Rossiyanıń «Kultura» telekanalı İ.V.Savitskiy muzeyi haqqında hújjetli film tayarlamaqta
Rossiyanıń «Kultura» telekanalı Ózbekistanda, sonıń ishinde, Qaraqalpaqstanda mádeniyat hám kórkem ónerdiń rawajlanıwı tuwralı 39 minuttan ibarat hújjetli filmdi súwretke alıw maqsetinde yelimizge keldi. Bul haqqında Qaraqalpaqstan xabar agentligi málim yetpekte.
Ózbekistan Elektron ǵalaba xabar quralları milliy assotsiatsiyası hám Rossiyanıń «Kultura» telekanalı dóretiwshi topar aǵzaları óz jumısın 30-noyabr kúni İ.V.Savitskiy atındaǵı Qaraqalpaq mámleketlik kórkem óner muzeyinde rus hám ózbek xudojnikleriniń portret janrı boyınsha shólkemlestirilgen kórgizbe menen tanısıwdan basladı.
Qaraqalpaqstan Respublikasında tariyxıy-mádeniy yestelikler oǵada kóp. Olar dúnyanıń kóplegen yellerinen kelip atırǵan turistlerdiń dıqqat-itibarında ózine tartpaqta. Hújjetli film obʼektleri yetip Nókis mádeniyat hám kórkem óner kolledjindegi jas xudojniklerdiń dóretpeleri menen tanısıw hám Xojeli qalasındaǵı «Mizdaxxan» yesteligi tańlanǵan.
«Kultura» telekanalı dóretiwshilik toparı Moynaq rayonında da boldı.
Maǵlıwmat ornında aytatuǵın bolsaq, dóretiwshi topardıń usı ilajları hújjetli filmdi súwretke alıwdıń birinshi basqıshı bolıp, sońǵı basqısh bolsa, kelesi jıdıń mart ayında dawam yettiriledi.
Yesletip ótemiz, usı jıldıń aprel ayında Prezidentimiz Shavkat Mirziyoyevtıń Rossiya Federatsiyasına sapar yetiwi sheńberinde İ.V.Savitskiy atındaǵı qaraqalpaq mámleketlik kórkem óner muzeyi tárepinen Moskvadaǵı A.S.Pushkin atındaǵı súwretlew kórkem óneri muzeyinde (5-aprelden 31-mayǵa shekem) «Nókis ǵáziynesi» atlı kórgizbe shólkemlestirilgen yedi.
http://kruz.uz
▶