ГРАНТ ЛОЙИҲАСИ ДОИРАСИДА ЎТКАЗИЛГАН “КИТОБ – МАЪНАВИЯТ САРЧАШМАСИ” МАВЗУСИДАГИ МАҚОЛАЛАР ТАНЛОВИ ҒОЛИБЛАРИ АНИҚЛАНДИ

“Тараққиёт кўзгуси” газетаси таҳририятининг “Билимли ва маънавиятли ёшлар билан – Учинчи Ренессанс сари” номли грант лойиҳаси доирасида туман ҳудудида ёшлар ўртасида “Нажот – таълимда, нажот – тарбияда, нажот – билимда” шиори остида маънавий-маърифий тадбирлар ўтказилмоқда. Лойиҳа иш режасига кўра яқинда ўтказила бошлаган ёзувчи-шоирлар, тажрибали педагоглар билан учрашув ва давра суҳбатлари, “Китоблар карвони”, “Фарзандимга китоб совға қиламан” акциялари, китобхон ёшлар тўғрисидаги телелавҳалар ва бошқа тадбирларда ёшлар фаол иштирок этишмоқда.

Ўтган йилнинг декабрь ойида грант лойиҳаси доирасида ёшлар ўртасида “Китоб – маънавият сарчашмаси” мавзусида мақолалар танлови ўтказилиши эълон қилинган эди. Танловда туманимизнинг барча ҳудудларидаги адабиёт ихлосмандлари, китобхон ёшлар қатнашиб, ўз мақолаларини таҳририятга тақдим этдилар. Ёшлар қаламига мануб мақолаларда китоб ва китобхонликнинг аҳамияти, севган ёзувчи-шоирлари ва бадиий асарлар, улардаги қаҳрамонлар, турли образлар, мутолаа қилиш давомидаги таассуротлари акс этган. Шунингдек, китобларнинг инсон ҳаётида тутган ўрни ҳақида ўз фикрларини билдиришган.

Ушбу танловга келган мақолалар таҳририят ижодий жамоасидан иборат бўлган ҳакамлар томонидан кўриб чиқилди ва туман ихтисослаштирилган мактабининг 8-синф ўқувчиси Диана Сарсенбоева 1-ўрин, Ўзбекистон Давлат Маданият институтининг Нукус филиали кутубхоначилик йўналиши талабаси Шоҳида Оллаберганова 2-ўрин, 13-сонли мактабнинг 9-синф ўқувчиси Нафосат Янгибоева ҳам 2-ўрин, шу мактабнинг 11-синф ўқувчиси Адолат Ўрозбоева эса 3-ўрин ғолиблари деб топилдилар.

“Тараққиёт кўзгуси” газетаси таҳририятининг “Билимли ва маънавиятли ёшлар билан – Учинчи Ренессанс сари” номли грант лойиҳаси доирасида ёшлар ўртасида “Китоб – маънавият сарчашмаси” мавзусида ўтказилган мақолалар танлови ғолибларига фахрий ёрлиқ ва совғалар топширилди.

О.Худойберганова.