МАЪНАВИЯТ МАСКАНИГА АЙЛАНГАН 1-СОНЛИ МАКТАБ КУТУБХОНАСИДА КИТОБХОН ЁШЛАР САФИ ОРТМОҚДА

Инсон билимни энг аввало китоблардан ўрганади. Китобларни бежизга билимлар калити дейишмайди. Кимки, китобларга ошно бўлса, тафаккури ва дунёқараши кенгаяди, илми ортиб, маънавияти юксалади. Шу сабабли юртимизда аҳолини, айниқса, ёшларни китобхонликка жалб этишга алоҳида эътибор қаратилиб, кенг имкониятлар яратилмоқда.

Амударё туманидаги amunews.uz веб-сайти таҳририятининг “Соғлом муҳит – соғлом ҳаёт” грант лойиҳаси доирасида ҳам ёшларнинг дунёқарашини ва маънавиятини юксалтириш, уларни ёт ғоя ва иллатлардан ҳимоя қилиш, улар ўртасида китобхонликни янада оммалаштиришга, китобхон ёшлар сафини оширишга қаратилган тадбирлар ташкил этилмоқда. Ушбу грант лойиҳаси доирасида Навоий номли маҳалла ҳудудидаги 1-сонли умумтаълим мактаби кутубхонаси фаолияти билан танишиш мақсадида мазкур маънавият масканига ташриф буюрдик.

Мактаб кутубхонаси нафақат ўқувчи-ёшлар балки, шу атрофдаги аҳоли учун ҳам севимли масканга айланган ва доим китобхонлар билан гавжум. Боиси ушбу файзли кутубхонада мактаб дарсликларидан ташқари, хилма-хил мавзудаги бадиий-илмий адабиётлар ҳам мавжуд. Кутубхонада китоблар билан тўла жавонлар жойлаштирилган хонадан ташқари, барча шароитларга эга бўлган шинамгина ўқув зали ҳам ташкил этилган. Бу ердаги дарслик ва ўқув-методик қўлланмалар сони 14 минг 323 дона бўлса, турли мавзулардаги бадиий адабиётлар 1236 тага етказилган.

Ушбу кутубхонада 2012 йилдан буён ишлаб келаётган кутубхона мудираси Ирода Алланиёзованинг ҳам китобхон ёшлар сафи ортишида ҳиссаси катта. У янги китоблар сонини кўпайтиришга, шу билан бирга бор китоблар ҳақида ўқувчи-ёшларга батафсил маълумотлар бериб боришга ҳаракат қилади. Ундан ташқари, китобхонлик ҳафталиклари, адабий кечалар ўтказиб, ўқувчиларнинг қизиқишларини янада ошириб боради. Ҳозирга кунда мактабда таълим-тарбия олаётган 734 нафар ўқувчидан 689 нафари кутухонага доимий аъзо бўлишган. Қолганлари эса шу ерга мунтазам равишда келиб, китоблар билан танишишади ва уларни ўқув залида муотлаа қилишади.

Деярли 1 асрлик тарихга эга бўлган ушбу 1-сонли мактабда ўқувчилар таълим-тарбия олишлари учун барча шароитлар яратилган. Мактаб 2023 йил апрель ойида “Open budget” лойиҳасида иштирок этиб ғолиб бўлди ва 1 млрд. 300 минг сўм эвазига мактаб замонавий кўринишга келтирилди.

Бугунги кунда мактабимизда 84 нафар ўқитувчи сал кам 800 ўқувчига таълим-тарбия бермоқда. Уларнинг 12 нафари олий, 34 нафари 1-тоифали ўқитувчилардир. Яқинда Президент соврини учун “Хорижий тилларни ўқитиш бўйича энг яхши мактаб” танловида мактабимиз инглиз тили фани ўқитувчилари фаол қатнашиб, 3-ўринни эгаллади ва 50 млн. сўмлик сертификатни қўлга киритишди. Шунингдек, 2023-2024 ўқув йилида мактаб битирувчилари Фан олимпиадаларида ҳам фаол қатнашиб, юқори натижаларни қўлга киритишди.

Мактабнинг она тили ва адабиёт ўқитувчилари Гулчеҳра Қурбонбоева, Мубора Халиллаева, Дилдора Ҳайитбоева, Моҳира Камоловалар ҳамда тажрибали қорақалпоқ тили фани ўқитувчилари Аптабида Абдимурадова, Дилдора Қўчқоровалар ҳам дарсдан ташқари машғулотлар ташкил этиб, уларни кутубхонада ўтказишади. Ёшларга ўзбек мумтоз адабиёти, 20-аср адабиёти ва ҳозирги замон адабиёти ривожига ҳисса қўшган адиб ва шоирлар ҳақида қизиқарли маълумотлар бериб, уларнинг асарлари билан таништириб боришади.

Эътироф этиш жоизки, мактаб кутубхоналари ахборот ва билимга тобора кўпроқ асосланиб бораётган замонавий дунёда муваффақиятли фаолият олиб бориш учун фундаментал аҳамият касб этувчи маълумот ва ғояларни тақдим этади. Навоий маҳалласидаги 1-сонли мактаб кутубхонаси ҳам ўқувчиларни таълим олиш кўникмалари билан қуроллантириб, уларнинг тасаввурларини ривожлантиришда муҳим аҳамият касб этиб, болаларнинг комил инсонлар бўлиб етишишларида алоҳида аҳамият касб этмоқда.

О.Худойберганова.