БЎЗСОЛМА МАҲАЛЛАСИДА МУСТАҚИЛЛИК ШУКУҲИ
Юртимизда нишонланадиган муҳим саналар, қутлуғ кунларнинг ҳар бирининг ўз мазмун-моҳияти бор. Мустақиллик байрами ҳар йили юртимизнинг овул ва маҳаллаларида ўзига хос тайёргарлик, турли маърифий, маданий-кўнгилочар тадбирлар ила тантана қилинади. Боиси, бу кун халқимиз асрлар оша интилган, курашган ўз эркинлигига, ўз ҳаётини ўзи мустақил белгилаш бахтига муяссар бўлган кундир.
Жорий йилда ҳам Республикамизнинг барча ҳудудларида мустақиллигимизнинг 32 йиллиги арафасида истиқлолни тараннум этадиган «Янги ҳаёт учун, Янги Ўзбекистон учун!» шиори остида мусиқали маданий-маърифий тадбирлар ўтказилди.
Тадбирларда халқимизнинг мустақиллик йилларида амалга оширган бунёдкорлик ишлари, янгиланишлар, ўзгаришлар, айниқса, инсон қадр-қимматини юксалтириш борасидаги саъй-ҳаракатлар, ҳар бир фуқаронинг ўз ҳаётидан рози бўлиб яшашига эришиш йўлидаги давлатимиз сиёсати кенг тарғиб қилинмоқда, ёшлар бугунгидай озод, обод ва фаровон ҳаётни асраб-авайлаш га, юртимиз тинч-осудалигини сақлашга даъват этилмоқда.
27 август куни Амударё туманининг Бўзсолма маҳалласида ҳам мустақиллигимизнинг 32 йиллигига бағишланиб “Янги ҳаёт учун, Янги Ўзбекистон учун” деган бош ғояни ўзида ифода этган байрам тадбири ўтказилди.
Тадбирда Қорақалпоғистон Республикаси камбағалликни қисқартириш ва бандлик вазири Сағиндиқ Турманов, ёшлар масалалари бўйича туман ҳокими ўринбосари Маҳмуд Шерметов, маҳалла фаоллари, нуроний отахонлар, онахонлар, фаол ёшлар иштирок этди.
Ёшлар масалалари бўйича ҳоким ўринбосари Маҳмуд Шерметов сўзга чиқиб, тадбир иштирокчиларини мамлакатимиз мустақиллигинг 32 йиллик байрами билан табриклади. Тадбирда сўз олган маҳалла фуқаролар йиғини масъуллари, ҳурмат-эътиборли нуронийлар энг улуғ ва энг азиз байрамимизнинг аҳамияти, мустақиллик шарофати билан амалга оширилаётган ислоҳотлар, улкан бунёдкорлик ишлари ҳақида сўз юритдилар.
Хусусан, сўнгги йилларда рўй бераётган улкан ижобий ўзгаришлар эътироф этилди.Таъкидланганидек, кейинги йилларда туманимизнинг энг чекка ҳудудларидан бири бўлган Бўзсолма маҳалласи ҳам ўзгача чирой касб этди. Ички кўчалар тартибга келтирилиб, таъмирланди. Янги, замонавий услубда маданий-маиший, савдо хизмати кўрсатувчи бинолар қурилиб, фойдаланишга топширилди. Равон кўчалар бўйларидаги бири-биридан кўркам, яшил дарахтлар билан ўралган ва замонавий услубда таъмирланган ҳовлилар маҳалла кўркига кўрк қўшиб турибди.
Шунингдек, маҳалла ўсмир-ёшларининг илм олишлари, ўз иқтидорини ривожлантириши учун барча шароитлар яратилган. Айниқса ҳудуднинг кўпни кўрган, улкан ҳаётий тажрибага эга нуронийлари “бир болага етти қўшни ота-она” тамойили асосида ҳамжиҳатликда ёш авлоднинг юртимизга муносиб бўлиб вояга етишларига ҳаракат қилишмоқда.
Табриклардан сўнг маҳалла иқтидорли ёшлари ижросида тайёрланган мусиқий дастур намойиш этилди. Дастурдан ўрин олган озод ва обод Ватанимизни, бахтиёр замонамизни, мустақиллигимизни мадҳ этувчи куй-қўшиқлар барчага манзур бўлди. Маҳалла аҳли тўкин дастурхон атрофида дилдан суҳбатлашиб, байрам мусиқали дастурини томоша қилиб, мароқли ҳордиқ чиқардилар ва шундай дориломон кунларга етганларига шукрона айтиб, кўнгиллари фахр-ифтихорга тўлиб тарқалдилар. Истиқлол шукуҳи барчага юқори кайфият бахш этди.
Ойгул РАЖАБОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
