55-SONLI MAKTABDA YoNGʻIN XAVFSIZLIGI OYLIGI DOIRASIDA TADBIR OʻTKAZILDI

Kundalik turmushda binoni isitish maqsadida tabiiy gaz, koʻmir va boshqa yoqilgʻi mahsulotlaridan keng foydalaniladi. Kuzgi-qishki mavsumda yoqilgʻi mahsulotlariga boʻlgan talab va ehtiyoj yanada ortadi. Bu jarayonda har bir fuqarodan yongʻin xavfsizligi qoidalariga puxta amal qilish, mavjud qoidalarga eʼtiborli boʻlish talab etiladi. Chunki salgina loqaydlik nafaqat kichik koʻngilsizliklarga, balki juda katta talafotlarga, inson hayoti uchun xavfli boʻlgan, butun umr tuzatib boʻlmas darajadagi kuyish bilan bogʻliq nogironliklarga, hatto yoʻqotishlarga olib kelishi mumkin.

Shuni alohida qayd etish kerakki, aholining asosiy qismi yongʻin xavfsizligi qoidalarini yaxshi bilishlariga qaramasdan, salgina eʼtiborsizliklari tufayli ayrim holatlarda oʻz xonadonlarida yongʻin chiqishiga oʻzlari sababchi boʻlishmoqda. Bunday holatlar asosan tabiiy gaz quvurlariga gaz plitalarini oʻzboshimchalik bilan, taqiqlangan rezina shlanglar orqali yongʻin xavfsizligiga zid ravishda ulab foydalanish sababli yuz bermoqda. Natijada ana shunday beparvo fuqarolar aybi tufayli kelib chiqqan yongʻinlar oqibatida koʻplab xonadonlar jiddiy zarar koʻrmoqda. Bu esa oila aʼzolarining moddiy zarar koʻrib, kuyish bilan bogʻliq tan jarohatlari olishlariga sabab boʻlmoqda.

Favqulodda vaziyatlarning oldini olish va ularni bartaraf etish boʻyicha Hukumat komissiyasi yigʻilishining 2024-yil 30-oktyabrdagi 2-son bayoniga muvofiq yurtimizda 2024-yil 15-noyabrdan 15-dekabrgacha boʻlgan davrda oʻtkazilishi koʻzda tutilgan “Yongʻin xavfsizligi oyligi” ana shunday noxush holatlarning oldini olishga qaratilgani bilan juda katta ahamiyatga ega.

Ayni kunlarda Amudaryo tumani Favqulodda vaziyatlar boʻlimi tomonidan oylik doirasida yongʻin xavfsizligini taʼminlash boʻyicha aholining bilim va koʻnikmalarini oshirish, uy-joy fondini yongʻin xavfsizligi talablariga muvofiq holga keltirish maqsadida oʻquv seminarlari, maxsus taktik-oʻquv mashgʻulotlari oʻtkazilmoqda.

Oylik doirasida tumanning Oybek nomli mahallasi hududidagi 55-sonli maktabda oʻqituvchi va oʻquvchilar ishtirokida favqulodda vaziyatlarning hamda sodir boʻlishi mumkin boʻlgan yongʻinlarning oldini olish boʻyicha koʻrgazmali vositalar asosida profilaktik uchrashuv oʻtkazilib, ishtirokchilarga yongʻin xavfsizligi qoidalariga doir tavsiyanomalar, zarur tushunchalar berildi.

Uchrashuv davomida yongʻinlarning kelib chiqish sabablari, is gazidan zaharlanish yoki havo-gaz aralashmasining chaqnashi bilan bogʻliq holatlarda harakatlanish boʻyicha koʻrgazmali vositalar asosidagi maʼlumotlar ham taqdim etilib, bu boradagi ishtirokchilar tomonidan tushgan savollarga masʼullar atroflicha, keng turda tushunchalar ham berdilar.

Xonadonlarda yongʻin kelib chiqmasligi, qolaversa, butun umr mehnat qilib bunyod etilgan imoratlar yongʻin tufayli yaroqsiz holga kelib qolmasligi, bundan ham muhimi, oʻzimiz va oila aʼzolarimizning salomatligimiz, tinch-osoyishtaligimizni taʼminlash, eng avvalo, har bir insonning oʻziga, yongʻin xavfsizligi qoidalariga qatʼiy amal qilishlariga bogʻliq.

Shunday ekan, qadrli yurtdoshlar, fuqarolar, idora va tashkilotlar rahbarlari, oʻtkazilayotgan “Yongʻin xavfsizligi oyligi”da faol ishtirok etib, yongʻin hamda boshqa favqulodda vaziyatlar sodir boʻlganda toʻgʻri harakatlanish boʻyicha bilim va koʻnikmalaringizni oshirib borishingizni iltimos qilamiz.

Amudaryo tumani FVB.