ХАЛҚҚА ЯҚИНЛАШАЁТГАН ТИББИЁТ: БУ ОДАМЛАР ҲАЁТИ ВА УМР МАЗМУНИНИ ҚАНДАЙ ЎЗГАРТИРМОҚДА?
Соғлиқни сақлаш тизимининг барча даражасида тиббий хизмат кўсатиш кўламини кенгайтириш ва сифатини ошириш, аҳолининг тиббий хизматлардан фойдаланиш қулайлигини таъминлаш, жумладан, замонавий, юқори технологик ихтисослаштирилган тиббий хизматларни аҳолига янада яқинлаштириш, бундай хизматлар сифатини ошириш, ундан барча аҳолининг тенг фойдаланишини таъминлаш, касалликларнинг олдини олиш, барвақт аниқлаш ва даволашни яхшилашга йўналтирилган аниқ чора-тадбирлар амалга оширилмоқда. Натижада ихтисослаштирилган тиббиёт марказлари сони охирги 7 йилда 10 тадан 24 тага етди.
Илгари бундай марказлар фақат пойтахтда жойлашган бўлса, бугунга келиб ҳудудларда уларнинг 270та филиали, туманларда 300дан зиёд бўлимлари ташкил этилди. Марказлар амалиётига 106 турдаги, вилоят даражасида 202 турдаги, туман даражасида 85 турдаги янги диагностика ва жарроҳлик усуллари тадбиқ қилинган. Бундай саъй-ҳаракатлар орқали ҳудудлардаги юқори технологик операциялар улуши 23 фоиздан 55 фоизгача етказилди.
Юртимизда инсон аъзолари трансплантацияси амалиёти жорий этилиб, бундай операциялар айрим ҳудудларда ҳам ўтказилаяпти. Бугунги кунда беморлар пойтахтга эмас, аксинча, марказларнинг профессор, мутахассислари жойларга чиққан ҳолда беморларга ёрдам кўрсатадиган, ҳудудлардаги мутахассисларга маҳорат дарсларини ўтадиган тизим яратилди.
Ихтисослаштирилган тиббий хизматлардан бири – кардиология йўналиши ислоҳ қилиниши юрак-қон томир хасталиклари туфайли юз бериши мумкин бўлган нохуш вазиятларнинг олдини олишга катта имкон бермоқда. Республика ихтисослаштирилган кардиология илмий-амалий тиббиёт маркази давлат муассасасига айлантирилиб, тиббий хизматлар кўрсатишнинг кардиология йўналиши бўйича мамлакатнинг бош муассасаси этиб белгиланди, барча ҳудудларда ушбу марказнинг филиаллари ташкил этилди.
Яна бир ҳаётий мисол. 7-8 йил аввал республика бўйича 3та ихтисолаштирилган тиббиёт марказида ҳамда Хоразм ва Наманган вилоятларида ангиограф ускунаси бўлган. Ҳозирги кунда ангиограф ўрнатилган тиббиёт муассасалари сони 40тадан ошган. Жорий йилда Республика ихтисослаштирилган кардиология илмий-амалий тиббиёт марказининг Бухоро ва Фарғона филиалларида интервенцион кардиология биноси ишга туширилиб, уларда ҳам ангиограф ускунаси ўрнатилди.
Мамлакатимизда очиқ усулдаги кардиожарроҳлик амалиётлари ўтказилиши ҳам йўлга қўйилди.
Ихтисослаштирилган марказлар фаолиятида яна бир муҳим янгилик шундаки, тиббий суғурта механизмлари жорий этилгани, кафолатланган тиббий хизмат доирасида юқори технологик амалиётларни ҳам давлат бюджети маблағлари ҳисобидан ўтказиш имконини бермоқда. Хусусан, бу тизим ихтисослаштирилган марказларга жорий қилинганидан буён ўтган 1,5 йил давомида 850дан зиёд беморларда юқори технологик, интервенцион, аритмологик ва кардиожарроҳлик амалиётлари бепул ўтказилган.
Хулоса ўрнида айтиш мумкинки, соҳада амалга оширилаётган ислоҳотлар натижасида беморларда юқори сифатли тиббий хизматдан фойдаланиш имконияти янада кенгайди. Бу эса халқимизнинг яшаш сифатини яхшилашга, ўртача умр кўриш давомийлигини узайтиришга хизмат қилаверади.
Зумрад Бекатова,
Олий Мажлис Қонунчилик палатаси депутати,
Ўз МТДП фракцияси аъзоси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
