Ónerliniń qolı altın

«Ónerliniń — qolı altın» degen dana xalqımız. Shınında da óneri bar insan hesh qashan hesh nársege mútájlik sezbeydi. Ónerli adam kópshiliktiń mútájin pitkerip, xalıq alǵısına miyasar boladı.

Ótebay Turekeyev 41-jıl, ápiwayı toǵay tal hám qara tal aǵashınan «qara úy» soǵıw menen shuǵılandı. «Áke jolın – tay basar» degenindey balası Azamatta ákesiniń qasınan bir yeli shıqpay, bul kásiptiń álwan sırların qunt penen úyrendi. Mine búgin, ol, óz isiniń haqıyqıy ustası bolıp jetilisti. A.Turekeyev — bul ónerdi dawam yettirip atırǵan úshinshi áwlad bolıp yesaplanadı. 2006-jıldan baslap isbilermenlik jumısın baslaǵan ol, házirgi kúnde bul jerde 8 adam jumıs isleydi.

— Búgingi kúnde 6,8,10,12, qanatlı qara úylerdi buyırtpa boyınsha islep atırmız. Kara úy soǵıw kútá sabırdı talap yetedi. Sebebi, bir qara úy qoldan on altı márte ótedi. Mayda jumıs bolǵanlıqtan shıdam menen, tiykarǵısı mehir menen islew kerek – deydi, ónerment Azamat Turekeyev.

Yelimizde kishi biznes hám jeke isbilermenlikti qollap-quwatlaw, olardı xoshametlew maqsetinde bir qansha tańlawlar, kórgizbeler shólkemlestirilmekte. Atap aytqanda, respublikamız isbilermenleri, fermerleri hám ónermentleriniń qatnasıwında «Tashabbus» tańlawı ótkerilip kelinbekte. Ótken jıl «Tashabbus-2017» tańlawınıń respublikalıq basqıshında «Yeń jaqsı ónerment» baǵdarı boyınsha Azamat Turekeyev birinshi orınǵa ılayıq dep tabıldı hám usı jıldıń 16-17-may kúnleri Tashkent qalasındaǵı juwmaqlawshı basqıshqa qatnasıp laureat bolıp qayttı. Sonday-aq, ol usı jıl oktyabr ayında Moynaq rayonında ótkerilgen Ekofestivalda «Yeń jaqsı qaraúy bezegi» nominatsiyasın jeńip aldı.

Tańlawdaǵı tiykarǵı jetiskenlik ata-babalarımızdan ásirler boyı miyras bolıp kiyatırǵan qaraúylerdiń kópshilikke tanılıwına úles qostı. Yele de rayonımızdan Azamatqa usaǵan ónerment azamatlardıń qatarı kóbeye bersin dep qalamız.

Rauaj UTEPBERGENOV.