Qanlıkól rayonında xalıqqa hám sotsiallıq taraw obʼektlerine kómir hám kómir briketi tarqatıldı

Ózbekistan Respublikası Prezidentiniń 2017-jıl 22-iyun kúngi «Respublika ekonomikası hám sotsiallıq tarawlardı 2017-2018-jılları gúzgi-qısqı máwsiminde turaqlı islewge kompleks tayarlawdı támiyinlew is-ilajları haqqında»ǵı qararı xalqımızdıń qısqı dáwirindegi jumıslardı aldın ala ámelge asırıwǵa qaratılǵan.

Qarar negizinde Qanlıkól rayonındaǵı jumıs alıp barıp atırǵan sotsiallıq obʼektlerdiń gúzgi-qısqı dáwirin qıyınshılıqsız ótkeriw maqsetinde, rayon aymaǵındaǵı rayonlıq xalıq bilimlendiriw bólimine qaraslı ulıwma bilim beriw mektepleri menen mektepke shekemgi bilimlendiriw mekemeleri hám meditsinalıq xızmet kórsetiwshi mekemelerge sapalı kómir hám kómir briketin jetkerip beriw jumısları ámelge asırıldı.

Jumıslar barısında, Qanlıkól rayonlıq xalıq bilimlendiriw bólimine qaraslı, 23 ulıwma bilim beriw mektepleri menen 11 mektepke shekemgi bilimlendiriw mekemesine jámi 227 tonna qattı janılǵı (145 tonna kómir, 82 tonna kómir briketi) ónimi jetkerilip berildi. Sonday-aq, rayon orayındaǵı kóp tarmaqlı poliklinika hám meditsina birlespesi menen awıllıq shıpakerlik punktlerine jámi 5 tonna qattı janılǵı (kómir hám kómir briketi) ónimleri tarqatıldı.

Sonıń menen birge, rayon xalqınıń qıs máwsimin kewildegidey ótkeriw ushın  1 tonna kómir ushın 146 400 swm, al kómir briketi ushın 238 000 swm yetip belgilengen bahada qattı janılǵı ónimleri jetkerip berilmekte.