6 ОЙЛИККАЧА БЎЛГАН БОЛАЛАРДА ЎТКАЗИЛАДИГАН ПРОФИЛАКТИК ЭМЛАШЛАР ДАВОМ ЭТМОҚДА

Юқумли касалликларнинг олдини олишда профилактик эмлашлар катта аҳамиятга эга. Тиббиёт ходимлари аҳоли иммунизациясига доир хизматни тақдим этиш жараёнида ҳамиша миллий эмлаш тақвимига таянади ва вакциналар билан ишлаш йўриқномаларига амал қилади.

Кейинги йилларда Республикада иммуннопрофилактика ишларининг самарали ўтказилиши натижасида кўпгина юқумли касалликлар, жумладан, бошқариладиган инфекцияларни сезиларли даражада камайтирилишига эришилди. Айниқса, болаларни эмлаш ишларини такомиллаштиришга катта аҳамият берилмоқда.

Иммунопрофилактика тадбирларининг самарали ўтказилиши натижасида республикада 1995 йилдан бошлаб, болаларда полиомиелит касаллиги, 2002 йилдан дифтерия, чақалоқлар қоқшоли, 2001 йилдан бошлаб туғилган болалар ўртасида Вирусли гепатит В касаллиги қайд қилинмади. Қизамиқ ва қизилча касаллига қарши эмланган болалар ўртасида касаллик қайд қилинмади. Миллий тақвим асосида республикамизда бўлганидек туманимизда ҳам ҳар йили 13 турдаги юқумли касалликларга қарши профилактик эмлаш ўтказилади.

Амударё туманида профилактик эмлаш ишларини ўтказиш учун тиббиёт ходимлари ҳар йил ўқитилиб, билим савияси оширилади ва сертификатлар берилади.

Туманда айни кунларда 2 ойликкача бўлган болаларни профилактик эмлаш ишлари амалга оширилмоқда.

Жорий илнинг 11 октябрида туман Санитария эпидемиологик осойишталик ва жамоат саломатлиги бўлимининг эпидемиология ва иммунопрофилактика бўлими мудираси Гулшод Тожибоева туман Тиббиёт бирлашмасига қарашли туғруқ комплексида бўлиб, янги туғилган чақалоқларнинг касалликларга қарши илк эмланишини назорат қилди. У дастлаб бу борада олиб борилаётган ишлар билан танишди ва эмлаш ишларини олиб борувчи ходимлар билан суҳбатлашди. Эмлашнинг чақалоқнинг келгусидаги ҳаётидаги аҳамиятини, эмлаш жараёнига юксак масъулият билан қараш лозимлигини кенг тушунтирди.

Шунингдек, Гулшод Тожибоева туман кўптармоқли марказий поликлиникасидаги эмлаш пунктида ҳам бўлиб 2 ойлик болаларни касалликларга қарши эмлаш жараёнлари билан танишди, жараённи сифатли ўтказишга доир зарур тавсиялар берди.

Профилактик эмлашлар туман Тиббиёт бирлашмасининг туғруқ комплекси, кўп тармоқли марказий поликлиникадан ташқари оилавий ва оилавий шифокорлик пунктларидаги эмлаш хоналарида ҳам ўтказилмоқда.

Туманимиз бўйича 2 ёшгача 14225 нафар бола бўлиб, барчаси 98-100 фоиз эмлаш билан қамраб олинади. Бунинг учун эмлаш пунктлари вакциналар билан етарли таъминланган. Вакциналарни ҳудудий эмлаш пунктларига олиб бориб бериш учун махсус машина ажратилган. Эмлаш хоналар совуткичлар, зарур жиҳозлар ва шокга қарши дори-дармонлар билан таъминланган.

Касалликни даволагандан кўра унинг олдини олган афзал. Шунинг учун давлатимиз томонидан болаларни касалликларга қарши профилактик эмлашга юксак эътибор қаратилмоқда.

Катта маблағлар эвазига етказиб берилаётган вакциналар билан болаларнинг ўз вақтида эмланишини таъминлашга ота-оналар ҳам масъулият билан қарашлари лозим. Зеро, болалар ­– юртимиз келажаги!

Ойгул РАЖАБОВА.