ShOMANAYDA JAŃA YeKİ OBʼEKT PAYDALANIWǴA TAPSIRILDI

Shomanay rayonında bir kúnde yeki jańa obʼekt – Bántlikke kómeklesiw hám Máhálle orayları imaratları paydalanıwǵa tapsırıldı.

Prezidentimiz usı jıl 20-21-yanvar kúnleri respublikamızǵa saparı dawamında Qaraqalpaqstan Respublikasında 2017-jıldıń baǵdarlamasına qosımsha túrde bir qatar jańa joybarlardı ámelge asırıw, sonnan Shomanay rayonındaǵı jaramsız jaǵdayǵa kelip qalǵan rayonlıq bántlikke kómeklesiw orayınıń imaratınıń ornına basqa jańa adminstrativlik imarat qurıw boyınsha tapsırma bergen yedi.

Bul tapsırmanı orınlaw boyınsha jumıslar dárhal baslap jiberildi hám Qaraqalpaqstan Respublikası Miynet ministrligi tárepinen imarattıń úlgi joybarı belgilendi. Rayon hákiminiń arnawlı qararı menen ulıwma maydanı 373,69 kvadrat metrlik jer maydanı ajıratılıp, joybar bahası 512,5 million sum bolǵan usı obʼektti «Kegeyli qurılıs montaj» kárxanası qurılısshıları óz waqtında pitkerdi.

Sonday-aq, Ózbekistan Respublikası Prezidentiniń «Máhálle institutın jáne de muwapıqlastırıw is-ilajları haqqında»ǵı Pármanın orınlaw tiykarında ulıwma joybar bahası 765 million sum bolǵan «Máhálle» orayınıń zamanagóy imaratı da qısqa waqıt ishinde boy tikledi.

Ózbekistan Respublikası Konstitutsiyasınıń 25-jıllıǵı qarsańında usı yeki sotsiallıq áhmiyettegi imaratlardıń gilti óz iyelerine saltanatlı jaǵdayda tapsırıldı.

İlajlarǵa Qaraqalpaqstan Respublikası Ministrler Keńesi Baslıǵı Q.Sariyev qatnastı.

Á.Jiyemuratov,

Qaraqalpaqstan xabar agentliginiń xabarshısı.

http://kknews.uz