Nókiste jańa úlgidegi arzan turaq jaylar paydalanıwǵa tapsırıldı
Ózbekistan Respublikası Konstitutsiyasınıń 25-jıllıq bayramı aldınan paytaxtımızdaǵı «Qumbız awıl» mákan puqaralar jıyınınıń aymaǵında jańalanǵan úlgi joybarlar boyınsha qurılǵan arzan turaq jaylar paydalanıwǵa tapsırıldı.
Jańa turaq jaylardı paydalanıwǵa tapsırıw saltanatında Qaraqalpaqstan Respublikası Joqarǵı Keńesiniń Baslıǵı M.Yerniyazov qatnasıp, jıynalǵanlardı Tiykarǵı Nızamımız bolǵan Konstitutsiya kúni bayramı hám jańa qonıs jayları menen qutlıqladı. Bul haqqında Qaraqalpaqstan xabar agentligi málim yetti.
Ózbekistan Respublikası Prezidentiniń 2016-jıl 22-noyabrdegi «2017-2020-jıllarda qalalarda arzan kóp kvartiralı jaylardı qurıw hám rekonstruktsiyalaw baǵdarlamasın ámelge asırıw ilajları haqqında»ǵı qararın orınlaw sheńberinde respublikamızda keń kólemli jumıslar alıp barılmaqta. Qarardıń áhmiyeti sonda, bul turaq jaylar jeńillikli kreditler tiykarında qurılmaqta. Bul bolsa, xalqımızdıń, ásirese, kem támiyinlengen hám jas shańaraqlardıń zamanagóy jáne arzan úylerge bolǵan ósip baratırǵan talabın qanaatlandırıwǵa xızmet yetpekte.
Bir ǵana usı «Qumbız awıl» mákan puqaralar jıyınınıń aymaǵında 315 xanalı 7 turaq jay qurılıp, paydalanıwǵa tapsırılmaqta. Usı jıldıń yanvar ayında baslanǵan qurılıs jumısların «Nukus konstant injiniring», «Shoraxan qurılıs montaj», «Nókis isker», «Kegeyli jańa dáwir» juwapkershiligi sheklengen jámiyetleriniń azamat qurılısshıları óz waqtında sapalı yetip pitkerip, bayram qarsańında óz iyelerine sawǵa yetti.
— Konstitutsiyamızdıń sherek ásirlik bayramı biziń shańaraǵımız ushın qos quwanısh alıp keldi,-deydi Maqsetbay Tájimuratov. — Balam Aydosqa jańalanǵan úlgi joybar boyınsha qurılǵan úsh xanalı arzan turaq jay alıwǵa miyasar boldı. Jańa turaq jayda barlıq sharayatlar jaratılǵan. Bunıń ushın Prezidentimizge, respublikamız basshılarına shańaraǵımız atınan sheksiz minnetdarshılıq bildiremiz.
İlaj qatnasıwshıları jańa turaq jaylarda jaratılǵan sharayatlar menen tanıstı.
Jańa turaq jaylardı tapsırıw saltanatına Qaraqalpaqstan Respublikası Ministrler Keńesiniń Baslıǵı Q.Sariyev qatnastı.
makan.uz
▶
