Is gazidan zaharlanishning oldini olish yuzasidan yigʻilish boʻlib oʻtdi

Amudaryo tumani hokimligining majlislar zalida kuz-qish mavsumiga puxta tayyorgarlik koʻrish, favqulodda vaziyatlarning oldini olish, is gazidan zaharlanishning oldini olish yuzasidan yigʻilish boʻlib oʻtdi.

Yigʻilishda Qoraqalpogʻiston Respublikasi Ichki ishlar vaziri polkovnik Baxtiyar Torebekov, Favqulodda vaziyatlar boshqarmasi boshligʻi podpolkovnik Azamat Davletov, tuman hokimi Sobir Xoʻjametov, sektor rahbarlari, hokim oʻrinbosarlari, boʻlimlar, tashkilotlar rahbarlari hamda masʼullari, shuningdek 49 ta ovul, mahallalar “yettiligi” masʼullari ishtirok etdilar.

Yigʻilishda Qoraqalpogʻiston Respublikasi Ichki ishlar vaziri polkovnik Baxtiyar Torebekov hamda Favqulodda vaziyatlar boshqarmasi boshligʻi podpolkovnik Azamat Davletov soʻzga chiqib, kuz-qish mavsumini betalafot oʻtkazish maqsadida tayyorgarlik ishlarini yanada jadallashtirish lozimligi, is gazidan zaharlanishning ayanchli oqibatlari va uning oldini olish boʻyicha aholi oʻrtasida tushuntirish-targʻibot ishlarini kuchaytirish, uyma-uy yurib, aholi xonadonlarida isitish qozonlarining va dudburonlarning mavsumga tayyorgarlik holatini oʻrganish va nazoratni kuchaytirish, mavjud kamchiliklarni tezkorlik bilan bartaraf qilish zarurligi xususida soʻz yuritdilar.

Qayd etish joizki, is gazidan zaharlanish – inson organizmiga is gazi kirishi oqibatida rivojlanadigan oʻtkir patologik holat boʻlib, hayot va salomatlik uchun xavflidir va malakali tibbiy yordamsiz oʻlimga olib kelishi mumkin.

Havo haroratining keskin oʻzgarishi, kunlarning sovishi issiqlik taʼminoti va isitish jihozlariga boʻlgan ehtiyojimizni oshiradi. Isitish manbalaridan notoʻgʻri foydalanish oqibatida is gazi bilan bogʻliq koʻngilsiz hodisalar, eng achinarlisi, favqulodda vaziyatlar yuzaga kelib, insonlar qurbon boʻlishi mumkin.

Statistik maʼlumotlarga koʻra, ob-havo keskin sovigan kunlarda sodir boʻlayotgan favqulodda vaziyatlarning aksariyati is gazidan zaharlanish holati bilan bogʻliq. Ushbu zaharli gaz xonadonlarimizda foydalaniladigan tabiiy va suyultirilgan gaz, koʻmir, oʻtin va boshqa shu kabi yoqilgʻi manbalarining toʻliq yonmasligi natijasida paydo boʻladi.

Is gazi rangsiz va hidsiz gaz boʻlib, nafas yoʻllari orqali qonga soʻrilganda organizmni, xususan, markaziy asab tizimini jiddiy zararlashi bilan xavflidir. Inson is gazi bilan zaharlangan havodan nafas olib tursa ham, hech narsani sezmaydi, shu bois, is gazidan zaharlanib, vafot etish ehtimoli yuqori. Bu holat koʻpincha dudburonlarning tiqilib yoxud ishlamay qolishi, gaz yonishi uchun havo yetarli boʻlmaganda kuzatiladi. Profilaktik maqsadlarda yongʻin xavfsizligi qoidalariga amal qilish kerak. Uyda zaharlanishga yoʻl qoʻymaslik uchun nosoz gaz va isitish moslamalaridan foydalanmaslik tavsiya etiladi.

Maʼlumot tariqasida aytish joizki, tuman Favqulodda vaziyatlar boʻlimi tomonidan aholi uy-joylaridagi va koʻp xonadonli uylardagi isitish qozonlari va pechlaridan xavfsiz foydalanish qoidalariga rioya etish holatlarini tizimli oʻrganish hamda aniqlangan muammo va nosozliklarni bartaraf etilish va dudburonlarni tozalash borasida samarali ishlar amalga oshirilmoqda.

Favqulodda vaziyatlarning oldini olish maqsadida mahallalar kesimida uyma-uy yurib xonadon egalariga yongʻinga qarshi tushuntirish ishlari olib borilmoqda. Shu maqsadda, joylarda amalga oshirilayotgan ishlarni muvofiqlashtirish va nazorat qilish uchun tezkor shtab va ishchi guruhi tuzilgan boʻlib, tuman Favqulodda vaziyatlar boʻlimi tomonidan 2024-yilning oʻtgan davri mobaynida, jami 12 ming 563ta aholi yashash hovli uylari oʻrganib chiqildi, 10 ming 687 ta xonadonlar isitish qozonlarining dudburonlari tozalandi.

Kuz-qish mavsumini betalafot oʻtkazish maqsadida tuman Favqulodda vaziyatlar boʻlimi xodimlari va tegishli soha vakillari bilan hamkorlikda xavf yuqori boʻlgan obʼektlarda, ijtimoiy soha obʼektlari, oʻrmonlarda, uy-joylarda hamda taʼlim obʼektlarida yongʻin xavfsizligini taʼminlash, fuqarolarning hayoti va mol mulkining daxlsizligini saqlash maqsadida amaliy ishlar qilmoqdalar.

Yigʻilishda bu borada oldinda turgan vazifalar xususida soʻz yuritilib, tegishli masʼullarga zarur topshiriqlar berildi.

Charos Arslonova, tuman hokimligining Axborot xizmati rahbari.