AHOLI XONADONLARINI KUZ-QISh MAVSUMIGA TAYYoRLASh BOʻYIChA KOʻRGAZMALI OʻQUV SEMINARI OʻTKAZILDI

Mamlakatimizda har yili kuz-qish mavsumi boshlanishi oldidan joylardagi Favqulodda vaziyatlar masʼul xodimlari tomonidan aholi xonadonlarining holati atroflicha oʻrganilib, mavjud kamchiliklarni bartaraf etish chora-tadbirlari koʻriladi. Favqulodda vaziyatlarda qanday harakat qilish zarurligi tushuntirilib, kerakli maʼlumot va tushunchalar beriladi. Shu bilan birgalikda soha vakillari aholi xonadonlaridagi isitish tizimlari holatini oʻrganish natijasida aniqlangan kamchiliklarni bartaraf etishida aholiga yaqindan yordam berishadi. Masʼullar kuz-qish mavsumini betalafot oʻtkazish maqsadida kam taʼminlangan, ijtimoiy himoyaga muhtoj oilalarda boʻlishib, ularning xonadonlaridagi isitish tizimlaridagi kamchiliklarni bartaraf etishda amaliy yordam koʻrsatishadi.

Amudaryo tumanida ham kuz-qish mavsumiga tayyorgarlik koʻrish borasidagi amaliy ishlar belgilangan reja asosida olib borilmoqda. Soha mutaxassislari tomonidan aholi vakillarini jalb qilgan holda amalga oshirilayotgan targʻibot-tashviqot tadbirlari tumanning eng chekka hududlarida ham oʻtkazilmoqda.

Joriy yilning 17-sentyabr kuni Qoraqalpogʻiston Respublikasi Favqulodda vaziyatlar boshqarmasi boshligʻi, podpolkovnik Azamat Davletov va Amudaryo tuman hokimi – fuqaro muhofazasi boshligʻi Sobir Xoʻjametovlar boshchiligida tuman hokimligi binosida boʻlib oʻtgan oʻquv seminarida ham favqulodda vaziyatlarda aholini ishonchli himoyalash, kuz-qish mavsumini betalafot oʻtkazish boʻyicha birinchi galda amal qilinishi zarur boʻlgan saʼy-harakatlar haqida soʻz yuritildi. Seminarda asosan kuz-qish mavsumiga tayyorgarlik ishlarini jadallashtirish, aholining is gazidan zaharlanishining oldini olish maqsadida xonadonlarni zamonaviy isitish tizimiga oʻtkazish masalasi muhokama qilindi.

Koʻrgazmali oʻquv seminarida tegishli korxona-tashkilotlar rahbarlari, ovul va mahalla fuqarolar yigʻinlari raislari hamda Amudaryo tuman Maktabgacha va maktab taʼlimi boʻlimi tasarrufidagi maktablarning direktorlari ishtirok etdilar.

Seminar kun tartibidagi asosiy masala – aholi xonadonlarini kuz-qish mavsumiga tayyorlash va mavjud kamchiliklarni qisqa muddatlarda bartaraf qilish, kuz-qish mavsumini betalafot oʻtkazish yuzasidan Amudaryo tuman Favqulodda vaziyatlar boʻlimi masʼul mutaxassislari koʻrgazmali vositalar orqali zarur tushunchalar berdilar.

Shuningdek, Favqulodda vaziyatlar xodimlari izgʻirinli kunlar boshlanmasidan burun tegishli aholi xonadonlaridagi isitish tizimlarini zamonaviy isitish tizimiga va gorelkalarga oʻtkazish kerakligini alohida taʼkidlab, isitish qozonlarining dudburonlarini oʻrnatish qoidalarini amaliy tarzda koʻrsatib berdilar.

Bundan tashqari, ijtimoiy himoyaga muhtoj oilalarning isitish qozonlarini taʼmirlashda amaliy yordam berish zarurligi qayd etilib, har bir mahallada kamida 2tadan dudburon tozalaydigan guruh tashkil qilish boʻyicha ovul va mahalla fuqarolar yigʻinlari raislariga topshiriqlar berildi.

Robiya Yoʻldosheva.