БИЛИМЛИ ВА ҲУНАРЛИ ЁШЛАР – ЮРТ ТАЯНЧИ
Касб-ҳунар таълими тизими иқтисодиёт ривожининг муҳим компоненти ҳисобланади. Ушбу таълимда юқори малакали ишчи, касб эгалари, иқтисодиётнинг ўрта бўғини мутахассислари тайёрланади. Амударё туманида ҳам ёшларнинг касб-ҳунар сирларини мукаммал ўрганишларини таъминлаш мақсадида 1- ва 2-сонли касб-ҳунар мактаблари ташкил этилган бўлиб, бугунги кунда уларда ёшлар касб-ҳунар сирларини пухта ўрганишмоқда.
Қипчоқ овулидаги 1-сонли касб-ҳунар мактабида 2022-2023-ўқув йили давомида жами 304 нафар ўқувчига 28 нафар ўқитувчи ва 10 нафар ишлаб чиқариш таълими усталари таълим-тарбия бериб, касб ва ҳунар сирларини ўргатишди. Йил давомида ўқувчилар бу даргоҳда касб-ҳунар сирларини ўрганиш билан бирга олий ўқув муассасаларига чуқур тайёргарлик кўриб, талабалар сафига қўшилишга муяссар бўлишди. Шунингдек, 4 нафар ўқувчи инглиз тили фанидан халқаро ва миллий сертификатларга эга бўлишди. Мазкур ўқув йилида касб-ҳунар мактабини 160 нафар ўқувчи битирган бўлса, шундан 36 нафари олий таълим муассасаларига қабул қилинди.
Сўлим табиатли, кўкаламзор ҳудудда жойлашган ушбу таълим муассасасида 240 ўринли ўқув устахонаси, 120 ўринли ошхона ва 100 ўринлик ўқувчилар турар жойи мавжуд. Ўқув муассасасида таълим олаётган ёшларнинг касб ва ҳунар сирларини пухта ўрганишларини таъминлаш мақсадида тумандаги корхона, ташкилот ва муассалар билан ўқув ва ишлаб чиқариш амалиётларини ўташлари учун 12 та ҳамкорлик шартномалари тузилган. Ҳозирги кунда мазкур шартномаларга кўра белгиланган корхона-ташкилотларда ўқув жадвалига асосан ишлаб чиқариш ва диплом олди амалиётларини ўтказиш йўлга қўйилган.
Касб-ҳунар мактабида 2023-2024 ўқув йили олдидан ҳам қизғин тайёргарлик кўрилиб, ўқувчи-ёшларнинг сифатли таълим олишлари учун барча шарт-шароитларни яратишга алоҳида эътибор қаратилди. Бу йилги ўқув йилида 1-босқичга 8 та йўналиш бўйича 205 нафар ўқувчи қабул қилиниб, ҳозирги кунда таълим-тарбия ишлари бошлаб юборилди. Ўқувчи-ёшларга 28 нафар ўқитувчи ва 9 нафар ишлаб чиқариш усталари таълим-тарбия беришмоқда.
Ҳозирги кунда касб-ҳунар мактабида ўқувчилар автомобиль двигателларини ташхислаш ва таъмирлаш, автомобиль электр ва электрон жиҳозларига хизмат кўрсатиш, ахборот воситалари машиналари ва компьютер тармоқлари оператори, тикувчи, ўт ўчирувчи, тракторчи-машинист, рақамли ахборотларни қайта ишлаш устаси, электрик каби йўналишлар бўйича касб-ҳунарга ўргатилмоқда. Уларга билимдон ўқитувчилар томонидан умумтаълим фанлардан тўлиқ билимлар бериш билан бирга, тажрибали ишлаб чиқариш усталари касб ва ҳунар сирларини мукаммал ўргатишга ҳаракат қилишмоқда. Шунингдек, мактабда тикувчи ва пайвандловчи йўналишлари ўқувчилари ўртасида турли тадбирлар, танловлар ўтказилиб, ёшларнинг танлаган касбига бўлган қизиқишлари янада оширилмоқда.
Ушбу даргоҳда ўқувчиларни китобхонликка жалб этишга ҳам алоҳида эътибор қаратилиб келинмоқда. Муассасадаги кутубхонада 24 мингдан ортиқ турли хил мазмундаги адабиётлар мавжуд бўлиб, турли хилдаги янги адабиётлар, электрон дарсликлар келтирилган. Ўқувчилар кутубхонага ташриф буюриб, бу ердаги китобларни мутолаа қилишади ва билимларини ошириб, дунёқарашларини кенгайтириб боришмоқда.
Айни даврда иқтисодиётнинг барча тармоқлари баробарида тадбиркорлик, кичик бизнес, оилавий бизнес, томорқа бизнеси, қурилиш, хизмат кўрсатиш, чорвачилик, паррандачилик, асаларичилик, балиқчилик каби тез суръатларда равнақ топаётган соҳалар учун ишчи касблар бўйича малакали кадрлар зарур. Шу сабабли касб-ҳунар мактабида ўқувчи-ёшларнинг ҳар томонлама етук, замонавий билимларга эга, жамиятда ўз ўрнига эга инсонлар бўлиб етишиши учун барча имкониятлар яратилган.
Касб ва ҳунар инсонга умри давомида ҳамроҳ бўлади. Тўкис, бахтли ҳаёт кечириш учун касб ҳам, ҳунар ҳам ўрганиш керак. Ўз касбининг устаси, ҳунарли кишиларнинг ризқи бутун, турмуши фаровон бўлади.
Шу ўринда ёшларга касб-ҳунар сирларини пухта ўргатаётган, мамлакат иқтисодиёти ривожи ва халқ фаровонлигига ҳисса қўшувчи етук мутахассисларни тайёрлаш йўлида ўзларининг бор билими ва тажрибасини сафарбар қилаётган ўқитувчилар ва ўқувчилар, ишлаб чиқариш таълими усталарини касб байрами – Ўқитувчи ва мураббийлар куни билан табриклаймиз! Ҳамиша касбингиздан камол топиб, машаққатли меҳнатларингизнинг роҳатини кўриб яшанг, азиз устозлар!
О.Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
