40-SONLI MAKTAB TAShKIL ETILGANINING 40 YILLIGI KENG NIShONLANDI

Maktab – bu ilm va maʼrifat oʻchogʻi, maʼnaviyat va ziyo maskanidir. Bu yerda bolalar nafaqat fanlarni oʻrganadilar, balki hayot uchun zarur boʻlgan muhim koʻnikmalar va qadriyatlarni ham egallaydilar. Maktabning asosiy vazifasi – shaxsni komil inson sifatida tarbiyalash, uning ijtimoiy va intellektual rivojlanishiga koʻmaklashishdir. Maktab bagʻrida bolalar oʻzlarining iqtidor va qobiliyatlarini namoyon qiladilar va hayotning turli sohalarida muvaffaqiyatga erishish uchun zarur boʻlgan asoslarni yaratadilar. Maktab nafaqat taʼlim olish yillarida, balki insonning butun hayoti davomida uning rivojlanishiga taʼsir koʻrsatadi va kelajakdagi muvaffaqiyatlari uchun poydevor yaratadi. Shu bois, kim qaysi yoshda, qanday lavozimda boʻlmasin, oʻzi tahsil olgan maktab sari hayajon bilan talpinadi.

Amudaryo tumanidagi 40-sonli umumiy oʻrta taʼlim maktabi 1984-yilning 1-sentyabrida ish boshlagan boʻlib, minglab oʻquchilar uchun hayotbaxsh ziyo maskani vazifasini oʻtagan va oʻtab kelmoqda. Joriy yilda ushbu taʼlim maskani ish boshlaganiga 40-yil toʻlmoqda. Shu munosabat bilan Oʻqituvchi va murabbiylar kuni arafasida katta tadbir tashkil qilindi. Tadbirga uzoq yillar ushbu dorgohda yoshlarga taʼlim-tarbiya berib, ayni kunlarda nafaqada keksalik gashtini surayotgan faxriy oʻqituvchi va murabbiylar, ushbu muassasa ostonasidan uchirma boʻlib, xalq xoʻjaliginining turli sohalarida samarali mehnat qilib, el-yurt eʼtirofiga sazovor boʻlgan bitiruvchilar, mahalla faollari va keng jamoatchilik vakillari taklif qilindi.

Ishtirokchilar maktab hovlisida tantanali tarzda kutib olindi.

Faollar zalida boʻlib oʻtgan uchrashuvda soʻzga chiqqanlar ushbu taʼlim muassasasining tumanimiz ijtimoiy hayotida tutgan oʻrni va bu maskanda faoliyat yuritgan davrlari haqida iliq taassurotlarini yodga oldilar.

Maktab tashkil qilinganidan buyon unga Oʻzbekiston xalq taʼlimi aʼlochisi Arslon Kamolovich Niyozov, Qoraqalpogʻiston Respublikasi Xalq oʻqituvchisi va Qoraqalpogʻiston Respublikasida xizmat koʻrsatgan yoshlar murabbiy Qodirbergan hoji Jumamuratov, Oʻzbekiston xalq taʼlimi aʼlochisi Ahmad Masharipov va Qoraqalpogʻistonda xizmat koʻrsatgan madaniyat xodimi Oʻgʻiljon Yakubovalar rahbarlik qilishgan. 2004-yilning yanvar oyidan beri maktabni Qoraqalpogʻiston Respublikasi Xalq oʻqituvchisi Sanobar Xoʻjamurotova boshqarib kelmoqda.

Uning rahbarligida maktab nafaqat oʻquvchilar soni, balki taʼlim sifati va samaradorligi, kadrlar salohiyati, oʻquvchilar erishayotgan natijalar va bitiruvchilarning oliy taʼlim muassasalariga kirish koʻrsatkichi boʻyicha tumanda yetakchi taʼlim dargohlaridan biri boʻlib kelmoqda.

Hozirda maktabda 1 ming 614 nafar oʻquvchi tahsil oladi va ularga 110 nafar oʻz kasbining ustalari boʻlgan malakali oʻqituvchilar dars berishadi. Ularning 26 nafari oliy  va 36 nafari 1-toifali, 13 nafar ingliz tili fani oʻqituvchilarining barchasi xorijiy tilni oʻqitish boʻyicha xalqaro va unga tenglashtirilgan sertifikatga ega yuqori malakali pedagoglardir. 2023-2024 oʻquv yilida mazkur maktabning 53 nafar oʻquvchilari chet tili fanidan xalqaro va unga tenglashtirilgan sertifikatga ega boʻlib, tumanda yetakchilik qildi. Prezident sovrini uchun oʻtkazib kelinayotgan “Xorijiy tillarni oʻqitish boʻyicha eng yaxshi maktab” tanlovida ham 40-sonli maktab jamoasi 3-yildan buyon tumanda gʻoliblikni qoʻlga kiritib kelmoqda.

Oʻtgan oʻquv yilida 11-sinfni tamomlagan oʻquvchilarning 114 nafari oliy taʼlim muassasalariga oʻqishga kirib, oʻrtacha 98,4 ball toʻpladilar va bu borada tumanda eng ilgʻor maktablar uchligidan joy oldilar.

Shuningdek maktab jamoasi va oʻquvchilari olimpiadalar va turli tanlov hamda bellashuvlarda, musobaqalarda gʻoliblar safidan joy olib, yuqori natijalarga erishmoqdalar. Jumladan, “Zukko kitobxon”, “Turon teatri”, “Besh tashabbus olipiadasi” kabi tanlovlarda erishilgan yuqori natijalar maktab reytingining yanada oshishida muhim omil boʻlmoqda.

Yaqindagina maktabning ona tili va adabiyot fani oʻqituvchisi Iqbol Yusufova “Yilning eng yaxshi oʻzbek tili fani oʻqituvchisi” tanlovining Qoraqalpogʻiston Respublikasi bosqichida birinchi oʻrinni egallagani, shuningdek maktabning ikki nafar 4-sinf oʻquvchilari Prezident maktabiga qabul qilingani bilan maktab jamoasi haqli ravishda faxrlanishadi.

Bu kabi yutuqlar maktab oʻqituvchilari oʻrtasida sogʻlom raqobat muhiti mavjudligi, rahbariyatning pedagoglar bilan ishlashish va ularni ragʻbatlantirish borasida toʻgʻri strategiyani yoʻlga qoʻygani hamda oʻquvchilarning bilim olishga chanqoqligi, jamiyat hayotida faol ishtirok etishga boʻlgan intilishlarining yorqin misolidir.

Faxriy oʻqituvchilar va sobiq oʻquvchilarning iliq dil izhorlari uchrashuvga tashrif burganlar koʻz oldida olis va yaqin oʻtmish manzaralarini qayta gavdalantirdi.

Chindan ham, maktabning inson kamolotidagi oʻrnini hech narsa bilan qiyoslab boʻlmaydi. U insonning shaxsiy va kasbiy rivojlanishida muhim vosita boʻlib, kelajakdagi muvaffaqiyatlariga yoʻl ochadi. Maktab – bu maʼrifat va bilimning chirogʻi, jamiyatning kelajagi uchun poydevor qoʻyladigan, yoshlarni vatanparvarlik, mehnatsevarlik va boshqa muhim fazilatlarga oʻrgatadigan maskandir. Bu maskanda ustoz va murabbiylar oʻz shogirdlariga bilim berish bilan birga ularni hayotga tayyorlaydilar va shaxs sifatida rivojlanishiga yordam beradilar. Shu sababli ham maktablarning davlat va jamiyat uchun ahamiyati beqiyos, oʻqituvchi va murabbiylarning esa el-yurt oldida hamisha qadri balanddir.

Amudaryo tumanidagi 40-sonli maktab ham mana shunday ziyo va maʼrifat oʻchogʻi, taʼlim va tarbiya maskanidir. Ishonamizki, yana yuz yillar, balki undan-da koʻproq vaqt mobaynida ushbu taʼlim maskanidan minglab, oʻn minglab bitiruvchilar uchirma boʻladilar va ular ham yurt tinchligi va taraqqiyoti, xalq farovonligi yoʻlida fidokorona mehnat qilib, ustozlarining yuzini yorugʻ qiladilar, taʼlim maskanlarining nomlarini yanada yuksaltiradilar.

Gʻ.Yeshniyozov