ТРАНСПОРТ ЙЎЛЛАРИДА ҲАРАКАТ ХАВФСИЗЛИГИНИ ТАЪМИНЛАШ БЎЙИЧА РЕЙД ТАДБИРЛАРИ ЎТКАЗИЛДИ
Амударё тумани ҳудудидаги автотранспорт йўлларида ҳаракат хавфсизлигини таъминлаш, оғир оқибатли ҳодисалар содир этилишининг олдини олиш мақсадида йўл-патруль хизмати ходимлари томонидан мунтазам равишда рейд тадбирлари ўтказиб келинмоқда.
21 январь куни бўлиб ўтган навбатдаги тадбирларда туман Ички ишлар бўлими йўл-патруль хизмати бўлинмасининг 13 нафар ходимлари иштирок этишди ва тадбир давомида 100дан зиёд қоидабузарликлар аниқланди.
Ундан ташқари, рейд пайтида 80 та автомашиналар қўпол қоидабузарликлар содир этганлиги сабабли Ўзбекистон Республикаси Маъмурий жавобгарлик тўғрисидаги Кодексининг тегишли моддасига асосан жарима майдонларига қўйилди. Шундан автотранспорт воситасини маст ҳолатда бошқариб юрганликда гумон қилинган 3 нафар фуқаро белгиланган тартибда тиббий текширувдан ўтказилди ва уларга нисбатан маъмурий баённомалар расмийлаштирилди. Шунингдек, 10 нафар фуқаро муддатидан ўтган қарздорликларни тўламасдан юрганлиги аниқланди ва жарималар тўлиғича ундириб олинди. Авто ва мототранспорт воситаларини бошқариш пайтида Ўзбекистон Республикаси Маъмурий жавобгарлик тўғрисидаги Кодексининг турли моддаларида кўрсатилган қоидабузарликларни содир этган 67 нафар фуқароларга ҳам тегишли тартибда жазо чоралари қўлланилди.
Таъкидлаш жоизки, сўнгги йилларда мамлакатимизда йўл ҳаракати хавфсизлиги соҳасида мавжуд муаммоларни бартараф этиш, халқаро стандартларга мувофиқ йўл-транспорт инфратузилмасини яхшилаш, автомобиль йўлларини реконструкция қилиш, йўл ҳаракати қулайлиги ва хавфсизлигини оширишга алоҳида эътибор қаратилмоқда. Бу борада Давлатимиз раҳбарининг бир қатор Фармон ва Қарорлари билан йўл инфратузилмасини комплекс такомиллаштириш йўналиши бўйича янги вазифалар ва чора-тадбирлар белгиланиб, қатор ишлар амалга оширилмоқда.
Бугунги кунда туман ҳудудидаги йўлларда ҳам ҳаракат хавфсизлигини таъминлаш, йўл-транспорт ҳодисаларининг олдини олиш, айниқса, пиёдалар ва вояга етмаган шахслар иштирокида қоидабузарликлар содир қилиниш эҳтимоли юқори бўлган жойларда ҳайдовчиларнинг ҳушёрлигини ошириш мақсадида шаҳар марказидаги йўл белгилари таъмирланиб, янги йўл белгилари ўрнатилмоқда.
Президентимизнинг 2022 йил 12 июлдаги 2022—2026 йилларга мўлжалланган “Хавфсиз ва равон йўл” умуммиллий дастурини тасдиқлаш тўғрисида”ги Қарори ижросини таъминлаш мақсадида ўтган давр мобайнида қатор автотранспорт йўлларида янги йўл белгилари ўрнатилиб, яроқсиз ҳолга келганлари алмаштирилди. Мактаблар олдига тезликни чекловчи йўл белгилари ўрнатилди, йўл ётиқ чизиқлари чизилди, аҳоли яшаш жойларидан ўтувчи йўллар четига тунги ёритгичлар ўрнатилиб, пиёдалар учун йўлаклар қурилди.
Рейд тадбирлари давомида йўл ҳаракати хавфсизлигини таъминлаш соҳасини “Шаҳар автомобиллар эмас, балки пиёдалар учун” ғояси асосида ислоҳ қилиш мақсадида туман марказида ҳам транспорт воситалари ҳаракатланишининг энг юқори тезлиги соатига 70 километрдан 60 километргача туширилгани, қоидабузарликлар турлари ва уларга нисбатан қўлланиладиган жазо турлари, белгиланган жарималар миқдорлари ҳақида ҳам маълумотлар, тушунчалар берилди. Бундай тадбирлар жамоат хавфсизлигини таъминлаш билан бирга турли кўнгилсиз ҳодисалар содир этилишининг олдини олишда муҳим аҳамият касб этади.
Рейд тадбирларида тушунтирилганидек, ҳар бир фуқаро, ҳайдовчи ёки пиёда бўлишидан қатъий назар, ҳаракатланаётган пайтида белгиланган йўл қоидаларига амал қилса, қоидабузарликлар, инсон ҳаётини хавф остида қолдирувчи ҳалокатлар содир бўлмайди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
