Математика фани бўйича “Ҳоким олимпиадаси” ўтказилди
Мамлакатимизда истиқболли ёшларни қўллаб-қувватлаш, уларнинг иқтидорини рўёбга чиқариш, илмий-тадқиқот ва инновацион фаолиятини самарали йўлга қўйиш учун қўшимча шарт-шароитлар яратиш борасида изчил чора-тадбирлар амалга ошириб келинмоқда.
Шу билан бирга, улғайиб келаётган ёш авлоднинг илм эгаллашга бўлган иштиёқи ва интеллектуал салоҳиятини ошириш, шунингдек халқаро майдонда мамлакатимизнинг нуфузини янада юксалтириш учун иқтидорли ёшларни аниқлаш ва юқори малакали кадрлар тайёрлашнинг узлуксиз тизимини такомиллаштириш юзасидам тизимли ишлар ташкил этилмоқда.
10 февраль санасида туманимиздаги 36-сонли умумтаълим мактабида математика фанидан “Ҳоким олимпиадаси” ўтказилди. Туман ёшлар ишлари агентлиги ҳамда Мактабгача ва мактаб таълими бўлими билан ҳамкорликда ўтказилган олимпиада умумий ўрта таълим мактабларида кичик ёшли иқтидорли ёшларни қўллаб-қувватлаш, уларнинг интеллектуал салоҳиятини намойиш этишига кўмаклашиш, ўқувчиларнинг халқаро олимпиядаларга пухта тайёргарлик кўришларига шарт-шароитлар яратиш каби устувор мақсадларга йўналтирилди.
Таълим муассасалари ўқувчилари орасидан математика, физика, кимё, биология, информатика, рус тили, она тили ва адабиёт, инглиз тили, тарих, география фанлари бўйича билимли, қизиқувчан, интилувчан ва ижодкор ёшларни аниқлаш, улардаги қобилиятларни рўёбга чиқаришга кўмаклашиш, қўллаб-қувватлаш ва рағбатлантириш мақсадида 2024 йил мобайнида ҳар ойда битта фандан, бир босқичда “Ҳоким олимпиадаси” ўтказилиши белгиланган.
Математика фанидан ўтказилган дастлабки олимпиадада туманимиздаги 85 та умумтаълим мактабларнинг 7-8-синфларида таҳсил олувчи 200 нафар иқтидорли ўқувчилар иштирок этдилар.
“Ҳоким олимпиадаси”нинг очилиш маросимида туман Ёшлар ишлари агентлиги раҳбари Сардор Исмаилов, Мактабгача ва мактаб таълими бўлими мактаблар фаолиятини мувофиқлаштириш шўъба раҳбари Ибрагим Раджапов, бўлим методистлари Ҳабибулла Давлетяров ва Райҳон Якубова ҳамда олимпиада аудитория раҳбарлари, кузатувчилар, ҳакамлар иштирок этдилар.
Очилиш маросимида туман Ёшлар ишлари агентлиги раҳбари Сардор Исмаилов, Мактабгача ва мактаб таълими бўлими мактаблар фаолиятини мувофиқлаштириш шўъба раҳбари Ибрагим Раджапов, 36-сонли умумтаълим мактабининг математика фани катта ўқитувчи Азимбой Сапарбоевлар сўзга чиқишиб, “Ҳоким олимпиадаси” ўтказилишидан мақсад ва вазифалар ҳақида, олимпиада ўтказилиш тартиби ҳақида тўхталиб ўтдилар ҳамда олимпиада иштирокчиларига омад тиладилар.
Шундан сўнг аудитория раҳбарлари ва кузатувчилар иштирокчиларини белгиланган хоналарда ММТБ ташкилий қўмита томонидан тақдим қилинган топшириқларни иштирокчи ўқувчилар сонига нусҳалаб олдилар ҳамда жараён бошланди. Иштирокчи ўқувчиларга 7-8-синф учун Математика фанидан 30 саволли топшириқлар ва жавоблар варақаси тарқатилди. Олимпиада топшириқларини бажариш учун иштирокчиларга низом талаби бўйича 2 соат вақт берилди. Белгиланган вақтдан кейин аудитория раҳбари томонидан иштирокчиларнинг жавоб варақалари шифрланган ҳолда ҳакамларга тақдим қилиниб, улар томонидан текширилди ҳамда натижалар чиқарилди. Натижаларга кўра 8-синфлар орасида 76-, 42-, 22- сонли умумтаълим мактаблари ўқувчилари, 7-синфлар орасида 31-, 64-, 22-сонли умумтаълим мактаблари ўқувчилари совринли ўринларни эгаллаб, ғолиб бўлишди. Совринли ўринларни эгаллаган ўқувчилар қимматбаҳо совғалар билан тақдирландилар.
Қайд этиш жоизки, ташкил этилаётган бу каби ишлар давлатимиз раҳбарининг ёшларни амалга оширилаётган ислоҳотларнинг фаол иштирокчисига айлантириш, илм-фанни ўзлаштиришга бўлган рағбатини ошириш, изланувчанлик ва яратувчанлик фаолиятига кенг жалб қилиш, жаҳон миқёсида Ватанимиз довруғини кенг таратган аждодларга муносиб авлодни тарбиялаш мақсадида қабул этилган “Иқтидорли ёшларни аниқлаш ва юқори малакали кадрлар тайёрлашнинг узлуксиз тизимини ташкил этиш чора-тадбирлари тўғрисида”ги қарори ижросини таъминлашга хизмат қилмоқда.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
