“ЕРГУЛОБОД” ФЕРМЕР ХЎЖАЛИГИДА КУЗГИ ИШЛАР ЖАДАЛ ДАВОМ ЭТМОҚДА

Куз фаслининг охирги ойларида деҳқонлар ҳосилни йиғиб-териб олиш билан бирга далаларда келаси йилги деҳқончилик ишларига ҳам тайёргарлик кўришади ва мўл ҳосилга замин ҳозирлашади. Амударё туманининг Ўртақалъа овули ҳудудидаги “Ергулобод” фермер хўжалигида ҳам айни кунларда об ҳавонинг очиқлигидан унумли фойдаланилиб, кузги ишлар қизғин давом эттирилмоқда.

Гулмурод Бобониёзов раислик қилаётган мазкур фермер хўжалиги тасарруфида 88 гектар ер майдони мавжуд бўлиб, жорий йилда 52 гектарида “Султон” навли пахта, 25 гектарида эса “Антонина” навли буғдой етиштирилди. Хўжаликда 21 нафар ишчи меҳнат қилиб, туманимизнинг қишлоқ хўжалиги ривожига ўз ҳиссаларини қўшиб келишмоқда. Бу йил пахтадан мўл ҳосил тўплашга эришилиб, ҳосилдорлик 34 центнерга етказилди ва режа ошириб бажарилиб, хирмонга 188 тонна “оқ олтин” топширилди.

Иш унумини оширишда хўжаликдаги 1та “Орион” русумли сурум, 2та “МТЗ – 80Х” русумли тракторлари, 1та комбайн, 1та экскаватор ва LC – 100 лазерли ер текисловчи техникалардан фойдаланилмоқда. Хўжаликда келгуси йил ҳосили учун қишлоқ хўжалиги экинларидан бўшаган ер майдонларни сифатли шудгорлашга киришилиб, шу пайтга қадар 30 гектар ер майдонида сурим ишлари якунланди. Суриладиган ер майдонларга фосфорли минерал ўғитларни ажратиш, суримдан олдин бериш ҳамда ушбу ишларни тўлиқ контурларда амалга оширишни таъминлаш, дала четлари, симёғоч атрофларини шудгорлашга алоҳида эътибор берилмоқда.

Хўжаликнинг тажрибали деҳқонлари кузги шудгор муддатини тўғри белгилаш катта аҳамиятга эга бўлгани сабабли, бу ишларни энг юқори самара берадиган октябрь-ноябрь ойларда амалга оширишга ҳаракат қилишмоқда. Чунки, бу муддатларда ҳайдалган ер деҳқончилик учун муҳим бўлган тупроқдаги нам заҳирасини яхши сақлашга, ёғин-сочиндан унумли фойдаланишга имкон беради.

Фермер хўжалик ҳудудида 25 гектар ер майдонига экилган кузги буғдой парвариши ҳам эътибордан четда қолаётгани йўқ. Униб чиққан буғдой майсаларини озиқлантириш мақсадида гектарига 300 кг.дан минерал ўғит берилди, 2 марта қондириб суғорилди. Бунинг натижасида ниҳоллар ривожи яхшиланди ва келаси йилги мўл ҳосилдан дарак бериб, совуқ тушишидан олдин бачкилашга улгурди.

Хўжаликда 4 гектар ерда боғ ҳам барпо этилган бўлиб, олма, нок, олхўри, узум каби 800 тупга яқин мевали дарахтлар айни пайтда ҳосилга кира бошлади. Ушбу боғдаги мевали дарахтлар ҳам хўжалик ишчилари томонидан парваришланиб келинмоқда. Айни пайтда ҳам ишчилар уйқу даврига кира бошлаган мевали дарахтларнинг шохларини бутаб, шакл беришмоқда, танасидан ўсиб чиққан бачкиларини олиб ташлашмоқда. Ноябрь ойида дарахтларга яхоб суви бериш жуда фойдали бўлгани учун боғ қатор ораларига сув қаратишмоқда.

“Ергулобод” фермер хўжалигида “Яшил макон” умуммиллий лойиҳаси доирасида боғ яратиш, ободонлаштириш ишларига алоҳида эътибор қаратилмоқда. Ҳозирги кунда оқава сув келишини яхшилаш мақсадида ҳудуддаги ариқлар ёввойи ўт-ўланлардан тозаланмоқда. Ариқлар четларига тут кўчатлари ўтқазилмоқда. Шу пайтга қадар 600 тупга яқин тут кўчатлари экилди. Шунингдек, яна қўшимча 1 гектар ер майдони ажратилиб, янгидан мевали дарахтлар кўчатлари кўчирилмоқда. Дала четларига шу пайтга қадар ўтқазилган узум кўчатлари эса 150 тупдан ошди. Боғ қатор ораларидан 0,50 сотих ерга экилган тўқсонбости экинларидан пиёз ва саримсоқ пиёз ҳам униб чиқа бошлади.

Хўжалик раиси Гулмурод Бобониёзов хўжалик ишчилари, тажрибали деҳқонлар билан ҳамжиҳатликда келгуси деҳқончилик йилида пахта ҳосилдорлигини 50 центнерга, ғаллани эса 80 центнерга етказишни режалаштиришган. Шунингдек, боғдан ҳам мўл ҳосил етиштириб, ўз хонадонлари ва эл дастурхонини тўлдиришни ният қилишган.

Далаларда сифатли ўтказилган кузги ишлар келгуси йил ҳосилига пухта замин ҳозирлайди. Буни тажрибада кўрган “Ергулобод” фермер хўжалиги ишчилари очиқ об-ҳаволи кунларни ғанимат билиб, бор куч-ғайратини кузги ишларни якунлашга қаратишмоқда.

О.Худойберганова.