«АВТОМОБИЛСИЗ КУН» АКЦИЯСИ ДОИРАСИДА “САЛОМАТЛИК УЧУН 5000 ҚАДАМ” ПИЁДА ЮРИШ МАРАФОНИ ЎТКАЗИЛДИ

Нафақат мамлакатимизда, балки бутун дунё миқёсида тобора глобал тус олиб бораётган экологик бўҳронлар инсониятни ўйлаб иш қилишга, атроф-муҳит муҳофазасига жиддий эътибор қаратишга ундамоқда. Сабаби, билиб-билмай табиатга қилинган тажовузкорона ҳаракатлар туфайли яшил қалқонимиз бўлган дов-дарахтларни, табиий бутазорларни аёвсиз кесиб, уларнинг ўрнида ҳар хил тоифадаги қурилишларни амалга ошириш оқибатида кўчалар, бутун-бутун маҳаллалар ҳудудларида жазирама иссиқдан ҳимояловчи соя-салқин жойлар кескин камайиб кетди. Салгина шамол турса, чанг-тўзон кўтарилиб, ҳаво сифатининг бузилишига сабаб бўлаётган бу каби ҳолатларга барҳам бериш учун мутахассислар жиддий бош қотираётгани ҳеч кимга сир эмас. Албатта, бу муаммони бирданига бартараф этиш, мусаффо ҳаво муҳитини яратиш осон эмас. Чунки бир туп ниҳол ўсиб, Президентимиз айтганларидай, “соғлом ҳаво – кислород ишлаб чиқариш даражасига етгунича камида 10-15 йил вақт керак бўлади”.

Хўш, унгача нима қилиш, қандай чора-тадбирларни амалга ошириш керак? Бунинг учун мамлакатимизда тизимли равишда амалга оширилаётган “Яшил макон” умуммиллий ҳаракати доирасидаги кўчат экиш ва уларни сифатли парвариш қилиш, йўқотилган яшил қалқон – табиий мувозанатни тиклаш, атроф-муҳитга оқилона муносабатда бўлиш талаб этилади. Бундан ташқари, аҳоли зич яшайдиган шаҳарларда автомобилларнинг тиғиз вақтларда ҳаракатланишини тартибга солиш, ривожланган давлатлар, айниқса, Хитойдаги каби мунтазам равишда автомобилсиз кун акцияларини ташкил этиш орқали атроф-муҳитга тарқалаётган заҳарли тутун ва газларни камайтириш, ҳавода чанг зарраларининг кўтарилишига барҳам бериш энг оқилона тадбирлардан бири саналади.

Бу борада “Президентимизнинг “Ўзбекистон – 2030 стратегиясини Ёшлар ва бизнесни қўллаб-қувватлаш йилида амалга оширишга оид давлат дастури тўғрисида”ги Фармони барчамиз учун муҳим дастуриламал бўлиб хизмат қилади. Унга кўра, 2024 йил 1 мартдан бошлаб ҳудудларда чанг бўрони содир бўлаётганда ва атмосфера ҳавосида майда дисперс заррачалари белгиланган меъёрдан юқори бўлгани аниқланганда аҳолини огоҳлантириш йўлга қўйилади. Шу билан бирга юрак-қон томир ва нафас йўллари касалликларига чалинган ҳамда соғлиги ҳавонинг ифлосланишига таъсирчанлиги юқори бўлган фуқароларни зарур профилактик чоралар тўғрисида доимий хабардор қилиш амалиёти жорий этилади.

Шунингдек, ўлчами 500 метр квадрат ва ундан ортиқ бўлган қурилиш майдонларида, унга кириб-чиқиш йўлларида чанг ва қум заррачаларининг ҳавога кўтарилишини бартараф этиш бўйича мажбурий талаблар жорий этилади. “Автомобилсиз кун” акцияси, “Саломатлик учун 5 000 қадам” пиёда юриш марафонлари ўтказилади.

Жорий йилнинг 24 февраль санасида Амударё тумани спорт мактаби, туман Тиббиёт бирлашмаси ходимлари, маҳаллаларда истиқомат қилувчи ёшлар, кўча бошчи аёл-қизлар иштирокидаги “Автомобилсиз кун” акцияси доирасида ўтказилган “Саломатлик учун 5 000 қадам” пиёда юриш марафони ҳам экологик мусаффо ҳаво муҳитини яратиш, Манғит шаҳри ва маҳаллалар ҳудудида чанг зарраларининг атмосфера ҳавосига кўтарилишининг олдини олиш, қолаверса, саломатлигида муаммолари бўлган аҳолини соғлом ҳаётга қайтаришга қаратилгани билан муҳим аҳамиятга эга бўлди.

Акция иштирокчилари ҳамжиҳатликда ва юқори кайфиятда 5000 қадамдан зиёд масофани пиёда юриб ўтдилар. Марафон иштирокчиларининг ҳатти-ҳаракатларини Қорақалпоғистон Республикаси Ички ишлар вазирлиги Йўл ҳаракати хавфсизлиги бошқармаси бошлиғи Салават Казбеков, Қорақалпоғистон Республикаси Йўл ҳаракати хавфсизлиги бошқармаси катта инспектори Қалбай Муратов ва Амударё туман ИИБ йўл ҳаракати хавфсизлиги бўлими масъуллари кузатиб бордилар.

Пиёда юриш марафони якунида марафон иштирокчиларидан бир гуруҳи масъуллар томонидан маънавий рағбатлантирилдилар.

Робия Йўлдошева.