Qońıratta rayonlar aralıq AİJSke diagnoz qoyıw laboratoriyası jumıs alıp barmaqta

Jer júzilik den sawlıqtı saqlaw shólkeminiń maǵlıwmatlarına qaraǵanda, dúnyada AİJS penen kesellengenler sanı 34 milliondı quraydı. Bir kúnde shama menen 3400 adam AİJS infektsiyasın ózine juqtırıp almaqta.

Búgin global mashqalalardıń birine aynalǵan bul kesellik – adamnıń immunitet jetispewshiliginen kelip shıǵatuǵın sozılmalı juqpalı kesellik bolıp yesaplanıp, virus nawqastıń organizminde pútkil ómiri dawamında saqlanıp qaladı. İnfektsiya dáslep jasırın tárizde, bul dáwir bir neshe ay, 5-10-jılǵa, yaki onnan da kóbirek waqıt dawam yetiwi múmkin.

Jasırın dáwirde keselliktiń hyesh qanday belgileri gúzetilmeydi. Áyne usı jasırın dáwirde nawqaslar ózleri bilmegen halda AİJS ti basqalarǵa juqtırıw qáwpi júdá joqarı. Keselliktiń rawajlanıw protsessinde qısqa waqıt ishinde keskin azıp ketiw, dene ıssılıǵınıń tez-tez kóteriliwi, ishtiń ótiwi, sebepsiz uzaq sozılǵan jótel, qáwipli óspelerdiń rawajlanıwı, awız boslıǵı hám túrli aǵzalardıń jara bolıwı sıyaqlı klinikalıq belgiler bayqala baslaydı.

Zamanagóy meditsina qanshelli rawajlanǵanı menen, házirgi kúnde AİJS penen kesellengen adamdı pútkilley virustan yemlewshi dári-dármaq joq. Buǵan sebep virustıń júdá ózgeriwsheńligi. Hár bir puqara ózinde gúmanlı halatlardı sezgen jaǵdayda ıqtıyarıy ráwishte tekseriwden ótiwi múmkin.

Bunıń ushın Pespublikamızda AİJS na qarsı gúresiw orayı hám Qońırat rayonında rayonlar aralıq AİJSke diagnoz qoyıw laboratoriyası jumıs alıp barmaqta. Ózbekistan Pespublikasının «Adamnıń immunitet jetispewshiligi virusı keltirip shıǵaratuǵın keselliktiń (AİJS infektsiyası) tarqalıwına qarsı gúresiw haqqında»ǵı Nızamına muwapıq, tekseriwler sır saqlanǵan halda alıp barıladı. Nátiyje qanday bolıwına qaramastan sır saqlanıwına kepillik berilip, nawqastıń jasaw, jumıs hám oqıw ornına, sonday-aq, áskeriy xızmet hám azatlıqtan ayırıw orınları boyınsha xabar beriw qatań qadaǵan yetiledi.

Hár qanday kesellikti dawalaǵannan góre, onıń aldın alǵan abzal. Salamat turmıs tárizine boysınıw hár qanday keselliktiń aldın alıwdıń yeń isenimli jolı.

B.BEGMUPATOVA, Qońırat rayonlar aralıq AİJSke tekseriw laboratoriyası basqarıwshısı.