Shımbay ázelden ónermentler yeli. Qaraqalpaq Músinshisi haqqında sóz

Skulptor Dáribay Tájimuratov 1955-jılı Shımbay rayonında tuwılǵan. Qaraqalpaqstan Jaslar awqamı sıylıǵınıń laureatı. 1990-jıldan Ózbekistan Kórkem-óner akademiyası janındaǵı Ózbekistan xudojnikler dóretiwshilik birlespesiniń aǵzası. Ol músinshilik penen 1976-jıldan baslap shuǵıllanıp kelmekte. Yeń dáslepki jumısları Tashkent qalasında 1985-jılı «Qaraqalpaqstan mádeniyat kúnleri» sheńberinde, 1989-jılı Ashxabad qalasındaǵı kórgizbelerde qoyıldı. Sol waqqıttan baslap, onıń miynetleri qánigeler, xudojnikler, tamashagóyler hám kórkem óner ıqlasbentleri tárepinen joqarı bahalanıp kelmekte.

Házirgi kúnge shekem D.Tájimuratov Ózbekistan hám shet yellerdegi kórgizbelerde belsene qatnasıp kiyatır. Onıń dóretpeleri, atap aytqanda «Ana hám bala», «Jaslıq», «Dem alısta», «Idıs satıwshılar», «Jas jıraw», «Jas hayal», «Qaraqalpaq kelini», «Qayıqta», «Toǵız tońqıldaq, bir shińkildek», «Ǵarrı hám kempir», «Atlar», «Túye mingen kelinshek» hám basqa da jumısları xalıq folklorı menen jaqınnan tanıs milliy ózgesheliklerge iye xarakterlerdi baqlawshı músinshiniń bay fantaziyası menen usı obrazlardı ashıp beriwdegi sheberliginde ayqın kózge taslanadı.

Sonıń menen bir qatarda D.Tájimuratov ashıq hawada hám de arxitekturalı sheshimlerdegi dóretpeler avtorı retinde belgili. Usı kompozitsiyaları qatarında Shımbay qalasındaǵı «Hásiretli Ana», «Ómirbek laqqı» músinleri, Nókis qalasında házirgi «Qırıqqız», «İmperial», Xojeli qalasında «Karavan» restoranları, Taqıyatas qalasındaǵı «Faiz» kafesi hám basqalardı atap ótsek boladı.

Shımbay rayonı orayındaǵı Ómirbek laqqıǵa arnalǵan yestelik. Avtorı D.Tajimuratov.

Músinshi D.Tájimuratov 2013-jılı Tashkent qalasında bolıp ótken «Súwretlew óneri» festivalında qatnasıp altın medal menen sıylıqlandı. Qaraqalpaqstan Respublikası Mádeniyat hám sport isleri ministrligi tárepinen shólkemlestirilgen «Ardaqlaw -2015» tańlawında «Jıldıń yeń jaqsı músinshisi» dep tanıldı.

Ol xudojnikler jámáátine joqarı húrmetke iye, bárhama járdem qolın sozıwǵa tayar. Súwretlew hám qol óneri boyınsha ótkerilip atırǵan ilimiy-seminar, konferentsiyalardıń belsendi qatnasıwshısı, jaslar menen islesiwde sheberlik sabaqların ótip barıwshı tájiriybeli ustaz.

D.Tajimuratov balaları hám shákirtleri menen.

Sonıń menen birge Dáribaydıń dóretiwshilik islerin balası Ádil hám Sultan Tájimuratovlar dawam yetip kelmekte. Búgingi kúni onıń qolınan dóretilgen zergerlik buyımlarına xalqımız tárepinen talap kúshli. Atap aytqanda, ótken jılı Ǵárezsizlik bayramı qarsańında Nókis qalasındaǵı «Ayqulash juldızları» folklor ansambline, sonday-aq, Ayzada Nurımbetova firmasına tóbelik, háykel, bilezik, sırǵa hám taǵı basqa milliy ónermentshilik buyımların buyırtpa tiykarında jetkerip berdi. Jaqında Moynaq rayonında ótkerilgen ekofestivalda balası Sultan Tajimuratov óz dóretpeleri menen belsene qatnastı.

Aǵalar yarım táriypi,

Zulpı yanaǵına túser,

Saǵaǵına dizse marjan,

Oshal buǵaǵaǵına túser, — dep Ájiniyaz shayır Qaraqalpaq xalqınıń hayal-qızlarınıń gózzallıǵına gózzallıq qosatuǵın taǵınshaqlar haqqında da aytıp ótedi.

Tómende biz Sizlerge skulptor Dáribay Tajimuratovtın balası Adil Tajimuratov hám onıń shákirtleri Sultan Tajimuratov, Sadatdin Nazarovlardıń miynetleri menen tanıstıramız.

Shımbay rayonı hákimi O.Qazaqbayev 2017-jıl 29-dekabr kúni ótkerilgen bayram ilajında «Jıldıń yeń jaqsı ónermenti» nominatsiyasın Adil Tajimuratovqa tapsırmaqta.

Kelesi maqalamızda Shımbaylı úyshiler (qara úy) haqqında aytıp ótemiz.

Rawaj UTEPBERGENOV.