bahor va kuzda daraxt koʻchatlari ekish ishlari tizimli ravishda tashkil qilinmoqda. Tabiatni asrab-avaylash va himoya qilish, koʻkalamzorlashtirish ishlarini jadallashtirish va yashil maydonlarni kengaytirish borasida mazkur loyiha muhim qadam boʻldi, desak aslo mubolagʻa emas.
Amudaryo tumanida ham “Yashil makon” umummilliy loyihasi doirasida samarali ishlar amalga oshirilmoqda. Loyiha doirasida tuman hokimi Sobir Xoʻjametov tashabbusi bilan tumanning Beshtom mahallasi hududida katta maydonda bogʻ barpo qilinmoqda. Bogʻ uchun moʻljallangan maydon obodonlashtirilib, yerni koʻchat ekishga tayyorlash ishlari sifatli amalga oshirilmoqda. Bu jarayonda hokim oʻrinbosarlari, korxona-tashkilotlar rahbarlari, 49ta ovul va mahallalar “yettiligi” aʼzolari faol qatnashib, bogʻ barpo qilish uchun ajratilgan maydonda obodonlashtirish va koʻkalamzorlashtirish ishlariga munosib hissa qoʻshmoqdalar. Jamoatchilik yordami bilan bogʻ yaratish uchun ajratilgan ekin maydoni, ariqlar ichi begona oʻtlardan tozalanib, ekin yerlarni haydash ishlari sifatli amalga oshirilmoqda. Yurt obodligiga hissa qoʻshishdek xayrli ishda barcha masʼullar faollik koʻrsatib, tashkilotchilik va oʻzaro hamjihatlikda ishlarni sifatli bajarmoqdalar.
Maʼlumot tariqasida aytish joizki, 26-noyabr holatiga tumanda “Yashil makon” umummilliy loyihasi doirasida jami 270 mingga yaqin mevali va manzarali daraxt koʻchatlari ekilgan. Ayni kunlarda koʻchat ekish ishlari tegishli korxona-tashkilotlar, muassasalarga ajratib berilgan hududlarda izchillik bilan davom ettirilmoqda. Masʼullar faqat daraxt ekibgina qolmay, balki kelgusida ekilgan daraxtlarni parvarish qilishga ham alohida eʼtibor qaratishni zimmalariga olishgan.
“Yashil makon” umummilliy loyihasi doirasida mamlakatimiz shaharlarini aholiga qulay, ekologik toza va yashash uchun barcha imkoniyatlar mavjud boʻlgan hududga aylantirish, ularning koʻkalamzorlashtirish darajasini yanada oshirish, shahar va tumanlarda “jamoat parklari”ni tashkil etish borasida ham amaliy ishlar olib borilmoqda.
Yashab turgan joyimizni ozoda saqlab, bizdan keyingi avlod ham munosib tabiiy muhitda yashashlari uchun sharoit yaratish zimmamizdagi masʼuliyatli vazifamizdir. Bugun biz tabiatga mehr va eʼtibor bersak, kelajak avlod ham munosib ekologik sharoitda yashaydi. Shunday ekan, yer va suv resurslarini, tabiatni, ekologik tizimni asrash hamda daraxt koʻchatlarini ekib, bogʻlar, yashil maydonlar yaratishga hissa qoʻshish har birimizning insoniy burchimizga aylanmogʻi kerak.
Charos Arslonova, tuman hokimligining Axborot xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
