Туман бўйича жами 1777 гектар майдонга пиёз, саримсоқпиёз каби экинлар тўқсонбости усулида экилади

Шу кунларда туманимизга йўлингиз тушса, дала майдонларидаги қизғин иш жараёнларининг устидан чиқасиз. Қайси манзилга боқманг, кейинги йил ҳосили учун экин экаётган, жорий йилдаги ҳосилни эса йиғиштириб олаётган миришкор-деҳқонларга кўзингиз тушади. Улар шу кунларда асосий ва такрорий экинлар ҳосилини йиғиб-териб олиш баробарида тўқсонбости усулида экинлар экишга ҳам тараддуд кўрмоқдалар.

Туманимиз аҳолисининг эртаки сабзавот маҳсулотларига бўлган талабини тўлиқ қондириш мақсадида ҳосилдан бўшаган майдонларга совуққа чидамли пиёз ва саримсоқпиёз каби экинларни тўқсонбости усулида экиш ишлари бошланмоқда.

Бунинг учун кузда асосий экинлардан бўшаган майдонларни сифатли ҳайдаб, совуққа чидамли экинларни ўз вақтида экиш муҳим масала саналади. Бу ўз навбатида экин майдонлари ва аҳоли томорқаларидан самарали фойдаланиш, экспортбоп қишлоқ хўжалиги маҳсулотлари етиштириш ва экспорт қилиш ҳажмларини кўпайтириш, камбағалликни қисқартириш ҳамда аҳолининг моддий манфаатдорлигини оширишда муҳим воситалардан биридир.

6 октябрь куни Чойкўл овулида фаолият юритувчи “Арслон Мақсудов” фермер хўжалигида ўтказилган кўргазмали семинарда тўқсонбости усулида сабзавот экинларини экиш ҳамда шу усулда экилган экинларни парваришлашнинг муҳим жиҳатлари хусусида семинар бўлиб ўтди.

Семинарда Ўзбекистон Республикаси Қишлоқ хўжалиги вазирлигининг Департамент бошлиғи Комилжон Собиров, Ўзбекистон Республикаси Қишлоқ хўжалигида хизматлар кўрсатиш агентлиги раҳбари Ҳусниддин Каримов, мазкур агентликнинг Қорақалпоғистон Республикаси бўлими раҳбари Ҳолдор Ачилов, Қорақалпоғистон Республикаси Вазирлар Кенгаши Раисининг ўринбосари Дарябай Қайпов, туман ҳокими Собир Хўжаметов, секторлар раҳбарлари, овул ҳамда маҳалла фуқаролар йиғинлари раислари қатнашдилар.

Семинарда 2024 йил ҳосили учун фермер ва деҳқон хўжаликларида жорий йилда пиёз ва саримсоқпиёз экинларини экиш параметрлари, муддатлари ва бу борадаги устувор вазифалар ҳақида тушунчалар берилди.

Шунингдек, мутахассислар томонидан экин майдонларидан самарали ва унумли фойдаланиш, уруғлик ва минерал ўғитларни танлаш ҳамда ишлатиш, уларнинг хусусиятларини билиш, экиш муддатларини аниқлаш каби масалалар бўйича маълумотлар берилди.

Семинарда сўзга чиққан мутахассислар ва соҳа илғорлари совуққа чидамли бўлган пиёз, саримсоқпиёз каби экинларни тўқсонбости усулида етиштириш орқали улардан яхшигина даромад олиш мумкинлиги ҳақида айтиб ўтдилар.

Айтиш жоизки, кейинги йилларда республикада туманларнинг ихтисослашувини, минтақаларнинг тупроқ-иқлим шароитлари ва сув билан таъминланганлигини ҳамда бошқа омилларни эътиборга олган ҳолда қишлоқ хўжалиги экинларини оқилона жойлаштиришга алоҳида эътибор бериб келинмоқда. Шундан келиб чиққан ҳолда бу йил туман бўйича жами 1777 гектар майдонга пиёз, саримсоқпиёз каби экинларни тўқсонбости усулида экиш режалаштирилган.

Семинарда иштирокчиларга экинларни тўқсонбости усулида экиш ва парваришлаш бўйича зарур тавсиялар ва тушунтиришлар берилди. Шунингдек, бу бўйича амалга оширилиши лозим бўлган агротехник тадбирлар ҳақида сўз юритилди.

Туман ҳокимлиги Ахборот хизмати