Qanlıkól rayonı mexanizatorı «Shuhrat» medalı menen sıylıqlandı
Ózbekistan Pespublika Prezidenti Sh.Mirziyoyev «Ózbekistan Pespublikası awıl xojalıǵı xızmetkerleri kúni» múnásibeti menen mámleketimizdiń agroekonomikalıq potentsialın arttırıw hám reformalardı ámelge asırıw jumıslarındaǵı úlken xızmetleri, awıl xojalıǵı ónimlerinen mol zúráát jetistirip, xalqımızdıń ırısqı – nesiybesi hám abadanlıǵın, yelimizdiń ekonomikalıq qúdiretin hám eksportın rawajlandırıw, azıq-awqat qáwipsizligin támiyinlew jumıslarına qosqan salmaqlı úlesi, agrar sektorlarda nátiyjeli jetiskenliklerdi ámelge asırıw hám mámleketlik dástúrlerdiń orınlanıwın támiyinlew, jerlerdiń melorativ jaǵdayın jaqsılaw, aldıńǵı agrotexnologiyalardı ámeliyatqa yengiziw barısındaǵı úlken xızmetleri menen jámiyetimizdegi belsendiligi ushın bir qatar pidayılardı sıylıqladı.
Húrmetli Prezidentimizdiń usı jıl 7-dekabr kúngi Pármanı tiykarında, «Qaraqalpaqstan agroservis MTP» juwapkerligi sheklengen jámiyetiniń Qaraqalpaqstan Pespublikası Qanlıkól rayonı filialı mexanizatorı Allaniyazov Muratbay Maxsetovich «Shuhrat» medalın alıwǵa miyassar boldı.
Házirgi kúnde Allaniyazov Muratbay rayondaǵı awıl xojalıǵı tarawında óziniń iskerligi menen qatarındaǵı jas mexanizatorlarǵa úlgi bolmaqta.
▶
